Alubad. 90 - Fanawbuid tagsibaliwas Fakayabian

Alubad 90 Dius ay Taw

Dius at fagsuguan, Muisis at darangin.

¹ Em Fun, siginan ebi, o wan em fagsarigan.

² Dius, gina yay o yud nawat ngay buksul ay fagdaul daga, sanya wo. O wan Dius, siginan ngay ebi ay kabavn ban.

³ Gfafoli o ngay taw sas daga, ay glong o sa anya fagayu te, “Afolii sas daga, aroro sik taw wayam.”

⁴ Sa emi nu sik libuk banwa, sa emu kata way sik menit, kata egmenit at kinlangfe, ay kata way nu seyuk buknga sisad yabi.

⁵ Nu gfalyam o em leleg masakit way, kata sik taginfan,

⁶ ay kata yangay sik makmak at natugbung marabung sis balabag, ay at kin-gong way vtv sis fafun.

⁷ Anmomuy ami ay anlimu emu, aroro andotama o emi.

⁸ Saful way o em ngay asalanan, ay anggan em fagsuksukun fag ngay fakamulun ansaful sim fagmayamagun.

⁹ Anud, umbul ami masakit, aroro kadotama o emi, ay sa ban taguyan em leleg, kamomuy ami ay gfandeng.

¹⁰ Em leleg at kadugean, fitu wayk safuluk banwa ay nu mabitsug tuami, sitsigons waluk safulu. Ay dewa at manabayan fag ngay banwa nu mabanwan ami, ngayu way em fagafanawaun ay em fagidapun. Anud, em leleg kalyam way masakit.

¹¹ Sinu tagsaful am dotama at maksvn? Anud, nu ndotama o, maksvn tua, nu katanya, masine nu gfababaun ami sa emu.

¹² Fasafuli emi te, em leleg wa ngaduge, laman gugali tuami kata at ke fagsafulun.

¹³ Yawi, afolii wan sa emi! Seduge tua ban nu kadotama o emi? Dungugi tua ay afanyui emi, am ngay fagsuguan!

¹⁴ Galay balabag, falagi sa emi te, mafangesug o, laman kayu menit guseganan tuami gugat galubad.

¹⁵ Fae fagusegananuni emi kata at kadugean ebi gina ami gidapan ay gafaurianan.

¹⁶ Fasurei sa emi, ay anggan ban sa em ngay kasugfunanan, am fagmabalyananun, ay am ngay fakamulun at madulo.

¹⁷ Em Fun Dius, falagi emi am fagmasineun, ay gubuki emi sas fagayu em fakamulun laman kafasludan tua.