Alubad. 91 - Fanawbuid tagsibaliwas Fakayabian

Alubad 91 Dius tam Tagfalangfe

¹ Tiba Tungud fag Dius at mabalyanan, gfae fagbanwanan tua nusnga sinu tagsarig sa anya.

² Kanya fag taw malong tua sas Yawi te, “Ku Dius, o wan ku tagbalabag ay ku taggubuk, ay o yangay ku fagsegan.”

³ Anud, kanya gfalangfe emu siginan at mauri fag taw at sangdaw, ay siginan at maksvn fag faurianan.

⁴ Kanya gdiri emu kata sik manuk tungud nu glub at ngay riangan. Ay at fagmatuyanun tagdiri ban emu kata sik famalabag.

^5-6 Ay wa ban o kalimu nusnge wain at malimu sisad yabi, ay am ngay fawayan at ngay banyas, ay anggan at maksvn fag fakasaitun at masakit kadasug.

⁷ Dewa ban ngayuk libu at kinbul sim ligung, di ban e kadasug sa emu at maidap.

⁸ Ay lumag yangay ban o at mauri fag ngay taw nu gafaurianan.

⁹ Nu Yawi tua am fagsarigan, ay nu Tiba Tungud tua fag Dius am nafili laman am tagfalangfe,

¹⁰ di e kadasug sam bale, fagmauriun ay fakasaitun.

¹¹ Aroro Dius sumugu at ngay tagbarita, laman gdiri emu nusnga nday o,

¹² ay at nangurug emu, laman am darafa di katuktuk sas gang.

¹³ Ay makatu ban o gsiad ngay liun ay ngay dot, ay marufa ban o kanya fagayu.

¹⁴ Dius glong te, “Gfalangfe au ay gdiri fagayu taw takesug ay tagtoglag angku.

¹⁵ Ay kanya ban, dewa anke fagidapun, nu nadarangin ban sa angku, gbalus ktua ban anya, ay si ktua ban gugat anya, ay gfalangfe ay gfae fagusegananun anya.

¹⁶ Gfalangfe kban gugat anya, ay gfon tangaduge fag leleg.”