Alubad. 97 - Fanawbuid tagsibaliwas Fakayabian

Alubad 97 Yawi tua Tiba Tungud fag Fun

¹ Yawi gfunan, nu katanya, fagdaul daga ay fagayu furu tagsis swabilug dagat, useganani anya.

² Ngay linyabu naligung Yawi, ay kanya gfunan ke fagmatuyanun, ay di e fagfili taw.

³ Siginan anya, afuy gduksun, laman girug at ngay fawayan nusnga nday.

⁴ At nawat fag lingsi gyamag sas fagdaul daga, ay ngay taw nu nalag gtadtaruyan kalimu.

⁵ Sis Yawi at daga salubangan, ngay buksul katinas kata sik lune, aroro sia wan tagfunan sas fagdaul daga.

⁶ Banwa gfoyung te, Dius matuyan. Ay fagayu talun at taw nalag at fagmasineun.

⁷ Fagayu taw tagseg ay takamanagsag sa tibak ngay fagsegan, umkapla. Ay fagayu ban fagsegan nantudan sas Yawi.

⁸ Yawi, ngay taw tagsis furuan Siun ay tagsis Uda fag ngay furuan nu nadungug te, matuyan nu gfawabilugan o, kanya fagayu maksvn nu guseganan.

⁹ Yawi, o tua tiba tungud fag fun, tagfunan sas fagdaul daga. Nu mabalyanan o gtungud tua tibak fagsegan.

¹⁰ Am fag ngay taw takesug Yawi, aurii tua fagmauriun! Kanya gdiri at ngay taw, ay gfalangfe siginan at mauri fag ngay taw.

¹¹ Dius at fagmayamagun gyamag sat matuyan fag ngay taw, kata menit nu gdamlag, ay gfon fagusegananun.

¹² Ngay taw at matuyan, useganani tua sas Yawi, ay segi anya, aroro at ngayan di e malong.