Alubad. 96 - Fanawbuid tagsibaliwas Fakayabian

Alubad 96 Yawi wan at Mabalyanan fag Fun

¹ Ngay taw sas fagdaul daga, alubadi sik bagu fag alubad sas Yawi.

² Alubadi sas Yawi ay segi anya. Ay galay menit, foyungi sabaliwa nu gfalangfe antam.

³ Foyungi sas fagayu talun at ngay taw te, Yawi mabalyanan ay at ngay nafakamulun madulo.

⁴ Yawi mabalyanan, nu katanya, at masine fauseganani anya, ay suyui gtungud yap tua sa tibak fagsegan,

⁵ aroro Yawi tua at nawat banwa. Ay tibak talun at fagsegan bunwa at matuyan fag dius.

⁶ Siwa anya fagmasuyuun ay fagmatuyanun, ay kalag sit bale at fagmabitsugun ay at fagmasineun.

⁷ Fagayu gaban taw sas fagdaul daga, toglagi Yawi. Toglagi anya, aroro sat fagmasineun ay sat fagmabalyananun.

⁸ Fauseganani Yawi, at mauseganan ay at matuyan fag famauseganan, ay bubai ngay fanggalangun sat bale.

⁹ Segi Yawi, aroro di e malong. Ngay taw sis fagdaul daga, suyui tua anya!

¹⁰ Foyungi sa sangay talun at ngay taw te, “Yawi tua tagfagtainan!” Kanya tua at nawat fagdaul daga ay at nafaogat, nu katanya di guigan. Ay nu gfagtainan, di e fagfili.

¹¹ Banwa ay fagdaul daga, useganani! Ngay dagat ay fagayu tagsanya, fauseganani yangay Yawi!

¹² Ngay gamasun ay anggan ngay tanum, uroi useganani! Fagayu fun kayu, fauseganani yangay alubadi,

¹³ sis Yawi at daga salubangan, aroro kanya kadasug wan, laman namagtainan ngay taw sas fagdaul daga, kata at fagmatuyanun.