Daniel 12 - Fanawbuid tagsibaliwas Fakayabian

Sik Tagbarita at Fansulitan sabaliwa Taguyan fag Menit

¹ “Ginanya ban, Mikael kadasug. Kanya sik mabalyanan fag tagfangguna tagalaga am ngay kaiban. Ginanya ban fag buknga maidap, ay ya batang e ndasug takaksvn nya fag fagidapun sas Israel siginan nu kasik talun. Dewa katanya, gfalangfe kban am ngay kaiban at ke ngayan at marirukan sis fafil sabaliwas leleg yud e fakatabuan.

² Ay ngayuk taw at kinbul ay at mafolian sis daga gdog yay ban gleleg. Tiba ban e leleg tua at yud e fakatabuan, ay tiba ban gaiyanan way sas fakaplaun at yud e fakatabuan.

³ Ay ngay taw tagsaful at matuyan ay tagfoyung sa sangay taw laman nangugali at masine gdamlag kata galeme sis banwa kabavn ban.

⁴ Daniel, faluti yap tuy fag fafil ay lag yap o gfoyung sa sangay taw tuy fag longan yakmay ban andasug at fakatabuan. Kaduge tuy fag longan masuksukan, ngayu bank taw takaylat gyasafulun takafasludan.”

⁵ Sanya ginan, nalag au duak taw malindug gdiddifean sis tigyangan liskung.

⁶ Ay kafag taw tagalanbungan at masine fag ramit, malindug si baliwa tangabat fag tigyangan liskung. At sadi nainto sa anya te, “Ginain ya ban nu kafasludan kanya fag ngay madulo?”

⁷ Kafag taw nafabat at take fagdua ay nadungug au kanya nu gfatuyanan sas Dius tagleleg kabavn. Ay kanya glong te, “Katabu ban kafag fagidapun nu nlangfe tuluk banwa ay unumk magdanun, gina ban Dius at ngay taw yud e fagidapun ya.”

⁸ Kwa nyamag kanya at famalus ay nainto au anya te, “Nataw ban at fungfung kanya fag ngay takadasug?”

⁹ Ay kanya gbalus te, “Fataglayuni, aroro at famalus am fagintoun ya kasaful ay wa masine glong yakmay ban andasug at fakatabuan.

¹⁰ Ngayu bank taw tagsaful at matuyan tagfasine at ngay leleg, ay kanya ban fagayu sumaful ku ngay longan. Dewa katanya, at mauri ban fag ngay taw gfataglayun nu gfakamulun at mauri ay wa ban sumaful ku ngay longan.

¹¹ “Siginan ban nu gfaragang nu gfon ngay fanggalangun ay nu gfasakbo sas Yawi at bale at mauri fag fagagbilugun tagfayud e masuad, kalangfe yay ban sadik libu duak sandan siamk safuluk menit yakmay andasug at fakatabuan.

¹² Mauseganan sik taw tagfanya tua ay tagagwantan yakmay anlangfe sadik libu tuluk sandan tuluk safulu e limak menit.

¹³ “Daniel, fataglayuni am fakamulun. Kabul ban o, dewa katanya, gfadog kyay ban gfaleleg emu sa taguyan fag menit laman namul o am nainlufuyan at nafalganan laman sa emu.”