Daniel 8 - Fanawbuid tagsibaliwas Fakayabian

Daniel at Nalag sabaliwas Tupa ay Kambing

¹ Gina sis fatuluk banwa fun Belsasar nu gfunan, nadog au e nalag.

² Ku nalag, malindug au sis tigyangan Liskung Ulay, sit ke alad fag furuan Susa sas Elam fag afud talun.

³ Nalag au sik tama tupa malindug sis tigyangan liskung. Ay kanya e duak tangaba fag sunge, ay wa glugo, at sunge taguyan gtugbung ankaba, aba yap tua at sadi.

⁴ Nalag au tuy nu gsunge nusnga nday fag furuan. Nusnga setaw fag fagbaugun we mafaragang anya ay we malagyu. Ay kanya mafafakamulun at fakaylatun, nu katanya, kanya anke fagmabalyananun.

⁵ Ay kaduge au gdama, sik kambing andasug siginans fakayabian. Kafag kambing kafagdaul sas fagdaul daga ay at kasakitan nu gtarung, at darafa wa gtayuk ya daga. Ay e sunge sit dua mata at wabilug.

⁶ Ay sas fagdaul at fagmabitsugun kanya nadalusung at ke duak sunge fag tupa at malindug sis tigyangan liskung.

⁷ Ay at kaksvnan nu kadotama, nasunge ay kafag tupa at sunge fagdua an-gatvng. Ay tupa wa mafawayan ya ay antangda, nu katanya, kafag kambing nasiad anya. Ay we makatu ya ggubuk kafag tupa.

⁸ Kafag kambing ankaksvn nu mabalyanan. Ay gina at fagmabalyananun gakatabuun at sunge an-gatvng. Dewa katanya, nalag au ufatk sunge daul masakit natugbung ay galay at sadi gtiu sas ufatk fugungan daga.

⁹ Sit sadi fag ufatk sunge e natugbung sik sunge sirut. Kanya fag sunge sirut anke fagmabalyananun sas fakamenitan ay sas fasiunan fag alvngvdan, ay sas Israel fag daga at masine.

¹⁰ Ay ankaksvn yay at fagmabalyananun ay andasug sas kiwang, ay kanya nafatong tibak awatan tagsis banwa ay anggan ngay galeme, ay kanya nasiad at nafatong fag ngay awatan.

¹¹ Kanya natuyan at sadili te, amabalyanan yap tua tagfangguna ngay awatan sis banwa. Nu katanya, kanya nafaragang nu gfon fanggalangun ay nafauri Yawi at bale.

¹² Sa takatanya at nafakamulun, nafatigwanan sa anya fagayu awatan tagsis banwa ay kanya nafaragang nu e gfon fanggalangun kayu menit, ay nababo sas fagayu at fakamulun.

¹³ Ay nadungug au duak tagbarita nu gkamatoan. At sadi nainto te, “Seduge ban nu yud gfon ya fanggalangun kayu menit, ay nu gfauri Yawi at bale, ay nu grasras tagsis banwa fag ngay awatan, kata kafag taginfan?”

¹⁴ Ay at sadi fag tagbarita nabalus te, “Kafasludan ban takatanya fagayu kaduge duak libu tuluk sandank balabag ay fafun, ay sanya ginan ban gdog yay namasine Yawi at bale.”

Gabriel Nafayamag kafag Taginfan at Masuad

¹⁵ Kaduge au gdama ku nalag ay gamatangan at masuad, masakit anlindug sa ku daga salubangan sik takata sik taw.

¹⁶ Sanya ginan, e nadungug au sik aringang siginans Liskung Ulay glong te, “Gabriel, fayamagi sa anya at taginfan at masuad.”

¹⁷ Gina Gabriel ankakbang sa angku, anlimu au maksvn ay anlub. Dewa katanya, kanya nalong sa angku te, “Daniel, masine nu kasaful o te, am taginfan at masuad sabaliwa fagdaul daga nu katabu.”

¹⁸ Kaduge kanya gfakamatoan angku, kwa gamatang ya ku bilug ay anlub au sas daga. Dewa katanya, kanya nated ku take ay nafalindug angku.

¹⁹ Ay kanya nalong te, “Namoyung au emu takafasludan gina ban Dius nafadasug at dotama, aroro kanya nafalganan wan taguyan fag buknga.

²⁰ Kafag tupa at sunge fagdua gfafaskudanan sas Medya ay Persya.

²¹ Ay kafag kambing gfafaskudanan Gresya at fagfagtainanan, ay at sunge daul tagsit buknga mata gfafaskudanan taguna ban fag fun.

²² Ay at natugbung fag ufatk sunge gina an-gatvng taguna fag sunge, kanya gfafaskudanan sas ufatk fagfagtainanan sis Gresya gina kanya fag talun ankafud. Dewa katanya, kafag ufatk fagfagtainanan at ngay fun wa kata at naguna fag fun e fagmabalyananun.

²³ “Ay gina ban kanya fag ngay fun gakatabuun nu gfunan, ay gina ban maksvn at fagmauriun, umke fun ban at madot ay at mauri.

²⁴ Kanya ban umsik mabalyanan, dewa katanya, bunwa siginan at sadili fagmabalyananun. Ay kanya nu grasras, malimu, ay kanya ban at fakamulun fagayu umfasludan. Ay gfabul ban at ke fagmabalyananun fag ngay taw anggan Dius at ngay taw at yud e malong.

²⁵ Aroro sat fagmakatuun, kanya ban gbabo sat fakamuagun. Ay kanya ban kamanagsag ay we mafaragang anya nu gfabul ngayuk taw. Ay gfawayan ban anggan ngay tagfangguna at funan. Dewa katanya, e gfaurianan ban anya bunwa siginans taw at fagmabalyananun nu bunway Dius tua at fagmabalyananun.

²⁶ “Daniel, matuyan am nalag sabaliwa nu gfaragang nu gfon fanggalangun sis balabag ay sis fafun. Dewa katanya, lag yap o glong aroro ngaduge yay ban nu kafasludan.”

²⁷ Sanya ginan, au Daniel anke fakasaitun au nu seyuk menit. Ay nu nfia au, anfoli au sas fun at nafon angku fag fakamulun. Dewa katanya, gamatangan kyay gugat ku nalag aroro kya nasaful at masuad.