Daniel 10 - Fanawbuid tagsibaliwas Fakayabian

Daniel at Taginfan sis Tigyangan Liskung Tigris

¹ Gina sis fatuluk banwa Sirus fag taw Persya nu gfunan, e andasug sas Daniel sik fansulitan. Daniel at ngayan yangay te, Beltesasar. Ay kanya fag fansulitan matuyan sabaliwa sik tagbia fag awayan. Siginan sik taginfan, Daniel natogdungug kafag fansulitan.

² Katatuy at kinfasludan: Ginanya, au, Daniel, kabalu au kaduge tuluk buknga linggu.

³ Ay kadugenya kwa kaylat gfangon dewa at mataba fag fakonun. Ay kwa naon yamas ay kwa yangay nainum fanlangu. Ay kwa nafasa ku bilug ngay famaebebanglu.

⁴ Gina sis faduak safulu e ufatk menit gina taguna fag magdanun, nananmalindug au sis tigyangan liskung daul Tigris.

⁵ Ay e nalag au sik takata sik taw at ke lanbung mawatan siginan at masine fag ramit ay e famutus fagwan at mawatan siginans gintu.

⁶ Ay at bilug gdamlag kata sik gang gladlaksiun at mabyat nu kabayad. Ay at kamatan gdamlag kata sik limbad, ay at ngay mata gigang kata sik salung. Ay at ngay daluap ay ngay darafa gdamlag kata at madalusan fag tansu, ay kanya nu garingang gbia kata ngayuk taw nu garingang.

⁷ Au way lang at nalag kanya fag taginfan. Ku ngay fadgaloan wa nalag, dewa katanya, kanya fagayu anlimu ay nanansuksuan.

⁸ Nu katanya, anfamato au ay au way lang at nalag kanya fag madulo. Anlaksi au ay namin ku fagmabitsugun.

⁹ Ay nadungug au kanya fag taw nu garingang. Ay kaduge kanya garingang, ku amatanganan nalyam ay anlub au.

¹⁰ Kanya nated ku daluap ay nagubuk angku, ay kadugenya ku ngay take ay ku ngay tud gtadtaruyan.

¹¹ Kanya nalong te, “Daniel, Dius kesug emu. Alindugi wan ay dungugani ku longan emu, aroro Dius nasugu angku stae sa emu.” Ay kanya nu ntabu wan nu garingang, gtadtaruyan au kalindug.

¹² Kanya nalong sa angku te, “Daniel, lag o kalimu. Aroro Dius nabalus wan am darangin gina yay taguna fag menit nu kamababaun o sas Dius ay gina o gyasafulun am taginfan at masuad. Nu katanya, nastie au laman namoyung au sa emu at famalus am darangin.

¹³ Dewa katanya, kwa vtv andasug stie aroro kaduge duak safuluk menit tagfangguna Persya fag fagfagtainanan nasalag angku. Balikam Mikael, ngay tagbarita at fun, nu nagubuk angku aroro au way lang at nafawayan Persya at tagfangguna.

¹⁴ Katsi, ste au laman namayamag au sa emu takafasludan ban sam ngay kaiban fag ngay taw Israel, aroro am ngay taginfan sabaliwa takafasludan ban.”

¹⁵ Ay kaduge kanya garingang, natudan au ay kwa maringang ya.

¹⁶ Ay kanya nated ku bibig, ay maringang kwan. Nalong au sat malindug si ku daga salubangan te, “Anmomuy au ay anlukme aroro sa ku nalag fag taginfan.

¹⁷ Setain ro nu mafakamatoan au emu kway e fagmabitsugun ya ay kway bangan maengasan ya?”

¹⁸ Ay kanya nadog yay nated angku ay ku fagmabitsugun anfoli wan.

¹⁹ Kanya nalong sa angku te, “Dius kesug tua emu; lag kalimu ay lag gamatangan. Fabitsugi am amatanganan.” Ay kanya nu nalong wan takatanya, ku fagmabitsugun anfoli wan. Ay nalong au sa anya te, “Fataglayuni wan nu garingang o, aroro nafabitsug tuo angku.”

²⁰ Ay kanya nabalus te, “Kafoli kyay ban sas Persya laman namawayan at tagfangguna sanya. Ay nu nalao kban siginans fagawayanan, Gresya at tagfangguna kadasug. O nasaful o ku fagnastieun?

²¹ Nastie au laman namayamag sa emu sik longan tagsit Mafanud fag Fafil. Gina au gfawayan, we tiba yak taw at nagubuk angku, Mikael way lang, talun Israel at tagfangguna.”