Alubad. 92 - Fanawbuid tagsibaliwas Fakayabian

Alubad 92 Famauseganan fag Alubad

Alubad gina sis famiangalay fag menit.

¹ Yawi, em Dius Tiba Tungud, masine nu galubad tuami gugat gfauseganan emu.

² Masine yangay nu gfoyung ami kayu menit ay yabi te, mafangesug o ay matuyan,

³ kaduge gfawang ngay fagfawangun ke ngay bakyang;

⁴ Yawi, nafae fagusegananun tuo angku, siginan am ngay nafakamulun at madulo, nu katanya, galubad au guseganan sa emu.

⁵ Yawi, am ngay nafakamulun maksvn nu madulo. Ay wami makatu gamatangan kata am namatangan.

⁶ Ngay taw at yud e fagsafulun wa saful te, kata ban kanya ngay taw mauri at fakadasugan.

⁷ Kanya fagayu, dewa anke fagmakatuun, kata way sik makmak at natugbung oma masakit ay at kinke barugwak, kanya ban fagayu gafaurianan way.

⁸ Yawi, dewa katanya, kabavn o tua tiba tungud sas fagayu.

⁹ Anud, fagayu am fawayan umbul, ay fagayu tagfakamulun at mauri sumaruayan.

¹⁰ Nafae fagusegananun o angku, ay nafabitsug, kata sik unwang nu mabitsug.

¹¹ Nalag au ku ngay fawayan nu gababawan, ay nadungug kyangay kafag ngay taw mauri nu gidapan.

¹² At matuyan fag ngay taw umke ngay ramraman, kata ngay layag tangayu at rawvg, ay umbitsug kata ngay fun kayu sidru tagsis Lebanun.

¹³ Kanya fagayu kata yangay sik ngay fun kayu tagtugbung sis Yawi tam Dius at bale.

¹⁴ Ay kanya grawvg tua gugat, dewa andanama wan, ay at ngay don melo tua gugat, kata ebi ginan.

¹⁵ Ay kanya gfatuyan gugat te, “Yawi wan at matuyan! Ay sia wan ku fagsarigan kata sik gang! Kanya di e asalanan!”