Deuterunumyu 1 - Fanawbuid tagsibaliwas Fakayabian

Yawi Nasugu sa sangay Taw Israel te, Loi wan siginans Buksul Sinay

¹ Katatuy Muisis at foyungan sa sangay taw Israel gina sis talun at yud e taw, sis fakamenitan baliwa Liskung Urdan, at ngayan yangay te, Araba, munakbang sis Suf, sis wabilug ngay furuan Paran, Tufel, Laban, Aserut ay Disaab.

² (Labi sadik menit nu glao siginans Buksul Sinay sas Kades-Barnea, at dalan nu sa tuas Buksul Seir.)

³ Gina taguna fag menit sis falabi sadik magdanun ay at faufatk safuluk banwa siginan ngay taw Israel nu glao siginans talun Igiptu, Muisis nafoyung Yawi at ngay suguan sa sangay taw.

⁴ Anfasludan takatanya gina Muisis nababo Sikun, ngay taw Amur at fun, tagbanwan sis furuan Kesbun, ay Ug, talun Basan at fun, tagbanwan sis furuan Astarut ay Edrei.

⁵ Nu katanya, gina ngay taw Israel sis fakamenitan Liskung Urdan, sis talun Muab, Muisis nafoyung Yawi at ngay longan te,

⁶ Gina tam sis Kureb, Yawi tam Dius nalong antam te, “Glugo wan nu gbanwan am ste fag buksul.

⁷ Nu katanya, loi wan sa sangay taw Amur at talun ke ngay buksul, ay sat ligung fag ngay afud talun; sas datag Urdan, sasad araw, sa sangay buksul tagsabaliwas fakayabian, sas Negeb, ay sa sangay furuan tagsis tigyangan dagat. Loi wan sas Kanaan ay sas Lebanun fag talun, sitsigons liskung daul Eufrates.

⁸ Gfon kban sa ayu kanya fag ngay talun. Loi wan ay nangagbilug am kanya fag ngay talun, ku nafatuyanan sa ay ngay mangaguyang Abrayam, Isak, ay Akub ay sas fagayu at kasugfunanan.”

Muisis Nafili ngay Tagfangguna sas Galay Kasugfunanan

⁹ Ginanya nalong au sa ayu te, “Kwa makatu gfangguna ayu nu sesadi kway.

¹⁰ Ay Dius Yawi nafayu ayu kata ngay galeme.

¹¹ Nangus ay ngay mangaguyang at Dius, Yawi, gfayu ay gfadante ayu kata at fatuyanan.

¹² Dewa katanya, tain ro nu mafasine au ay ngay awayan ay ay ngay fagidapun nu sesadi kway?

¹³ Nu katanya, galay sik gaban filii sik taw at ke fagsafulun, ay at mamatanganan, ay ay fagsuyuun, ay nanfili kban anya fagayu laman namagtainan ayu.”

¹⁴ Ay nabalus am angku te, “Masine am algan.”

¹⁵ Nu katanya, nafafatigwanan au ayu sa ay nafili ay ay fagsuyuun fag ngay taw at ke fagsafulun laman gfagtainan ayu, tiba sas sadik libuk taw, ay tiba sas sadik sandank taw, ay tiba sas limak safuluk taw, ay tiba sas safuluk taw.

¹⁶ Ay ginanya, nasugu au sa kafag ngay tagwabilug te, “Fasinei ngay taw at mamalong, ay matuyani tua nu gfasine am. Bundi lang sa sangay taw Israel nu bunway anggan tua sa sangay taw tagsiginan tibak talun tagbanwan si ay talun.

¹⁷ Lag e fagfili nu gfasine am. Fasudsudani tua nu gdungugan am at maramraman ay at yud e kwa. Lag am kalimu nusnga sinu fag taw aroro fagayu ay longan siginans Dius. Nu maidap way sa ayu kanya fag mamalong, fadasugi sa angku ay au wan tagfasine.”

¹⁸ Ay ginanya nalong au sa ayu ay fagnamakamulunun fagayu.

Kanya Fagayu Nasugu sik ngay Taw at Nanginsaful

¹⁹ Kata Yawi tam Dius at suguan antam, nalao tam siginans Buksul Sinay, ay nalao tam sa ay nalag fag talun tagbia ay at malimu at yud e taw, ay nataglayun tam sa sangay taw Amur at talun at ke ngay buksul. Ay gina tam andasug sas Kades-Barnea,

²⁰ nalong au ayu te, “Andasug watam sa sangay taw Amur at talun ke ngay buksul, tam Dius Yawi at nafon antam.

²¹ Damai at nafon ayu fag daga. Katsi agbilugi kanya fag daga kata ay ngay mangaguyang at Dius Yawi at longan ayu. Lag am kalimu ay kamomuy.”

²² Ankakbang am sa angku, ay nalong am te, “Namasanya yap tam sik ngay taw laman nanginsaful sanya fag daga, laman lumong antam nu dada ban tam dalan ay nu dada ban tam fagnangadasugan fag ngay furuan ayu daul.”

²³ Namatangan au te, masine tua kanya fag algan. Nu katanya, nafili au labi duak taw, sadi galay sik kasugfunanan.

²⁴ Kanya fagayu nalao ay nadalan sa sangay buksul ay andasug sas Liskung Eskul. Ay kanya fagayu nananginsaful sanya.

²⁵ Ay gina kanya fagayu kafoli, e buba sa antam ngay rawvg. Ay nalong antam te, “Yawi at nafon antam fag daga masine tua.”

²⁶ Dewa katanya, wam naylat glao sanya, ay wam nafaning Yawi at suguan.

²⁷ Gina am si ay mesa bale ramit nafanlongan am te, “Yawi kadotama antam, at fagnafaloun antam siginans talun Igiptu laman namon sa sangay taw Amur, laman namabul antam.

²⁸ Tain ro nu masanya tam? At nananginsaful sanya fag daga nafalimu way antam. Kanya fagayu nalong te, ‘Sanya fag ngay taw amabitsug yap ay abat yap tua antam. Ay at ngay furuan gbia tua ayu daul ay maligung dingding alad tangabat arvs gdasug sas banwa, ay kanya fagayu nalag yangay sanya tagbia fag ngay taw.’ ”

²⁹ Sanya ginan, nalong au ayu te, “Lag am gafanawa, ay lag am kalimu kafag ngay taw.

³⁰ Ay Dius Yawi at namangguna ay at namawayan laman sa ayu, kata ay nalag at nafakamulun sis talun Igiptu.

³¹ Ay nalag yangay am, ay Dius Yawi nu gufud ayu gina am sit yud e gbanwan fag talun. Kanya naulit ayu kata sik mama nu gulit at ngay sisian, yakmay am andasug sanya fag talun.”

³² Dewa katanya, wam nafanud sa ay Dius Yawi.

³³ Gina am glao, kanya nafangguna ayu, siginans afuy gina mayabi ay sik linyabu gina mamenit. Ay kanya narvbvy yay ay fagmafulan, ay nafoyung ayu ay dalan.

^34-35 Yawi nu nadungug nu kamayud am, kanya ankuri ay nalong te, “Nusdi sadi ste ginan fag kasugfunanan wa ban lumag at masine fag talun ku nafatuyanan sat ngay mangaguyang.

³⁶ Kaleb, Efune at baguama, kanya tua ban at lumag. Gfon kban sa anya ay sat kasugfunanan tuy fag daga, aroro kanya nafaning angku sas fagdaul at amatanganan.”

³⁷ Siginan ayu, Yawi ankuri yangay angku. Nalong angku te, “Anggan ban o wo madasug sanya fag talun.

³⁸ Dewa katanya, am fagsuguan Uswe, Nun at baguama, at madasug ban sanya. Fabitsugi anya aroro sia ban at nanfangguna ngay taw Israel laman nangago kanya fag daga.”

³⁹ Sanya ginan, Yawi nalong te, “Ay ngay sisian ban at yud yay e fagsafulun at madasug sanya fag daga, ay kalimu am te, kanya ban fagayu manatabanan, dewa katanya, gfon kban sa anya fagayu kanya fag daga, laman at fagagbilugun.

⁴⁰ Ay am ban kafoli wayam sat yud e gbanwan fag talun, sas dalan tagsas Dagat Maraska.”

⁴¹ Ay nalong am te, “Nasalan ami sas Yawi. Nanlao ami ay namawayan kata Yawi at suguan emi.” Nu katanya, nafalganan am ay ngay famawayan ay gamatangan am te, mafaago am masakit ngay buksul.

⁴² Dewa katanya, Yawi nalong sa angku te, “Longi sanya fagayu te, ‘Lag yap glao ay namawayan, aroro kwa nangalo ayu, ay gababawan way ngap ro am ay ngay fawayan.’ ”

⁴³ Ay nalong koma ayu, ay wam nafandungug. Ay wam nafaning Yawi at suguan, ay nafamatungudun am nalao sa sangay buksul laman namawayan ay ngay fawayan.

⁴⁴ Ay ngay taw Amur tagbanwan sanya fag ngay buksul nafawayan ayu. Ay kanya fagayu kata sik ngay kakin ay nafafalo ayu siginans Seir sitsigons Kurma, ay nababo ayu.

⁴⁵ Anfoli am gwayway sas Yawi, dewa katanya, kanya wa nadungugan ay wa nabalus ayu.

⁴⁶ Kanya wan ay fagnabanwanun ngaduge sis Kades.