Daniel 3 - Fanawbuid tagsibaliwas Fakayabian

Fun Nabukudunusur at Nafawat fag Fagsegan

¹ Fun Nabukudunusur nafawat sik fagsegan at fangawat gintu. At kabatan siamk safuluk darafa gsugfunan ay at rafad siamk darafa gsugfunan. Ay nu ntabu wan nu kawat, kanya nafalindug sis datag Dura, sis Babilunya fag afud talun.

^2-3 Fun Nabukudunusur nafauro ngay fun ayu sirut, ngay tagfangguna, ngay fagtainan gadgaloan ngay tagfangatulun, ngay tagalaga salapi, ngay tagwabilug, ay tiba yak tagfangguna sit talun laman nangaful ay nanseg at nawat fag fagsegan. Ay kanya fag ngay taw nu siwas salubangan fagsegan,

⁴ tagfosuk longan nauro te, “Fagayu gaban taw tagsiginans fagayu talun sas fagdaul daga, tagsaman at ngay fangaringang,

⁵ nu nadungug am ngay fagfawangun, malubi ay segi sas fun Nabukudunusur at nafawat fag fagsegan.

⁶ Ay nusnga sinu at yud naseg, nangaukasan sa sik faygangan daul.”

⁷ Nu katanya kanya fagayu nu nadungug kafag ngay fagfawangun, anlub wa vtv ay naseg kafag fagsegan.

⁸ Ginanya fag buknga, e sik ngay tagfangalga siginans galeme at kinkakbang sas fun Nabukudunusur ay nafantabugan ngay taw Udyu.

⁹ Kanya fagayu nalong sas fun Nabukudunusur te, “Mesug fag fun!

¹⁰ O nunda wam nasugu te, nusnga sinu at nadungug ngay fagfawangun at awang, malubi ay segi sam nafawat fag fagsegan,

¹¹ ay nusnga sinu at yud natudan ay naseg, nangaukasan sa sik faygangan daul?

¹² Ay dewa katanya, e ngay taw Udyu at yud nafaning am suguan. Kanya fag ngay taw Sadrak, Mesak, ay Abednegu, am nafili tagfangguna sis Babilunya fag afud talun. Kanya fag tulu wa gfaning am ngay dius ay wa gseg am nafawat fag fagsegan.”

¹³ Ay fun Nabukudunusur nu nadungug takatanya, maksvn nu kadotama. Kanya nafauro kafag tuluk baguama.

¹⁴ Ay nu ndasug sas fun at daga salubangan, fun nainto te, “Sadrak, Mesak ay Abednegu, o matuyan te, wam gfaning ku ngay dius ay wam naseg ku nafawat fag fagsegan?

¹⁵ Katsi gsugu au ayu te, nung ro am nadungug ngay fagfawangun at awang, malubi ay segi ku nafawat fag fagsegan. Ay nu dway ro am gseg, gsugu kro te, ukasi ayu sa sik faygangan daul. Sumaful ro tam te, o anud e dius at mafalangfe ayu.”

¹⁶ Kanya fag tulu nabalus te, “Em fun, wami e fagmalongun sanya baliwa.

¹⁷ Nu e naukas ro emi sasad faygangan daul, em Dius ro gfalangfe emi siginan am fagmabalyananun.

¹⁸ Em fun, deyud ro nafalangfe emi, kaylat ami nu saful o te, wami gseg sam nafawat fag fagsegan.”

¹⁹ Aroro siginan kafag tulu at famalus, fun ankaksvn nu kadotama ay kalag sit kamatan. Nu katanya, kanya nasugu te, “Faugati yap at faygangan fitu ginan nu masugba.”

²⁰ Sanya ginan, kanya nasugu sat ngay tagfawayan at magaras fia laman nansiuk Sadrak, Mesak, ay Abednegu ay nangukas sat faygangan daul.

²¹ Kanya fagayu nasiuk kafag tuluk baguama ay naukas sas faygangan daul ay wa nabul ya at lanbung.

²² At kaksvnan at faygangan nu masugba, ngay tagfawayan at nanangukas kafag tuluk baguama anbul wan.

²³ Ay kanya fag tuluk baguama antong masiukan sasad faygangan daul.

²⁴ Ay gina fun Nabukudunusur glingaman, kanya andulo ay anlindug, ay nainto sat ngay tagfangatulun te, “Seyu tua nunda tam nasiuk ay naukas sasad afuy, o nunda bunwa tulu?” Ay kanya fagayu nabalus te, “Sabv, em fun.”

²⁵ Fun nalong te, “Damai! Ufat tua taglao sis wabilug afuy. Kanya fagayu wa masiukan ya ay wa kairug. Ay at sadi kata sik dius.”

²⁶ Nu katanya, fun Nabukudunusur ankakbang sas sakbawan faygangan ay nauro kanya fag tulu te, “Tiba Tungud fag Dius at ngay fagsuguan, gewan, duksuni sanya ginan.” Ay kanya fag tulu naduksun.

²⁷ Sanya ginan, kanya nafaful ngay taw, ngay fun ayu sirut, ngay tagfangguna, ngay fagtainan, ay tagfangatulun. Ay kanya fagayu nalag te, fagtuluk baguama di nkirug. Dewa at ngay buk di nkirug ay di ba fanusan.

²⁸ Nu katanya, fun Nabukudunusur nalong te, “Segi kanya fag tuluk baguama at Dius. Aroro Dius nasugu at tagbarita laman namalangfe at ngay fagsuguan tagafanud sa anya. Kanya fag ngay baguama di nafaning ku suguan laman gseg sa ku nafawat fag fagsegan. Kanya fag tulu naylat kabul abat ngate nanseg nusnga setaw fag dius tagsaman at Dius.

²⁹ Ay katsi, gsugu au te, nusnga sinu fag taw dewa ndaginan fag talun, ay nusnga setaw at fangaringang, at nalong mauri sas Sadrak, Mesak, ay Abednegu at Dius, umsaruayan ban at ngay afud bilug ay umkiklas at ngay bale. Aroro we tibak Dius at mafalangfe kata at nafalangfe kafag tuluk baguama fag Dius.”

³⁰ Sanya ginan, fun Nabukudunusur nafon sas Sadrak, Mesak, ay Abednegu aksvn yap ebi ataw at fakamulun sis Babilunya fag afud talun.