Daniel 6 - Fanawbuid tagsibaliwas Fakayabian

Nafatong Daniel sas Fagubungan ngay Liun

¹ Fun Daryu nafili sik sandan duak safuluk fun ayu sirut laman gfangguna sas fagdaul at fagfagtainanan.

² Kanya fag ngay fun ayu sirut siways tuluk tagfangguna at daga fagmabalyananun, at sadi si kafag tuluk tagfangguna, Daniel. Fun Daryu nafakamulun takatanya laman di gadayan.

³ Daniel natungud tua at duama aroro siginan at madulo fag fagmakatuun. Ay nu katanya, fun at algan nanfili anya laman tagfangguna sas fagdaul at fagfagtainanan.

⁴ Ay Daniel at ufud fagdua ay kafag ngay fun ayu sirut maksvn nu galabian anya. Nu katanya, kanya fagayu grvbvy Daniel at fakamulun at yud kasakan laman at fanlonganan sabaliwa anya. Dewa katanya, kanya fagayu we nalag Daniel at kakurangan aroro matuyan tua ay sik fagfatigwanan.

⁵ Kanya fagayu nalong te, “Watam e fagmafantabuganun ya sa anya, nu dway sabaliwa at Dius at faugali.”

⁶ Nu katanya, kanya fagayu nalao sas fun Daryu ay nalong te, “Em fun, gleleg tua ban o nangus kabavn!

⁷ Ami am ngay tagfangguna sam fagfagtainanan ansadi ami get sa emu te, awati ay faksvni sik faugali te, kaduge tuluk safuluk menit we taw gdarangin sas nusnga setaw fag dius ay mannga sas taw nu bunway sa yakman lang emu. Ay nusnga sinu ban at yud nafaning tuy fag faugali, gaukasan ban sas fagubungan ngay liun.

⁸ Nu katanya, mesug fag fun, awati wan takatanya fag faugali. Fariruki ay faksvni laman wa kabali ay we mafayud e masuad kata Medya ay Persya at faugali.”

⁹ Ay Fun Daryu naylat kafagayu at fagetun, ay kanya nafaksvn kafag faugali.

¹⁰ Ay Daniel nu nasaful te, fun Daryu nawat wan kafag faugali, kanya noli sat bale ay nasakbo sa tiba tungud fag salug. Sanya at fagbanawanan gsalubang sas Erusalem. Ay Daniel natudan ay gdarangin sas Dius tulu ginan sik menit, kata at fakamulun gugat.

¹¹ Ay kafag ngay tagfangguna nalag Daniel nu gdarangin ay nu get gubuk sas Dius.

¹² Nu katanya, kanya fagayu nalao sas fun Daryu ay nalong te, “O nunda wo nafawat sik faugali te, kaduge tuluk safuluk menit we taw gdarangin sa tibak dius nu bunway sa yakman lang emu? Ay nusnga sinu fag taw at nafamabo gaukasan sas fagubungan ngay liun?” Fun nalong te, “Sabv, wa kabali ay we mafayud e masuad kata Medya ay Persya at faugali.”

¹³ Kanya fagayu nalong sas fun te, “Daniel, at sadi at natabanan siginans Uda, wa gfaning am faugali. Kanya gdarangin tulu ginan galay menit.”

¹⁴ Ay fun Daryu nu nadungug takatanya, kanya gafanawa ay kaylat ggubuk Daniel. Fagngabak menit kanya grvbvy sik balyawvtan laman gfalangfe Daniel.

¹⁵ Ay kafag ngay tagfangguna gdog yay anful ay nalong sas fun te, “Mesug fag fun, saful wo te, kata Medya ay Persya at faugali wa masine gfabali sik fun at nawat fag faugali.”

¹⁶ Nu katanya, fun nasugu laman nanggamat Daniel ay namatong sas fagubungan ngay liun. Ay fun nalong sas Daniel te, “Am fagsegan fag Dius gfalangfe ro nangus emu.”

¹⁷ Sanya ginan, naukas Daniel sas fagubungan ngay liun ay nasuklub sik tagbia fag gang, ay fun ay at takadungug fag ngay taw nafae fakasafulan sanya fag fanuklub siginan fun at fanumyu laman we mananluab.

¹⁸ Sanya ginan, fun Daryu noli wan sat bale. Ay ginanya fag yabi kanya wa gfangon ay wa yangay get famasun ay wa katiug.

¹⁹ Ay nu gakamenitun wan, fun masakit nalao sas fagubungan ngay liun.

²⁰ Ay kanya nu ndasug sanya, mabaluanan guro te, “Daniel, tagleleg fag Dius at fagsuguan, o Dius nafalangfe tua emu sis wa liun?”

²¹ Ay Daniel gbalus te, “Mesug fag fun!

²² Ngay liun wa nagat angku, aroro Dius nasugu at tagbarita laman namafagum ngay liun at bibig. Dius nafakamulun takatanya aroro saful way te, masine ku fakamulun ay kwe nafakamulun mauri sa emu.”

²³ Fun nu nadungug takatanya, guseganan ay nasugu te, “Faduksuni Daniel siginans fagubungan.” Ay kanya fagayu we nalag nusdi sik magarasan sirut sit bilug aroro Daniel gafanud sas Dius.

²⁴ Fun Daryu nasugu laman fagayu taw at nalong mauri sas Daniel gagamatan ay gfatong sasad fagubungan ngay liun gfadgaloan at mesa mangena ay at ngay sisian. Ay kanya fagayu nu nafatong sasad fagubungan, gina yay yud andasug sat daga, ngay liun nayukfu wa vtv ay naon.

²⁵ Sanya ginan fun Daryu nariruk sas fagayu gaban taw sas fagayu talun sas fagdaul daga, tagsaman at ngay fangaringang te, Manabayan tuam nangus.

²⁶ Gsugu au sa sangay taw tagsi ku fagfagtainanan te, fagayu nangus taw alimui tua ay suyui Daniel at Dius. Aroro kanya tagleleg tua fag Dius ay tagleleg tua kabavn. Kanya nu gfunan we fakatabuan ay we mababo anya.

²⁷ Kanya gfalangfe ngay taw ay gfakamulun ngay madulo sas banwa ay sas fagdaul daga. Ay kanya nafalangfe Daniel sa sangay liun.

²⁸ Kaduge fun Daryu gfunan ay anggan gina fun Sirus fag taw Persya gfunan, Daniel manabayan tua.