Daniel 9 - Fanawbuid tagsibaliwas Fakayabian

Daniel Nandarangin laman sa sangay Taw Israel

^1-2 Daryu fag taw Medya, Akasuerus at baguama, ebi talun Babilunya at fun. Gina taguna fag banwa nu gfunan, nasaful au siginans Dius at Longan te, at kadugean Erusalem nu marasrasan fituk safuluk banwa, kata Yawi at longan sas Eremyas fag taglong.

³ Nu katanya, ankakbang au sas Fun Dius ay kwa nafangon laman gdarangin, ay nasulun au saku ay nafasa ku alfuyu dafug laman gfalag te, kabalu.

⁴ Katatuy ku nalong gina au gdarangin sas Yawi ku Dius ay get au famawakalong sa em ngay asalanan: “Em Fun, o sik mabalyanan ay madulo fag Dius. Gfafasludan o am nasadian, ay kesug o takesug emu ay tagfaning am ngay suguan.

⁵ “Anke asalanan ami sa emu. Nafakamulun ami at mauri ay wami nafaning am ngay suguan ay am ngay faugali.

⁶ Wami nadungugan am ngay fagsuguan fag ngay taglong am nasugu laman namakamatoan em ngay fun, em ngay tagfangguna, em ngay mangaguyang, ay fagayu taw Israel.

⁷ “Em Fun, matuyan tuo, dewa katanya, dasug katsi tagsi emi fakaplaun way. Anggan ngay taw Uda ay Erusalem, ay anggan fagayu taw Israel am nafarapyagan sa sangay talun at munakbang ay tangayayu aroro nafamabo emu.

⁸ Yawi, maksvn nu kapla ami, anggan em ngay fun, em ngay tagfangguna, ay em ngay mangaguyang aroro anke asalanan ami sa emu.

⁹ Dewa katanya, em Fun Dius mafangafanyu tuo, ay gfalyam tuo em fagmauriun dewa ami nafamabo emu.

¹⁰ Yawi em Dius, wami nafaning am ngay suguan siginan am fagsuguan fag ngay taglong.

¹¹ Fagayu taw Israel wa nafaning am faugali; kanya fagayu wa kaylat gfaning am longan. “Aroro sa em ngay asalanan, andasug sa emi sik faurianan kata at marirukan sim fagsuguan Muisis at Faugali.

¹² Nafafasludan o am ngay longan sa emi ay sa em ngay tagfangguna siginan nu gfaurianan o emi maksvn. Nu katanya, sas fagdaul daga wa batang e kaksvn Erusalem at nadalan.

¹³ Anfasludan sa emi kanya fag faurianan kata at marirukan sis Muisis at Faugali. Ay dewa ndasug sa emi takatanya, wami naugatan laman guseganan tuo emi siginan nu gubun ami em ngay asalanan ay nu gafanud ami sa emu.

¹⁴ Nu katanya, nafaurianan o emi, ay nafakamulun takatatuy aroro fagayu am fakamulun matuyan. Dewa katanya, wami nafaning emu.

¹⁵ “Em Fun Dius, nafalag o am fagmabalyananun gina o gfalfas am ngay taw siginans talun Igiptu. Nu katanya, dasug katsi kadungug tuo gugat. Gafanud ami te, nasalan ami ay nafakamulun ami at mauri.

¹⁶ Em Fun, matuyan tuo, nu katanya gfainfanyuan au te, falyami wan nu kadotama o Erusalem, am nafili fag furuan ay fag buksul at yud e malong. Aroro siginan em ngay asalanan ay anggan em ngay mangaguyang at asalanan, ngay taw si em ngay ligung gfalingun Erusalem ay emi am ngay taw.

¹⁷ “Em Dius, dungugani ku darangin ay ku fagetun. Aroro sa am ngayan, dogi awati am bale em nafabayan.

¹⁸ Em Dius, dungugi angku. Damai, maksvn nu gidapan ami. Wami gdarangin laman gfatoglag ami te, matuyan ami, nu bunway gfasaful ami te, mafangafanyu tuo.

¹⁹ Em Fun, dungugi emi, ay falyami em asalanan. Gubuki emi masakit aroro sa am ngayan, aroro gagbilug o am furuan daul ay am ngay taw.”

Gabriel Nafayamag Taginfan at Masuad

²⁰ Gfataglayun au gdarangin ay get famalyam laman sa ku ngay asalanan ay sa ku kaiban fag ngay taw Israel at ngay asalanan. Nafainfanyuan au sas Yawi laman sat yud e malong fag buksul.

²¹ Ay kaduge au gdarangin, anfasludan kata ku nalag ebi sa ku taginfan, Gabriel masakit nu glayug ay andasug sa angku. Ginanya fag buknga, gfon fanggalangun sfafun.

²² Kanya nafakamatoan angku ay nalong te, “Daniel, nastie au laman gfayamag sa emu am taginfan.

²³ Siginan yay nu gfasigad o gdarangin, Dius e nafoyung wan sa angku, ay nastie au laman namoyung au sa emu, aroro Dius kesug emu. Nu katanya, dungugani ay amatangani ku longan sa emu.

²⁴ “Dius nafalganan ufatk sandan siamk safuluk banwa sam furuan at yud e malong ay sa sangay taw laman gfaragang nu kamabo Dius, ay laman gfalyam at ngay asalanan, ay laman kae fagmatuyanun kabavn, ay laman gfafasludan ngay taginfan ay ngay foyungan, ay laman gdog namatigwanan Dius at bale.

²⁵ “Asafuli ay atogdungugi te, kalangfe yay ban ufatk safulu e siamk banwa siginan nu e nalong te, awati Erusalem ay yakmay ban andasug Dius at nafili fag tagfangguna. Ay kawat ban furuan Erusalem, ay at ngay fagaweanan, ay sik alian sit ligung furuan ke mamam, kaduge ufatk sandan tuluk safulu e ufatk banwa. Ay ginanya ban, wa mabayan.

²⁶ Ay nu nlangfe ban ufatk sandan tuluk safulu e ufatk banwa, e gfabul ban Dius at nafili fag Fun ay wa ban e ggubuk ya anya. Kafag tagfangguna at ngay fagsuguan nangiklas furuan ay Yawi at bale. Dewa katanya, umdasug ban masakit at fakatabuan kata tagbia fag lugwak. Dius nafalganan te, gfataglayun ban nu e awayan ay nu giklas anggan sas fakatabuan.

²⁷ Ay kanya ban fag tagfangguna kawat sik maksvn fag nasadian laman sa sangay taw kaduge fituk banwa. Dewa katanya, nu nlangfe ban tuluk banwa ay unumk magdanun, kanya ban gfaragang wan nu gfon fanggalangun sis Yawi at bale ay kanya ban namasakbo sanya at mauri fag fagagbilugun tagfayud e masuad at bale. Ay kanya ban gbanwan sanya yakmay andasug Dius at nafalganan fag buknga laman sa kafag tagfangguna at fakatabuan.”