Daniel 4 - Fanawbuid tagsibaliwas Fakayabian

Fun Nabukudunusur at Faufatk Taginfan

¹ Fun Nabukudunusur nawat sik fansulitan laman sas fagayu gaban taw sas fagayu talun sas fagdaul daga, tagsaman at ngay fangaringang. Katatuy at rirukan: Sumawa nangus fia ayu at masine fag kayaunanan.

² Kaylat au gfasaful sa ayu Tiba Tungud fag Dius at nafakamulun sa angku fag ngay madulo.

³ Maksvn nu madulo ay mabalyanan at nafakamulun. Kanya nu gfunan we fakatabuan.

⁴ Ste si ku bale manabayan tua nu gbanwan au ay kdi e fagayudanun.

⁵ Dewa katanya, nataginfan au at malimu wa malimu ay gfafanawa angku.

⁶ Nu katanya, nasugu au te, tabani sa angku fagayu tagfangatulun sis Babilunya laman gfayamag ku taginfan at masuad.

⁷ Ngay tagsaful gfasure at ngay madulo, tagfangufit, tagfangalga siginans galeme ay taginsaful ndasug, ay nafansulit au sa anya fagayu ku taginfan, dewa katanya, wa mafayamag.

⁸ Ay sanya ginan, Daniel ankakbang sa angku. (Nafangayan anya te, Beltesasar kata ku dius at ngayan. Si wa anya ngay dius at falad.) Ay nafansulit au sa anya ku taginfan.

⁹ Nalong au anya te, “Beltesasar, saful au te, si emu ngay dius at falad ay masakit o gfayamag at madulo. Longi sa angku ku taginfan at masuad.

¹⁰ Kata tuy ku nalag gina au gtiug: nalag au sik fun kayu ngabat tagsis wabilug fagdaul daga.

¹¹ Kanya anbia ay ankabat ay andasug sas banwa ay kalag sas fagdaul daga.

¹² Masine at ngay don ay ngayu at rawvg, fagayu tagleleg at fakonun. Ngay mela gsarirung sanya ay ngay manuk tungud gfugad sat ngay sanga. Ay fagayu tagleleg sanya ginan wan nu gbul at fakonun.

¹³ Ay nalag kyangay sik tagbarita naduksun siginans banwa.

¹⁴ Kanya nauro te, ‘Fuani kanya fag fun kayu ay lifungi at ngay sanga. Buli at ngay don ay ukasi at ngay rawvg. Ay sabugi ngay mangilafang tagfalanbung sanya ay ngay manuk tungud tagfugad sit ngay sanga.

¹⁵ Dewa katanya, fabayani wan kafag tud sis daga, at masiukan sanbung ay tansu. Damug ban gfabasa anya ay kanya ban gfadgaloan ngay mangilafang sis wa makmak.

¹⁶ Kaduge ban fituk banwa kanya fag taw umkalyam at amatanganan, ay umkata sik mangilafang at amatanganan.

¹⁷ Katanya tagbarita at nalong fag faurianan laman fagayu taw sumaful te, Tiba Tungud fag Dius e fagmabalyananun sa sangay taw at ngay fagfagtainanan. Ay kanya gfon kafag ngay fagfagtainanan sas nusnga sinu at fakaylatun, ay dewa sat yud e kwa.’

¹⁸ Au, fun Nabukudunusur, nataginfan au takatanya. Beltesasar, katsi get au emu te, fayamagi sa angku ku taginfan at masuad aroro we tagfangatulun si ku fagfagtainanan at mafayamag. Dewa katanya, mafafayamag tuo aroro siwa emu ngay dius at falad.”

Daniel Nafayamag kafag Taginfan at Masuad

¹⁹ Daniel (at ngayan yangay te, Beltesasar) nafanawa ay anlimu nu nadungug fun at taginfan. Nu katanya, fun Nabukudunusur nalong te, “Beltesasar, lag o kalimu ku taginfan.” Beltesasar gbalus te, “Mesug fag fun, sa way ban nangus am ngay fawayan tuy nu kafasludan.

²⁰ Am taginfan fag fun kayu at kinbia ay at kinkabat ay at kindasug sas banwa takalag sas fagdaul daga,

²¹ at ke ngay don masine ay tangayu at rawvg fagayu tagleleg at fagnangonun, ay ngay mela at fagsarirungan ay ngay manuk tungud at fagfugadan sit ngay sanga,

²² o wan kafag fun kayu, mesug fag fun. Aroro ansik mabalyanan o. Am fagmabalyananun andasug sas banwa ay am fagagbilugun andasug nusnga nday fag fungfung daga.

²³ Ay nalag yangay o, sik tagbarita siginans banwa at kindasug stae laman nanguro te, ‘Fuani kafag fun kayu, dewa katanya, fabayani way lang sanya at tud masiukan sanbung ay tansu. Ay kanya fag fun kayu sik fafaskudanan sa sik taw takabasa ban damug ay takon gadgaloan tagsis talun fag ngay mangilafang kaduge fituk banwa.’

²⁴ Mesug fag fun, katatuy am taginfan at masuad, sabaliwa Tiba Tungud fag Dius at algan sa emu:

²⁵ Dius ban gaiyan ay gfayayu emu siginans ngay taw ay gbanwan ban o sasad araw gadgaloan tagsis talun fag ngay mangilafang. Kata ban o ngay baka kon bariri, ay damug ban gfabasa emu. Ay nu nlangfe ban fituk banwa, tumoglag ban o te, Tiba Tungud fag Dius e fagmabalyananun sa sangay taw at ngay fagfagtainanan, ay mafagbilug sas nusnga sinu.

²⁶ Ay nu saman baliwa tagbarita at longan te, fabayani at tud ay at ngay lalid, kanya at masuad te, gfafoli yay ban sa emu am fagfagtainanan nu gtoglag tua ban o te, Dius tagfunan sas fagayu.

²⁷ Nu katanya, mesug fag fun, dungugani ku ngay fangatulun sa emu: faragangi wan am fagmauriun, ay fakamuluni at matuyan ay afanyui at ngay tagidapan. Nu nafakamulun tua ban o takatanya fagayu, manabayan tua ban o gugat.”

²⁸ Takatanya fagayu anfasludan sas fun Nabukudunusur,

²⁹ ay nu nlangfe sadik banwa siginan Daniel nu gfayamag fun at taginfan, katatuy at kinfasludan: kaduge fun Nabukudunusur gfanloan sit tungud bale daul sis furuan Babilunya,

³⁰ kanya nalong te, “Anud, Babilunya sik mabalyanan ay sik masine fag furuan daul ku nafawat siginan ku fagmabalyananun laman gfauseganan angku.”

³¹ Ay ya ntabu nu garingang, e sik aringang siginans banwa glong te, “Fun Nabukudunusur, dungugani: nabul kwan siginan emu am fagmabalyananun nu sik fun o.

³² Gaiyan kwan emu siginan am fagfanggunaun fag ngay taw ay namabanwan au emu gadgaloan tagsis talun fag ngay mangilafang. Ay kata ban o ngay baka, kon bariri. Ay nu nlangfe ban fituk banwa, tumoglag ban o te, Tiba Tungud fag Dius e fagmabalyananun sa sangay taw at ngay fagfagtainanan, ay gfagbilug sas nusnga sinu.”

³³ Ay anfasludan takatanya fagayu sas fun Nabukudunusur. Dius naiyan anya siginan at fagfanggunaun fag ngay taw ay kanya kata sik baka kon bariri. Ay damug nafabasa at bilug ay at ngay sigyu ankaba kata sik bio at sigyu ay at ngay u kata sik manuk tungud at ngay u.

³⁴ Nu nlangfe fituk banwa, au, Nabukudunusur, ankakbang au sas Dius, ay kanya nafafoli sa angku ku amatanganan at masine. Nu katanya, naseg au ay nafauseganan anya, Tiba Tungud ay tagleleg kabavn fag Dius. Ay nalong au te, Kanya gfagtainan kabavn ban, ay at fagfagtainanan gfataglayun ban sas fagayu kasugfunanan.

³⁵ Nu gfaladlabian sa anya, fagayu taw sas fagdaul daga kata way nu yud e masuad. Kanya gfakamulun kata at fakaylatun sa sangay tagbarita sas banwa ay sa sangay taw sas wa daga. We mafafaragang anya, ay we mafafalong sa anya te, “Wain am fagnafakamulunun takatanya?”

³⁶ Ay nu nfoli wan sa angku ku amatanganan at masine, nafafoli yangay sa angku ku fagmasineun ay ku fagmabalyananun nu sik fun. Ku ngay tagfangatulun ay takadungug fag ngay taw nadog yay anfoli sa angku, ay anfoli yay ku fagmabalyananun gtungud tua ebi.

³⁷ Nu katanya, katsi, gfauseganan au ay gfabat Dius tagsis banwa, aroro at ngay fakamulun matuyan, ay kanya gfababa ngay takamatungudun.