Deuterunumyu 4 - Fanawbuid tagsibaliwas Fakayabian

Muisis Nafoyung sa sangay Taw Israel te, Faningi tua Dius

¹ Sanya ginan, Muisis nalong sa sangay taw Israel te, Dungugani ngay suguan ay ngay fagaloan ku fagnamoyungun ayu. Faningi ban tuy fag foyungan laman ban gleleg tuam ay mabanwan sis Yawi at nafon ayu fag daga. Yawi tam ngay mangaguyang at Dius.

² Lag am gfamut ay gbuin ku nafon ayu fag ngay suguan siginan tam Dius Yawi. Faningi kanya fag ngay suguan.

³ Nalag am Yawi at nafakamulun sis Baal-Peur, Yawi nafabul ngay taw Israel at naseg Baal fag fagsegan.

⁴ Dewa katanya, am matuyan tuam gugat sas Yawi, ay dasug katsi, gleleg tuam.

⁵ Nafoyung au sa ayu ngay suguan ay ngay fagaloan, Yawi ku Dius at nafoyung angku laman ay fagnangugaliun ban sa ay fagnangadasugan fag talun ay fagbanwanan.

⁶ Faningi fia tuy fag suguan, aroro siginan takatanya mafasure ban am sa sangay talun ay fagsafulun ay ay fagmatogdungugun ay ay fagmayamagun. Kanya ban fagayu nu nadungug takatanya fag fagaloan lumong ban te, “Anud, tuy fag talun at ngay taw at mabalyanan, e fagsafulun tua ay fagmatogdungugun.”

⁷ We tibak taw at mabalyanan at ke dius at munakbang gugat, kata Yawi tam Dius nu munakbang si antam galay tam guro anya.

⁸ Ay we tibak taw at mabalyanan ke ngay suguan ay ke fagaloan kata ku foyungan ayu katsi.

⁹ Dewa katanya, am madiriani tua! Lag am kalyam nusnge wain ay nalag Yawi at nafakamulun. Ay amatangi tua gugat tuy kaduge am gleleg.

¹⁰ Amatangi ebi gina am nanangalindug fag menit sa ay Dius Yawi at daga salubangan sis Buksul Sinay, nu inda nu glong angku te, “Fafuli ngay taw Israel si ku daga salubangan laman gdungugan ku ngay longan ay laman ban gsuyu tua gugat angku kaduge gleleg ay laman ban mafoyung tua sat ngay sisian.”

¹¹ Sanya ginan, ankakbang am sa angku ay namalindug am sis day buksul kaduge gigang gdasug sas banwa, ay fagmadulumun nasifig kafag buksul siginan sik linyabu malayung.

¹² Sanya ginan, Yawi naringang siginans wabilug afuy. Nadungug am at aringang ay wam glag anya.

¹³ Kanya nalong sa ayu nusnge wain ay fakamulun, gina ban gfafasludan at nasadian sa ayu. At suguan fag safulu at nariruk sas duak dalifi, at nasugu ayu laman ay fagnamaningun ban.

¹⁴ Ay ginanya, Yawi nasugu angku laman namoyung au sa ayu ngay suguan ay ngay faugali ay fagnamaningun ban, sa ay fagnangagbilugun ay fagnamanwanan fag talun.

¹⁵ Yawi gina gfakamatoan ayu sis Buksul Sinay siginans wabilug afuy, wam glag anya. Nu katanya, dirii,

¹⁶ laman diam gfauri ay sadili siginan nu kawat am ngay fagsegan sas nusnge wain fag kawalungan takata mangama ay mangena,

¹⁷ ngay mangilafang, taglao ay taglayug,

¹⁸ tagalafangan ay tagbanwan sisad mamam.

¹⁹ Lag am galo sa tagseg nusnge wain tagsis banwa kata menit, magdanun, ay ngay galeme. Yawi nafasanya kanya fagayu laman sas fagayu tagbanwan sis fagdaul daga.

²⁰ Amatangani gugat te, ay Dius Yawi nataban ayu siginans talun Igiptu, siginans talun takata sik faigangan tagigang, laman at ngay taw ban am fia, ay katsi anud am wan at ngay taw.

²¹ Ay Dius Yawi ankuri angku aroro sa ayu, ay kanya nafatuyan yangay te, kwa ban madife Liskung Urdan ay madasug sat masine fag talun ay Dius Yawi at nafon sa ayu laman ay fagnangagbilugun.

²² Kabul kban ste fag talun ay kwa ban nadife Liskung Urdan, dewa katanya, am long ban umdife am ay manangagbilug kafag talun at masine.

²³ Dewa katanya, madiriani tua laman diam kalyam Yawi at nawat fag nasadian laman sa ayu. Lag am kawat ngay fagsegan nusnge wain fag aninu, aroro Yawi wa kaylat takatanya.

²⁴ Ay wa kaylat nung wayam e tibak fagsegan. Aroro Yawi nu gfaurianan kata sik afuy nu gfamin.

²⁵ Ay nu nke ngay sisian ban am ay anke ngay fufu gina ban am gbanwan ngaduge sanya fag talun, lag am gfauri ay ngay sadili siginan nu kawat am ngay fagsegan nusnge wain fag kawalungan. Takatanya mauri way sas Yawi ay gfadotama anya.

²⁶ Katsi fag menit nauro au banwa ay daga, laman gfatuyan te, nu dway ban am gfaning angku, wa ban ngaduge nu gbanwan am sa ay fagnangagbilugun fag daga, sas dife Liskung Urdan. Ay wa ban ngaduge nu gbanwan am sanya. Ay sanya ginan ban fagayu am umbul am.

²⁷ Yawi ban namasaruayan ayu sa tibak ngay talun ay wa ban am ngayu ya takasawad si sangay talun at ngay taw nu inda Yawi nu gaiyan ayu.

²⁸ Ay sanya ban nu nanseg am sa ngay fagsegan at mawatan siginans gang ay kayu, ngay fagsegan yud glag, yud gdungug, ay yud gayuk.

²⁹ Dewa katanya, nu grvbvy tua ban am gugat ay Dius Yawi sas fagdaul ay amatanganan, lumag ban am anya.

³⁰ Fagidapun ban nu ndasug sa ayu, umfoli ban am sas Yawi ay namaning ban am anya.

³¹ Aroro ay Dius Yawi mafangafanyu tua, kanya di gfabayan ay di gfamin ayu. Ay di kalyam at nasadian at nafatuyanan sa ay ngay mangaguyang.

Dius Sadi Way

³² Amatangani ebi ataw fag ngay menit, siginan Dius nu kawat taw sas fagdaul daga dasug katsi. Ay afagdauli sas fagdaul daga; o e lagan ro am nusnge wain at maksvn nu madulo at kinfasludan takatatuy?

³³ O nunda ro tibak taw nu nadungug Dius at aringang siginans afuy gleleg yay kata ayu?

³⁴ O nunda e tibak dius at nafaskud gbul sik gaban taw siginan sik talun laman at ngay taw, siginan ngay famaskud, ay at madulo fag ngay fakamulun, ngay awayan ay at mabalyanan fag ngay fakamulun? Dewa katanya, ay Dius Yawi nafakamulun takatanya sis talun Igiptu, ay am wan at nalag takatanya.

³⁵ Nafasure sa ayu nusnge wain laman sumaful am te, Yawi wan at matuyan fag Dius, ay we tiba ya.

³⁶ Kanya nafadungug sa ayu at longan siginans banwa laman gfoyung ayu, ay nafalag sa ayu at fagmabalyananun siginan sik afuy ste sdaga, ay nafakamatoan ayu sanya ginan fag afuy.

³⁷ Ay aroro kanya kesug tua ay ngay mangaguyang, kanya nafili ay naufud ayu, ay siginan at fagmabalyananun kanya nafaduksun ayu siginans talun Igiptu.

³⁸ Kanya naiyan at mabalyanan fag ngay talun at ngay taw, ay nafabanwan ayu sanya fag ngay talun. Kanya nafon sa ayu kanya fag daga laman ay fagagbilugun, kata at nafakamulun katsi.

³⁹ Nu katanya, toglagi katsi fag menit ay amatangani te, Yawi way lang banwa ay daga at Dius.

⁴⁰ Faningi at ngay suguan ay at faugali ku nafon ayu katsi laman ban di e kadasug sa ayu ay sa ay ngay kasugfunanan at mauri, laman ban ngaduge tua nu gbanwan am si ay Dius Yawi at nafon ayu fag daga.

Fagsuksuanan fag ngay Furuan

⁴¹ Sanya ginan, Muisis nafili tuluk furuan daul sis Urdan sfakamenitan

⁴² laman at nafamabul fag taw sis yud algan at fagnanuksuanan, ay glagyu sanya fag ngay furuan ayu daul at sadi laman wa gafaurianan.

⁴³ Beser sis tungud buksul fag datag sis talun at yud e taw, laman sas Rubin at kasugfunanan; Ramut sis talun Gilyad, laman sas Gad at kasugfunanan; ay Gulan sis Basan, laman sas Manase at kasugfunanan.

⁴⁴ Muisis nafon sa sangay taw Israel ngay foyungan.

⁴⁵ Sanya fag foyungan, sanya wan ngay famamatang, ngay suguan ay ngay faugali, Muisis at nalong sa anya fagayu gina glao siginans talun Igiptu,

⁴⁶ ay gina kanya fagayu maful sis datag munakbang sis Bet-Peur sis Urdan at fakamenitan. Ginanya fun Sikun ngay taw Amur at fun tagagbilug tuy fag daga, gina kanya gfagtainan sis Kesbun. Kanya ay at ngay tagfawayan, Muisis ay ngay taw Israel at nababo, gina nalao siginans talun Igiptu.

⁴⁷ Muisis ay at ngay ufud nagbilug kanya fag daga ay anggan fun Ug, Basan at fun at daga. Kanya fag dua ngay taw Amur at fun sis Urdan at fakamenitan.

⁴⁸ Ngay taw Israel at naago ngay talun siginans Aruer tagsi tangabat fag buknga sis Liskung Arnun ay sas buksul Siryun, at ngayan yangay te, Ermun.

⁴⁹ Ay anggan fagayu daga sis datag Urdan, sis fakamenitan Liskung Urdan sitsigons Dagat at Mabulan sis day buksul Pisga.