Amus 4 - Fanawbuid tagsibaliwas Fakayabian

¹ Am fag ngay mangena takadungug sis Samarya, kata am sik ngay baka mataglu sis Basan. Ay fakamulun, gfaidapan am ay gfalingun ngay taw at yud e kwa, ay gsugu am ay ngay mangama te, “Namul am fanlangu ay nanginum watam.” Nu katanya, dungugani

² Fun Dius Yawi at longan te, “Aroro kdi e malong, gfatuyan au sa ayu te, umdasug ban sik buknga ay ngay fawayan ban tumaban ayu kata nu ggamat albon.

³ Ay e tumaban ban ayu siginan ay furuan ay gfaduksun ayu sat marasrasan fag alad, ay nantaban ayu sas Armun fag talun. Au, Yawi, taglong tuy.

⁴ Ngay taw Israel, loi wan sa ay fagnansegan sas Betel ay sas Gilgal ay namamut am sanya ay ngay asalanan. Kayu balabag, bubai ay ngay fanggalangun, ay galay fatuluk menit, bubai yangay ay ngay fasafuluk afud.

⁵ Ay nangirug am tinapay at ke famabia laman sik fanggalangun famauseganan. Agvd, nanfamatungudun wam takatanya, anggan ay fanggalangun yud fabulunan, aroro katanya wan ay fakaylatun gfakamulun. Au, Fun Dius Yawi taglong tuy.

⁶ Au wan at nafadasug sa ayu fanlunus sas nusnga nday fag furuan, dewa katanya, yam kafoli sa angku. Au, Yawi, taglong tuy.

⁷ Ay kwa nafarak kaduge tuluk magdanun yakmay andasug fanggutluan. Nafae arak au sa sik furuan ay sa tiba ngap kfuruan, duan. Ay nafae arak au sa sik gamasun ay sa ngap tibak gamasun wa karak.

⁸ Naranranugan am glulian sa sangay furuan laman nanrvbvy ay fanginum, dewa katanya, ya nsak. Dewa kaksvn nya nu gidapan am, yam kafoli sa angku. Au, Yawi, taglong tuy.

⁹ Ngayu ginan koma gfauri ay ngay tanum siginan sik tagmara masugba ay siginan sik ngay dafang. Ay sik ngay liung nafamin ay ngay tanum fun kayu igus ay fun kayu ulibu. Ay dewa kaksvn nya, yam kafoli sa angku. Au, Yawi, taglong tuy.

¹⁰ Ay nafadasug kyangay sa ayu sik ngay faurianan kata ebi ku nafadasug sas talun Igiptu. Nafabul kwan ay ngay baguama sas awayan, ay ay ngay fawayan nagbilug wan ay ngay kabayu. Ay nafaidapan kyangay ayu sat maksvn fag basung aroro ngayuk taw at kinbul si ay fagmafulan. Dewa katanya, yam kafoli sa angku. Au, Yawi, taglong tuy.

¹¹ Nafabul kwan ayu tiba kata ku nafakamulun sas Suduma ay sas Gumura. Ay am at kinlangfe, kata am sik ngay famaygang at nabul siginan sad afuy. Dewa katanya, yam kafoli sa angku. Au, Yawi, taglong tuy.

¹² Nu katanya, ngay taw Israel, gdog kyay namaurianan ayu takatanya yay fia fag ngay faurianan. Aroro namakamulun kban katanya, falganani ay sadili nu nansalubang am sa angku ay Dius.”

¹³ Dius wan at nawat ngay fungsu ay tagmara, ay kanya yangay tagfae menit ay tagfae yabi. Kanya gfasaful sa sangay taw at ngay algan ay gfagtainan sas fagdaul daga. At ngayan Yawi, at Mabalyanan fag Dius.