Deuterunumyu 3 - Fanawbuid tagsibaliwas Fakayabian

Fun Ug Nababawan

¹ Sanya ginan, nataglayun tam sas talun Basan, ay nu ndasug tam sas furuan Edrei, Ug, Basan at fun ay fagayu at ngay tagfawayan nafawayan antam.

² Ay Yawi nalong sa angku te, “Lag o kalimu fun Ug, aroro namababawan kwan anya sa emu, anggan at ngay taw ay fagdaul at talun. Fakamuluni sa anya kata am nafakamulun sas Sikun, ngay taw Amur at fun, tagfunan sis Kesbun.”

³ Nu katanya, Yawi nafababawan sa antam Ug, Basan at fun ay fagayu at ngay taw. Nafabul tam anya fagayu ay wa tam e nafasawad.

⁴ Naago tam fagayu at furuan ayu daul fag unumk safulu ay at fagagbilugun fag talun Argub nu inda Ug, Basan at fun nu gfunan.

⁵ Kanya fag ngay furuan maligung tangabat ayu daul fag ngay dingding alad at ke sakbawan ay ke fantabing dingding sakbawan. Naago yangay tam ngay furuan at yud e dingding alad.

⁶ Nafabul tam anya fagayu kata tam nafakamulun sas fun Sikun, Kesbun at fun. Nafabul tam fagayu taw si tam nadalan fag ngay furuan tam naago; ngay mangama, mangena ay ngay sisian.

⁷ Ay nabuba tam fagayu at fagbaugun ay at ngay ramraman tam nabul siginan at ngay furuan.

⁸ Nu katanya, naago tam siginan ngay taw Amur at fun fag dua, talun sis Liskung Urdan sas fakamenitan baliwa, siginans Liskung Arnun sitsigons Buksul Ermun.

⁹ (Ngay taw Sidun nafangayan Buksul Ermun te, Siryun, ay ngay taw Amur nafangayan kafag buksul te, Senir.)

¹⁰ Naago tam at ngay furuan ayu daul tagsis tungud buksul fag ngay datag, anggan fagdaul Gilyad ay fagdaul Basan sitsigons Saleka ay Edrei, Ug, Basan at fun at fagagbilugun.

¹¹ (Ug way lang fag fun at sawad si sangay taw Refa at kasugfunanan. At fagtiugan at mawatan sanbung, at kabaan labi tuluk siklang ay at rafad unumk siklang. Dasug katsi, kanya fag fagtiugan siyays Raba, ngay taw Amun at furuan daul.)

Nu Gafud Daga

¹² Gina tam nagbilug kafag talun, nafon au sas Rubin ay sas Gad at ngay kasugfunanan tagsibaliwas Aruer fag alvngvdan munakbang sis Liskung Arnun ay nafon kyangay sik wabilug sis Gilyad at fagagbilugun fag ngay buksul ay at ngay furuan.

¹³ Ay nafon au sa sik gaban Manase fag wabilug kasugfunanan, sik afud talun Gilyad ay fagdaul Basan, Ug at fagagbilugun. (Fagdaul talun Argub sis Basan nafangayan te, ngay taw Refa at daga.)

¹⁴ Yair tagsiginans Manase at kasugfunanan tagagbilug fagdaul talun Argub tagsis Basan, sitsigon ngay taw Gesur ay ngay taw Maaka at fatuan daga. Sanya fagdaul nafangayan siginans Yair at ngayan, nu katanya dasug katsi, gngayan talun Basan te, Yair at ngay furuan.

¹⁵ Ay nafon au sas Makir talanan talun Gilyad.

¹⁶ Nafon au sas Rubin ay sas Gad at ngay kasugfunanan daga siginans Gilyad sitsigon Liskung Arnun. At fatuan sas fawalan baliwa sis wabilug talun Arnun, ay at fatuan sabaliwas fasiunan talun Abuk, si yangay ngay taw Amun at fatuan daga.

¹⁷ At fatuan daga sabaliwas fakayabian datag Urdan, sitsigons Liskung Urdan, ay at ngay fatuan sabaliwas fakamenitan, siginans bunaw Galilea sitsigons Dagat at Mabulan si sik daga buksul Pisga, tagsibaliwas fakamenitan.

¹⁸ Ay ginanya, nasugu au ay ngay iba tagbanwan si baliwas fakamenitan Urdan, dewa ay Dius Yawi nafon ayu sanya fag daga laman ay fagnangagbilugun. Masine ay ngay tagfawayan nu mafalganan glao namawayan, laman nanfangguna ay faduksay fag ngay taw Israel nu gdife Liskung Urdan.

¹⁹ Dewa katanya, famatoi way ay ngay mangena, ay ay ngay sisian, ay anggan ay ngay fagbaugun si ku nafon ayu fag ngay furuan ayu daul.

²⁰ Ay anggan ay kaiban fag ngay Israel nu nagbilug wan tagsis dife Liskung Urdan fag daga, Yawi at nafon anya, afolii wan sa ku nafon ayu fag daga.

Wa Naylat Muisis nu Kadasug sas Kanaan

²¹ Ay ginanya, nalong kyangay sas Uswe te, “Nalag wo ay Dius Yawi at nafakamulun fagayu sanya fag duak fun. Katanya yangay ban at fakamulun sas fagayu fagfagtainanan ay fagnangadasugan.

²² Lag am kalimu anya, aroro ay Dius Yawi tagfawayan laman sa ayu.”

²³ Ay ginanya nafainfanyuan au sas Yawi te,

²⁴ “Fun Dius Yawi, nafasigad wo nafasure am fagmabalyananun sa am taglong, aroro we Dius sis banwa ay sis daga at mafafakamulun at ngay madulo kata am nafakamulun.

²⁵ Nu katanya, aylati nu gdife au Liskung Urdan laman lumag au sanya fag daga at masine; at masine fag ngay buksul ay anggan Lebanun fag ngay buksul.”

²⁶ Dewa katanya, Yawi andotama angku aroro wam nadungugan angku. Kanya nalong te, “Sabv ro, lag o gfakamatoan ya angku sanya baliwa.

²⁷ Nangundaud o sas tungud buksul Pisga ay namanawan o sas fagdaul daga nusnga nday, aroro wa ban o madife Liskung Urdan.

²⁸ Dewa katanya, namoyung o sas Uswe at ngay fakamulun. Namaksvn o at amatanganan aroro kanya ban at nanfangguna kafag ngay taw nu gdife Liskung Urdan. Ay kanya ban namon sa anya fagayu am nalag fag daga.”

²⁹ Nu katanya, naragangan yay tam si sik datag munakbang sis Bet-Peur.