Alubad. 9 - Fanawbuid tagsibaliwas Fakayabian

Alubad 9 Dius nu Gfawabilugan Matuyan Tua

Laman sa tagfangguna alubad: Dabid at alubad. At ruri, kata sik alubad sabaliwa “Baguama at kinbul.”

¹ Yawi, namauseganan au emu fagdaul ku amatanganan. Ay nanfamansulit au am ngay nafakamulun at madulo.

² Tiba Tungud fag Dius, nangalubad au guseganan aroro sa emu. Nangalubad au namauseganan emu.

³ Ay nu nsure o sa ku ngay fawayan, kanya fagayu glagyu, kalub, ay kabul sim daga salubangan.

⁴ Malunggung o sanya sbanwa am fagbanwanan, ay matuyan nu ginsaful o. Nainsaful o ku amatanganan ay nafoyung o sa sangay taw te, dakdi e asalanan.

^5-6 Nafoyung wo at mauri fag ngay talun at taw, ay nafamin wo ku ngay fawayan; we sawad ya sangay at nagdafugan. Ay narasras yangay o anggan at ngay furuan, ay kabavn ban, kanya fag ngay taw wa kamatang ya.

⁷ Dewa katanya, Yawi, gfunan ban o kabavn. Ay mafalganan o ginsaful sim fagmatungkudan.

⁸ Matuyan nu ginsaful o ngay taw at asalanan sas fagdaul daga, ay di o e fagfili.

⁹ Yawi, o wan ngay taw tagafalingunan at fakakbangan ay at fagsarirungan, gina sis buknga fagidapun.

¹⁰ Ay ngay taw tagsaful emu gafanud tua, aroro di o gaiyan nusnga sinu tagrvbvy emu.

¹¹ Alubadi useganani sas Yawi, Erusalem at fun! Ay foyungi sa sangay talun at taw at ngay fakamulun!

¹² Yawi gdungug tua ngay taw tagafalingunan at darangin. Ay kanya gfasud, ay di kalyam.

¹³ Yawi, damai ku ngay fawayan nu gfaidapan angku. Nu katanya, afanyui ay falangfei angku siginans fakabulun,

¹⁴ laman manamauseganan au emu sas furuan Siun at sakbawan, sa sangay taw at daga salubangan. Guseganan au aroro nafalangfe tuo angku.

¹⁵ Kanya fag ngay taw at yud gtoglag Dius nawat sik alian laman nanggamat tibak taw, ay dewa katanya, kanya yay fagayu at kinbulsu sanya. Ay kanya yay fagayu at kinkiktan sat nafoli fag sangdaw.

¹⁶ Yawi nafatoglag at sadili siginan nu matuyan nu gfawabilugan ngay taw. Ay ngay tagasalanan umfaurianan aroro sat ngay sadili nafakamulun.

¹⁷ Fagayu tagasalanan sas fagayu talun tagtalyuyan Dius nangadasug ban sas fakabulun.

¹⁸ Kabavn Yawi wa gfabayan ngay taw tagidapan ay tagayudan. Ay bunwa ban kabavn, at yud e fagmakatuun nu yud e fagsegun.

¹⁹ Yawi, gfainfanyuan au te, fakamuluni wan. Ay lag o kaylat ngay taw nu gbabo nu siginan way at sadili fagmakatuun. Fafuli ay faurianani ngay talun at taw yud gafanud sa emu.

²⁰ Yawi, fabanwani si anya fakalimuun, laman kanya fagayu sumaful at sadili te, sik ngay taw way.