Alubad. 99 - Fanawbuid tagsibaliwas Fakayabian

Alubad 99 Yawi wan at yud e Malong fag Fun

¹ Tam Fun Yawi malunggung sit bale, sis buknga duak awatan at ke fakfak. Nu katanya, ngay taw maksvn nu kalimu, ay fagdaul daga guigan.

² Yawi wan at mabalyanan sis furuan daul Siun, ay gtungud tua sas fagayu talun.

³ Ngay taw sas fagdaul daga gseg anya, aroro kanya mabalyanan ay sik fagsuyuun, ay di e malong.

⁴ Kanya mabalyanan ay matuyan fag Fun. Nu gfawabilugan, di e fagfili, ay kabavn at fakamulun sas Israel, masine tua ay matuyan.

⁵ Tam Dius Yawi di e malong; nu katanya, fabati tam fagusegananun sa anya, ay tudani sit daga salubangan.

⁶ Kanya nafili Muisis ay Arun laman at tagfon fanggalangun, ay Samwel sik tagdarangin yangay. Ay kanya fag tulu mafandarangin; nu katanya, Yawi gbalus tua gugat.

⁷ Yawi gina sis linyabu takata sik turuk, nafakamatoan at ngay taw, ay kanya fagayu nafaning at ngay faugali ay at ngay longan.

⁸ Yawi em Dius, nabalus tua kafag ngay taw at darangin. Nafasaful tuo sa anya fagayu te, o wan Dius at mafalyam ngay asalanan dewa o nafaurianan anya fagayu aroro sat ngay asalanan.

⁹ Segi Yawi, tam Dius! Tudani sat nafili fag buksul, aroro kanya di e malong.