Daniel 5 - Fanawbuid tagsibaliwas Fakayabian

Belsasar at Nafalganan fag Fagmafulun

^1-3 Gina Belsasar at fun sis Babilunya, kanya nafalganan sik tagbia fag fagmafulun laman sat nafili fag sadik libuk takadungug fag ngay taw. Kaduge kanya fagayu ginum fanlangu, Belsasar nasugu sat ngay fagsuguan laman namul ngay taya at mawatan siginans gintu ay sanbung salapi, at mama Nabukudunusur at nabul siginans Dius at bale sis Erusalem, laman Belsasar ay takadungug fag ngay taw, ay at ngay mangena, ay tiba yak fagsuguan fag mangena at faginuman. Nu nabuba wan kanya fag ngay taya, kanya fagayu nainum sanya ginan.

⁴ Ay kaduge ginum, kanya fagayu gseg ngay fagsegan at mawatan gintu, salapi, tansu, sanbung, kayu ay gang.

⁵ Arodi vtv, fun Belsasar e nalag sik daluap tagriruk sit bale daul at dingding munakbang sis fagfatungkudan salung.

⁶ Ay fun narinun, ay at tud natadtaruyan nu kalimu.

⁷ Kanya nauro at ngay tagfangufit, tagfangalga siginans galeme ay taginsaful. Kanya fagayu nu ndasug, fun nalong sa anya fagayu te, “Nusnga sinu tua ro at matap at marirukan sis dingding ay at mafayamag at masuad, gfasulun kro sa anya sik lanbung at masine ay sik dalag at mawatan siginans gintu. Ay gfili kro anya laman at fatuluk tagfangguna si ku fagfagtainanan.”

⁸ Nu katanya, kanya fagayu ankakbang laman nantap at marirukan sis dingding. Dewa katanya, we makatu gtap ay wa yangay e malong sas fun at masuad.

⁹ Nu katanya, fun Belsasar anlimu ay kaugat nu gtadtaruy. Ay takadungug fag ngay taw wa saful ya at fagnamakamulunun.

¹⁰ Fun at mina nu nadungug fun ay takadungug fag ngay taw nu garingang, ankakbang sa anya fagayu sis fagfangonan ay nalong te, “Mesug fag fun, lag o kalimu ay gafanawa,

¹¹ aroro e sik taw ste sim fagfagtainanan tagsi anya ngay dius at falad. Ebi gina am mama Nabukudunusur gfunan, kanya fag taw nafalag at fagsafulun takata ngay dius at fagsafulun. Am mama nafili anya sik tagfangguna sa sangay tagsaful gfasure at ngay madulo, tagfangufit, tagfangalga siginans galeme ay taginsaful.

¹² At ngayan Daniel, am mama at nafangayan yangay te, Beltesasar. Kanya e madulo fag fagmakatuun ay fagsafulun. Kanya e fagsafulun gfayamag ngay taginfan, ay saful glong at masuksuk fag ngay longan at masuad, ay saful gfasine at maidap fag ngay malong. Nu katanya, fauroi anya ay kanya ro gfayamag at marirukan sis dingding.”

¹³ Ay e nataban Daniel sas fun, ay fun nainto anya te, “O Daniel o, ku mama at natabanan at sadi fag taw Udyu siginans Uda?

¹⁴ Nasaful au te, si emu ngay dius at falad ay e fagsafulun o ay mamatanganan.

¹⁵ Nafauro au ku ngay tagfangatulun anggan tagfangufit laman nantap ay namayamag at marirukan sis dingding, dewa katanya wa nakatu.

¹⁶ Ay nadungug au te, saful o gfayamag at ngay masuksuk ay makatu o gfasine ngay malong. Nu nasaful tua ro wo gtap at marirukan sis dingding ay nafayamag at masuad, gfasulun kro sa emu sik lanbung at masine ay sik dalag at mawatan siginans gintu. Ay gfili kro emu laman at fatuluk tagfangguna si ku fagfagtainanan.”

¹⁷ Ay Daniel gbalus te, “Em fun, lag ro gfon ya sa angku famangsi; foni way ro sa tiba. Dewa katanya, nantap kro at marirukan sis dingding ay gfayamag au sa emu.

¹⁸ “Em fun, am mama Nabukudunusur Tiba Tungud fag Dius at nafili fag fun. Kanya anke fagmabalyananun ay ngay taw nafauseganan anya.

¹⁹ Aroro sat nafon anya fag fagmabalyananun, fagayu gaban taw sas fagayu talun sas fagdaul daga, tagsaman at ngay fangaringang anlimu anya. Ay kanya gfabul nusnga sinu fag taw at fakaylatun gfabul, ay wa gfabul at fagyudun kaylat gfabul, ay gfae fanambagun at fakaylatun fag taw, ay gfayud e fanambagun at fakauriun fag taw.

²⁰ Dewa katanya, kanya nafamanagsag ay nafamatungudun, nu katanya, Dius naiyan anya siginan at fagfagtainanan,

²¹ ay nafayayu siginans ngay taw. At amatanganan kata sik fagbaugun at amatanganan. Kanya nabanwan gfadgaloan at mela fag ngay asnu, ay kata baka, kanya kon bariri, ay damug gfabasa anya, yakmay kanya natoglag te, Tiba Tungud fag Dius at ke fagmabalyananun sa sangay fagfagtainanan, ay at ke fagmakatuun gfasik funan nusnga sinu at fakaylatun.

²² “Fun Belsasar, Nabukudunusur at baguama, nasaful oma o takatanya fagayu, ay wo kamababaun,

²³ abat ngate, nalong way o te, gtungud tuo tagsis banwa fag Fun. Nasugu o laman namul ngay taya tagsis Yawi at bale, ay nainum am fanlangu sanya ginan, o, ay am takadungug fag ngay taw, am ngay mangena, ay tiba ya am ngay mangena fag ngay fagsuguan. Saman kanya, naseg o tibak fagsegan at mawatan sanbung salapi, gintu, tansu, sanbung, kayu ay gang. Kafag ngay fagsegan wa glag, ay wa gdungug, ay we fagsafulun. Dewa katanya, wo nafauseganan Dius tagbakvd am leleg ay am ngay fakamulun.

^24-25 Nu katanya, Dius nafadasug tuy fag daluap laman griruk takatatuy fag ngay longan: Mene, Mene, Tekel, Parsin.

²⁶ “At masuad: Mene: Dius natap at sawad fag ngay menit nu gfunan o ay nafatabu wan.

²⁷ Tekel: Dius nafabudbungguan emu ay natuyan te, nakurang o.

²⁸ Parsin: am fagfagtainanan ban kaduak afud ay gfon sa sangay taw Medya ay Persya.”

²⁹ Sanya ginan, fun Belsasar nasugu te, “Fasuluni sas Daniel sik lanbung at masine ay sik dalag at mawatan siginans gintu.” Ay fun nafili anya laman at fatuluk tagfangguna sit fagfagtainanan.

³⁰ Ay ginanya fag yabi, e nafabul Belsasar, Babilunya at fun,

³¹ ay Daryu fag taw Medya, natubus anya laman sik fun. Ay ginanya, kanya unumk safulu e duak banwa.