Alubad. 94 - Fanawbuid tagsibaliwas Fakayabian

Alubad 94 Dius Gfaurianan at Mauri fag ngay Taw

¹ Yawi, o wan tagfaurianan fag Dius. Ay fasafuli te, anud, katanya o.

² O yangay taginsaful sas fagayu taw, nu katanya, fakamuluni wan! Faurianani wan takamatungudun fag ngay taw tagalvngvdan sat ngay nafakamulun.

³ Yawi, seduge tua ban nunda at mauri fag ngay taw nu kamanagsag gugat? O nunda ban we fakatabuan ya?

⁴ Ngay taw mauri maksvn nu kamatungudun.

⁵ Yawi, kanya fagayu gfauri ay gfaidapan am nafili fag ngay taw,

⁶ ay kanya fagayu gfabul ngay fagbubayun, ngay yud e kalongan ya, ay anggan ngay taw tagsiginan tibak talun.

⁷ Kanya fagayu glong te, “Yawi, Akub at Dius, wa glag em ngay fakamulun, ay we tungkul sa anya takatanya.”

⁸ Am fag ngay taw at yud e fagsafulun, ginain ya ban nu katogdungug am? Asafuli te,

⁹ O nunda at nawat tam ngay talinga ay tam ngay mata, wa gdungug ay wa glag?

¹⁰ Dius nu nafaurianan way tagbia fag ngay talun, o nunda ro kanya wa yangay mafaurianan ayu? Ay tam fagsafulun nu siginan way anya, o nunda ro wa saful tam ngay fakamulun?

¹¹ Yawi saful way te, ngay taw at amatanganan we masuad.

¹² Yawi, mauseganan am nafoyung fag taw sabaliwa am faugali.

¹³ Nafoyung o sa kafag taw am faugali, laman manabayan tua gina e fagidapun, yakmay o nafaurianan at mauri fag ngay taw, kata sik taw at kintong sa sik fanggamat fag lusung.

¹⁴ Yawi, dewa katanya, di ban o gaiyan am nafili fag ngay taw.

¹⁵ Ay ginanya ban, ngay taginsaful, matuyan wan nu ginsaful, ay at matuyan ban fag ngay taw gfaning tua.

¹⁶ Dius, sinu ya ku tagfalangfe sa sangay taw mauri, ay tagfadiuganan angku? At matuyan, o tua.

¹⁷ Yawi, nu dyaman o nagubuk angku, anbul kwan.

¹⁸ Ay ginanya, nu gamatang au gakabulun kwan, dewa katanya, nesug tuo ay nafalangfe o angku.

¹⁹ Gina au gafanawa, nafasun tuo ay nafae fagusegananun angku.

²⁰ Yawi, di o gfadiuganan at mauri fag ngay tagwabilug, ay ngay taw takawat at sadili faugali.

²¹ Kanya fagayu gkamatoan laman namawayan at matuyan fag ngay taw, ay gagbilug ngay faugali laman gfabul ngay taw at yud e asalanan.

²² Dewa katanya, o wan ku tagfalangfe fag Dius, takata sik gang ku fagsarigan.

²³ Yawi em Dius, gfaurianan o anya fagayu aroro sat ngay asalanan. Anud wan, gfabul wo anya fagayu.