Daniel 11 - Fanawbuid tagsibaliwas Fakayabian

¹ “Gina taguna fag banwa Daryu fag taw Medya nu gfunan, au Gabriel, nagubuk au ay nafalangfe Mikael.

Ngay Fun tagsis Fasiunan ay sis Fawalan fag Alvngvdan

² “Katsi glong au sa emu at mafanud, tulu ya bank fun at nanfunan sas talun Persya. Ay at faufat bank fun amaramraman yap tua at naguna fag ngay fun. Ay siginan ban at ramraman, kanya umke fagmabalyananun, ay gfaylatan ban tibak fun te, namawayan tam talun Gresya.

³ Sanya ginan, sadi ya bank fun at mabalyanan takadasug. Ay kanya ban fag fun ngayuk furuan at fagagbilugun, ay gfakamulun ban kata at fakaylatun.

⁴ Ay gina ban kanya anke fagmabalyananun, at fagfagtainanan ban karagang ay kafud sas ufatk fungfung daga. Dewa katanya, bunwa ban at kasugfunanan at nanfunan sa kafag ngay fagfagtainanan. Ay kanya ban fag ngay fun nu gfunan wa kata anya. Gbul ban siginan anya at fagfagtainanan ay gfatigwanan ban sa tibak taw.

⁵ “Ay tagsi bans fasiunan fag alvngvdan fag fun umsik mabalyanan. Dewa katanya, at sadi ban at tagfangguna amabalyanan yap tua anya. Ay kanya ban fag fun sirut umsik fun yangay ay mabalyanan tua ban nu gfunan.

⁶ Ay nu nlangfe ban ngayuk banwa, kafag duak fun kasadi, aroro tagsi bans fasiunan fag fun namon at baguina sas fun tagsis fawalan fag alvngvdan laman at bubay. Dewa katanya, wa ban ngaduge kafag mangena ay kafag fun tagsis fawalan fag alvngvdan nu mabalyanan. Aroro ginanya ban fag buknga, e gfabul kafag dadwa gasfuan at ngay sisian, ay fagayu at fagsuguan.

⁷ “Ay kanya ban fag mangena at faduksay gtubus anya laman gfunan sas fasiunan fag alvngvdan. Ay kanya ban namawayan tagsis fawalan fag alvngvdan fag fun at ngay tagfawayan, ay gsakbo ban sat maaladan fag furuan, laman namabo anya fagayu.

⁸ Sanya ginan, kanya ban namuba sas talun Igiptu ngay fagsegan ay anggan ngay ramraman at mawatan siginans salapi ay gintu. Kaduge ngayuk banwa, kanya di gfawayan tagsis fawalan fag alvngvdan fag fun.

⁹ Dewa katanya, sa oma ban taguyan, kanya ban fag fun namawayan ay wa ban gbabo ay kafoli ban sat talun.

¹⁰ “Ay tagsi bans fawalan fag alvngvdan fag fun at ngay baguama namaful ngayuk tagfawayan laman namalganan nu namawayan. At sadi si anya nu namawayan kata sik lugwak at yud e mafaragang. Kanya namawayan yakmay andasug sat maaladan fag furuan.

¹¹ Ay at kaksvnan tagsis fasiunan fag fun nu kadotama, kanya nanamawayan tagsis fawalan fag alvngvdan fag fun at ngay tagfawayan yakmay nababo.

¹² Aroro kanya nababo, kanya kamatungudun ay ngayu yay at fagnamabulun. Dewa katanya, wa ban gugat gbabo.

¹³ Aroro tagsis fawalan fag alvngvdan fag fun gdog yay namaful ngayuk tagfawayan at kayuan ayu yap tua ebi taguna. Ay nandog namawayan gadgaloan ngayuk tagfawayan gbuba at ngay famawayan.

¹⁴ “Ginanya ban, ngayuk taw takauri tagsis fasiunan fag alvngvdan fag fun. At sadi takauri, am kaiban wan tagfangadotama fag taw Israel. Kanya fagayu gfakamulun takatanya laman kafasludan am taginfan, dewa katanya, kanya ban fagayu gababawan way.

¹⁵ Ay tagsi bans fawalan fag fun namawayan at sadi yak maaladan fag furuan sis fasiunan yakmay nasakbo ay nagbilug kafag furuan. Ay ngay tagfawayan ban ay anggan yangay tagsaful fag ngay tagfawayan siginans fasiunan baliwa wa makatu ya gfawayan.

¹⁶ Nu katanya, tagsis fawalan baliwa fag fun gfakamulun at fakaylatun ay wa ban e mafaragang anya. Kanya ban gagbilug ngay taw Israel at masine fag talun ay gfasat daga fagmabalyananun.

¹⁷ Ay tagsis fawalan baliwa fag fun maksvn nu kaylat namawayan tagsis fasiunan fag fagfagtainanan sas fagdaul at fagmabitsugun. Taguna, kanya gfon at baguina laman namae bubay sa tagsis fasiunan fag fun, laman nangasadi sa anya. Sa takatatuy fag balyawvtan kanya maiklas tagsis fasiunan baliwa fag fagfagtainanan. Dewa katanya, wa ban kafasludan at algan.

¹⁸ Nu katanya, at fagnamawayanun ban, ngay talun way ayu sirut tagsis tigyangan dagat, ay ngayu ban at fagnangagbilugun. Dewa katanya, sik tagfangguna ban namaragang kafag fun nu gfapla tibak taw ay kanya way ban fag fun takapla.

¹⁹ Ay kanya ban guli wan sat ngay furuan at maaladan. Dewa katanya, kanya ban gababawan wan.

²⁰ “Ay tagtubus ban anya fag fun gsugu sa tagfangguna te, ‘Loi wan namaful o famayad sa angku laman gfamut ku ramraman.’ Ay wa ban ngaduge kanya fag fun kabul wan. Nu kabul ban bunwa siginans awayan ay bunwa te, e kadotama anya.

²¹ “Tagtubus ban anya, sik tagafalingunan way, ay wa masine kasik funan. Ay tagsanya fag ngay taw gina gamatangan te, mabayan, kanya ban fag fun namawayan, ay kamuagan laman gagbilug kafag fagfagtainanan.

²² Kanya ban gfabul ngayuk tagfawayan, anggan fun tagfon fanggalangun.

²³ Kanya ban nangasadi sa tibak talun, dewa katanya, kamuag way ban. Ay at ngay tagfawayan ban deyud ngayu, kanya umsik mabalyanan.

²⁴ Gina ban at maramraman fag ngay taw mabayan, kanya ban masakit namawayan kafag ngay taw at ngay afud talun. Kanya ban namakamulun at ngay mangaguyang at yud nafakamulun. Ay gafud ban sat ngay fagsuguan at nabul siginans fagawayanan. Ay at algan at fagnamawayanun tagbia tua ayu daul fag ngay furuan at maaladan, dewa katanya, wa ban ngaduge at algan.

²⁵ “Kanya gfaksvn at amatanganan laman namawayan tagsis fasiunan fag alvngvdan fag fun gadgaloan at ngay tagfawayan. Dewa katanya, tagsis fasiunan fag fun e ngay tagfawayan yangay at maseganama. Ay tagsis fasiunan fag alvngvdan fag fun gababawan way aroro e fawayan tagbalyawvtan laman gfawayan anya.

²⁶ Ay at ngay fagadgalangan yay ban tagfabul anya, ay at ngay tagfawayan ban gababawan ay ngayu takabul.

²⁷ “Ay kanya ban fag duak fun kasadi, dewa katanya, gsud ban kamuag ay gamatangan mauri sat iba. Ay wa ban kataglayun at mesa algan aroro ya ndasug Dius at nafalganan fag buknga.

²⁸ Tagsi bans fawalan baliwa fag fun guli sat talun gbuba at nabul fag ngay ramraman siginans fagawayanan. Ay ginanya ban kanya namawayan laman gfaragang ngay taw nu gseg ay nu gfon fanggalangun sas Dius. Sanya ginan ban, guli wan sat talun.

²⁹ “Ay gina ban at nafalganan fag buknga, kanya nandog namawayan tagsis fasiunan fag fagfagtainanan. Dewa katanya, wa ban kata ya ebi at kinfasludan.

³⁰ Aroro tagsis sakayan lino fag ngay tagfawayan siginans fakayabian baliwa namawayan anya. Nu katanya, kanya ban maksvn nu kalimu ay kafoli sat talun. Nu katanya, kanya ban kadotama Yawi at ngay taw at fagafanudan. Ay kanya ban namauseganan ngay taw at naubun at fagafanudun.

³¹ “Ay tagsis fawalan ban fag fun gsugu sat ngay tagfawayan laman gfauri Yawi at bale at maaladan. Kanya namaragang nu gfon fanggalangun ay namasakbo sas Yawi at bale at mauri fag fagagbilugun laman gfayud e masuad Yawi at bale.

³² Kanya namaylatan ngay taw at naubun at fagafanudun laman namakamulun at mauri. Dewa katanya, fagayu ban tagafanud sas Dius sas fagdaul at amatanganan, namawayan anya.

³³ “Ngay taw tagsaful at matuyan gfoyung sa sangay taw, dewa katanya, kaduge sik buknga sirut, tiba ban si anya kabul siginans fiso tagsumbalian at uyup, ay tiba kairug, ay tiba gatabanan ay e gbul at ngay ramraman.

³⁴ Kaduge ban kanya fagayu gdalan fagidapun, wa ban ngayuk taw taggubuk anya fagayu, aroro ngayu bank taw at yud matuyan at nangalo anya.

³⁵ Tiba bank taw tagsaful at matuyan gafaurianan laman ban umsik matuyan ay umsine at leleg anggan ban andasug at fakatabuan, Dius at nafalganan fag buknga.

³⁶ “Tagsi bans fawalan baliwa fag fun namakamulun at fakaylatun. Nu gdama at sadili gtungud tua ngay dius, ay gfalingun Dius tagtungud sas fagayu dius. Kanya ban gbabo yakmay Dius nafasure at dotama, laman umfasludan tua ban nusnge wain Dius at algan takafasludan.

³⁷ Kanya ban wa gafanud sat ngay mangaguyang at ngay dius ay sa sangay mangena at fakaylatun fag dius. Kanya kamatungudun te, gtungud tua sas fagayu dius.

³⁸ At fagsegan sik dius way tagiklas at maaladan fag ngay furuan. Kanya gfauseganan kafag dius at ngay mangaguyang at fagyudun toglag. Kanya gfon fanggalangun gintu, salapi, ay mafanud fag ngay gang ay tiba yak mafanud fag famonun.

³⁹ Kafag dius ggubuk anya namawayan at maaladan ayu daul fag ngay furuan. Kanya gfauseganan ngay taw at masine sa anya siginan nu gfon fagmabalyananun gagbilug ngayuk taw. Ay kanya gfon sa sangay taw ngay daga laman sik famonun sa anya fagayu.

⁴⁰ “Sa bans fakatabuan, tagsis fasiunan fag fun namawayan tagsis fawalan fag fun. Dewa katanya, tagsis fawalan fag fun e ngay sakayan famawayan, ay e ngay tagfawayan tagakabayuan ay ngayuk tagfawayan tagsi sangay sakayan lino laman namawayan anya. Kanya fagayu namawayan ngayuk talun kata lugwak nu giklas.

⁴¹ Kanya namawayan yangay Israel fag talun masine, ay ngayu bank taw takabul. Dewa katanya, kanya ban wa gbabo Edum, Muab ay Amun at ngay tagfangguna.

⁴² Ngayu bank talun at fagnamaboun, kataip sanya talun Igiptu.

⁴³ Kanya ban nangagbilug salapi, ay gintu tagsanya ginan fag ngay talun ay talun Igiptu at ramraman fagayu. Ay nangagbilug yangay ban talun Libya ay Etiupya.

⁴⁴ Dewa katanya, e ngay barita ban siginans fakamenitan ay fasiunan at namafanawa anya. Ay kanya ban kadotama maksvn ay namawayan ay namabul ngayuk taw.

⁴⁵ Ay kanya ban kawat sik bale ramit at masine sit yud e malong fag buksul tagsis wabilug duak dagat. Dewa katanya, kanya ban kabul way ay wa ban e ggubuk ya anya.”