Daniel 2 - Fanawbuid tagsibaliwas Fakayabian

Fun Nabukudunusur at Taginfan

¹ Gina sis faduak banwa fun Nabukudunusur nu gfunan, kanya malayun nu gtaginfan. Ay at ngay taginfan gfasalag gugat anya, nu katanya, kanya wa gatiugun.

² Kanya nafauro at ngay tagsaful gfasure at ngay madulo, tagfangufit, tagfangabalo ay tagfangalga siginans galeme, laman nanlong sa anya te, nataw at nataginfan.

³ Ay nalong sa anya fagayu te, “Nataginfan au ay kanya gfae fagafanawaun angku. Ay nafauro au ayu laman gfayamag am sa angku ku taginfan at masuad.”

⁴ Ay tagfangalga siginans galeme nabalus te, “Mesug fag fun, nangus gleleg tua ban o kabavn! Longi sa emi am taginfan, ay gfayamag ro mi sa emu at masuad.”

⁵ Dewa katanya, fun Nabukudunusur nabalus anya fagayu te, “Anke algan au nu dway ro am nafafalong ay nafafayamag ku taginfan, namagatvng kro ay ngay afud bilug ay namaiklas kro ay ngay bale.

⁶ Ay nu nafoyung tua ro am ku taginfan ay nafayamag at masuad, namon kban sa ayu nusnge wain, ay gfae fagusegananun kban gugat ayu. Katsi wan, foyungi angku ku taginfan ay fayamagi masuad.”

⁷ Ay kanya fagayu gdog yay nabalus sat fun te, “Em fun, longi sa emi am taginfan ay gfayamag ro mi sa emu at masuad.”

⁸ Ay fun nalong te, “Nasaful kwa te, gfadugean wayam aroro nasaful am te, gfafasludan au sa ayu ku nalong:

⁹ way ro am nafafayamag ku taginfan, gfaurianan au ayu kata ku nalong sa ayu. Nafamuag am sa angku aroro nu glong ro am gfabali kyay ku amatanganan nu nlangfe sik buknga. Foyungi wan ku taginfan laman ro gafanud au te, saful am ay mafayamag at masuad.”

¹⁰ Kanya fagayu nabalus sas fun te, “We taw sas fagdaul daga at mafafakamulun takata am fakaylatun. Ay wa yangay e fun, nusnga se aksvn at fagmabalyananun, at masugu takatanya sat ngay tagsaful gfasure at madulo, tagfangufit ay tagfangalga siginans galeme.

¹¹ Em fun, am fagetun maksvn nu maidap. Ngay fagsegan way lang at mafafakamulun takatanya, dewa katanya, kanya fagayu wa gbanwan magamut si sangay taw.”

¹² Aroro siginan kanya fagayu at famalus takatanya, fun andotama maksvn. Ay kanya nasugu laman gfabul fagayu tagfangatulun sas fun sis Babilunya.

¹³ Ay gina e nafoyung fun at suguan te, fabuli kafag ngay tagfangatulun, nananrvbvy yangay anggan Daniel ay at ngay fagadgalangan laman namabul.

^14-15 Aryuk tagfangguna fun Nabukudunusur at ngay tagulit. Gina kanya glo laman namabul ngay tagfangatulun, Daniel madirianan nu gfakamatoan anya. Ginto te, “Wain fakaksvnun nya fun at suguan?” Nu katanya, Aryuk nalong sas Daniel fagayu at kinfasludan.

¹⁶ Sanya ginan, Daniel nasas fun Nabukudunusur at daga salubangan ay naet sik buknga laman gfayamag fun at taginfan.

¹⁷ Sanya ginan, Daniel noli wan ay nafasaful sat ngay fagadgalangan at kinfasludan.

¹⁸ Ay kanya nalong sa anya fagayu te, “Darangini laman Dius tagsis banwa kafanyu tua antam ay laman sumaful tam tam fun at taginfan, laman ban kanya di gfabul antam kata tibak tagfangatulun sis Babilunya.”

¹⁹ Ginanya fag yabi, Dius nafasure sas Daniel siginan sik taginfan fun Nabukudunusur at taginfan ay at masuad. Ay Daniel nafauseganan tagsis banwa fag Dius te,

²⁰ “Kabavn fauseganani Dius. Kanya mabalyanan ay siwa anya fagsafulun.

²¹ Kanya wan tagfainbalian buknga. Kanya wan at nanfili nusnga sinu at nanfunan ay tagtubus. Kanya wan tagfon fagsafulun sat ngay ke fagsafulun.

²² Kanya wan tagfayamag at ngay masuksukan ay at maidap. Siwa anya famayamag ay nasaful nusnge wain tagsisad dulum.

²³ Nu katanya, gfauseganan au emu ku Fun, ku ngay mangaguyang at Dius. O wan at nafon angku ku fagsafulun ay ku fagmabitsugun. Ay nafon tuo sa emi em fagetun sa emu te, foyungi emi fun Nabukudunusur at taginfan.”

Daniel Nafayamag Fun at Taginfan

²⁴ Sanya ginan, Daniel anfoli sas Aryuk. Aryuk, fun at fagsuguan laman namabul ngay tagfangatulun. Daniel nalong anya te, “Lag gfabul ngay tagfangatulun. Nantaban yap o angku sas fun ay namayamag kro at taginfan.”

²⁵ Nu katanya, Aryuk masakit nataban Daniel sas fun at daga salubangan ay nalong sas fun te, “E nalag au sik baguama, kanya at sadi kintaban siginans talun Uda, ay at mafayamag ro am taginfan.”

²⁶ Fun Nabukudunusur nainto Daniel te, “O anud mafafoyung ro wo sa angku ku nataginfan, ay mafafayamag at masuad?”

²⁷ Daniel nabalus te, “Mesug fag fun, nusnga sinu fag tagfangatulun, tagfangufit, tagsaful gfasure at madulo ay taginsaful we makatu gfayamag am taginfan,

²⁸ dewa katanya, e sik mabalyanan fag Dius sis banwa at mafafasure at ngay masuksukan nusnge wain. Ay kanya nafoyung sa emu takafasludan ban. Katsi, nanlong au sa emu am ngay nalag sim taginfan.

²⁹ “Mesug fag fun, kaduge o gtaygilidan, nataginfan o takafasludan ban. Tagfasure fag Dius nafoyung sa emu at masuksuk fag taginfan.

³⁰ Ay Dius nafoyung angku am taginfan, bunwa te, gtungud kyap tua ku iba, nu bunway laman mafafayamag ktua sa emu am taginfan at masuad at tagfasalag sim amatanganan.

³¹ “Katatuy am taginfan: Nalag o sim daga salubangan sik tawtawan daul masulo ay malimu.

³² Kanya at alfuyu mawatan siginan at yud e suglat fag gintu, ay at ngay take ay at dubdub mawatan sanbung salapi, ay at ungdan ay at fagwan sik tansu,

³³ ay at ngay bitis sik sanbung, ay at ngay darafa sik sanbung ay lutuk.

³⁴ Ay kaduge o glingaman kanya fag fagsegan, sik gang anbaras deyud e natigtig. Ay kafag gang antong sat ngay darafa ay at ngay darafa anrufa.

³⁵ Arodi vtv, anrufa wan kafag fagsegan at mawatan sanbung, lutuk, tansu, salapi ay gintu, ay ankata sik upa sis fagruyusan, lalab at fagfalayugun nusnga nday, dewa katanya, kanya fag gang at kintong sas fagsegan at ngay darafa ansik buksul daul ay ankapnu sas fagdaul daga.

³⁶ “Katanya am taginfan at masuad.

³⁷ Em fun, o wan tagfunan ngay fun. Dius tagsis banwa nafili emu sik fun ay nafon emu fagmabalyananun, fagmabitsugun, ay fagmasineun.

³⁸ Yawi nafagbilug wan sa emu ngay taw, ngay fagbaugun, ay ngay manuk tungud nusnga nday. Ay kata o kafag fagsegan at alfuyu at mawatan gintu.

³⁹ “Ay tagtubus ban emu sim fagfagtainanan, nu gfunan wa kaksvn ya nu gfunan o. Ay at fatulu bank fagfagtainanan fakatoglagan kata ban kanya fag fagsegan tansu, ay kanya fag fagfagtainanan gagbilug fagdaul daga.

⁴⁰ Ay at faufatk fagfagtainanan kamogat sik sanbung. Nu setain kanya fag sanbung nu grufa, tuy fag fagfagtainanan nanrufa yangay tibak fagfagtainanan.

⁴¹ At ngay darafa mawatan sanbung ay lutuk at masuad te, at fagfagtainanan ban kafud. Dewa katanya, kanya mabitsug tua ban gugat, aroro nasaful tuo te, sanbung ansuglat sa anya.

⁴² At ngay sumyu mawatan sanbung ay at ngay darafa mawatan lutuk at masuad te, kanya fag fagfagtainanan e fagmabitsugun ay e fagmamomuyun.

⁴³ At kinsuglat fag sanbung ay lutuk at masuad te, fagfagtainanan at mesa tagfangguna nangasadi ban nu kadadwa sa tibak kasugfunanan. Dewa katanya, wa ngaduge at nasadian, kata sanbung ay lutuk at yud masine kasuglat.

⁴⁴ “Gina ban kanya fag ngay fun gfunan, Dius namalindug sik fagfagtainanan at yud e fakatabuan aroro Dius si tuas banwa. Kafag fagfagtainanan ban wa gababawan nu bunway namamin yay ban tibak fagfagtainanan ay kanya ban sanya tua gugat.

⁴⁵ Kanya kata am nalag at kintong fag gang siginans buksul (bunwa siginans taw at nafakamulun) at narufa kanya fag fagsegan at mawatan sanbung, tansu, lutuk, sanbung salapi, ay gintu. “Em fun Dius mabalyanan tua, ay nalong sa emu takadasug ban. Kanya am taginfan at masuad. Kanya fagayu ku nalong matuyan.”

⁴⁶ Fun Nabukudunusur natudan sas Daniel at daga salubangan laman gfauseganan anya. Ay kanya nasugu te, “Foni sik famonun ay irugi famaebebanglu laman sas Daniel.”

⁴⁷ Kanya nalong sas Daniel te, “Aroro nafayamag tuo ku taginfan at masuad, gafanud au te, am Dius amabalyanan yap tua sas fagayu. Kanya tua nangus fag Fun ngay fun at fagtoglagun. Aroro kanya way lang at mafafayamag at ngay madulo.”

⁴⁸ Sanya ginan, fun Nabukudunusur nafon sas Daniel ngayuk famonun, ay nafili anya laman sik tagfangguna sa sik afud talun Babilunya ay laman tagfangguna sa sangay tagfangatulun.

⁴⁹ Daniel naet sas fun te, “Filii Sadrak, Mesak, ay Abednegu laman taggubuk angku nu gfangguna au sanya fag afud talun Babilunya.” Fun Nabukudunusur naylat Daniel at fagetun. Ay Daniel si way gugat fun at bale.