Alubad. 89 - Fanawbuid tagsibaliwas Fakayabian

Alubad 89 Dius at Nasadian sas Dabid

Etan fag taw Esra at alubad.

¹ Yawi, galubad kban gugat sa emu, aroro matuyan nu mafangesug o, ay gfoyung kban gugat am fagmatuyanun sas fagayu kasugfunanan.

² Gfoyung kban gugat te, kabavn matuyan tua nu mafangesug o, ay di ginbalian kata banwa.

³ Yawi nalong te, “Nawat au sik nasadian sa ku fagsuguan Dabid, ku nafili fag fun. Ay nafatuyanan au sa anya te,

⁴ ‘Siginan tua ban gugat am kasugfunanan Israel at ngay fun, ay kabavn ban gfakatanya ktua gugat.’ ”

⁵ Yawi, am ngay awatan sis banwa ay anggan ngay tagbarita maful gfauseganan emu, aroro matuyan tuo ay nafakamulun o at ngay madulo.

⁶ Yawi, o nunda e mafasud emu am ngay awatan tagsis banwa? Ay sinu fag tagbarita at mafasud emu?

⁷ Am ngay tagbarita at yud e malong gina maful gsuyu emu. Ay amabalyanan yap tuo ay amalimu sas fagayu tagsim ligung.

⁸ Yawi, Dius at mabalyanan, we gfasud emu. Ay matuyan tuo sas fagayu am fakamulun.

⁹ Si wayam daga fagmabalyananun taglugwak fag dagat, ay gfaragang o at maksvn fag lugwak.

¹⁰ Siginan am fagmabalyananun, nafabul o ay narufa ule daul at nafangayan te, Rakab, ay nababo o am ngay fawayan.

¹¹ O way tagagbilug banwa ay daga, ay o yangay at nawat fagayu tagsis fagdaul daga.

¹² Nawat o dua fungfung alvngvdan daga. Buksul Tabur ay Buksul Ermun kata sik ngay taw tagalubad gfauseganan emu.

¹³ We mafasud am fagmabitsugun ay am fagmabalyananun.

¹⁴ Nu gfagtainan o masine tua ay matuyan, ay sas fagayu am fakamulun, gfalag o te, mafangesug tuo ay matuyan.

¹⁵ Yawi, mauseganan ngay taw tagseg tua emu, aroro kanya fagayu gbanwan tua sim fagmayamagun.

¹⁶ Fagngabak menit, kanya fagayu guseganan sa emu, ay siginan am fagmatuyanun, at ngay amatanganan kaksvn.

¹⁷ Nafon tuo sa anya fagayu fagmasineun ay fagmabitsugun, ay siginan am fakafanyun, gbabo tua.

¹⁸ Yawi, Israel at Dius at yud e Malong, nafili tuo em fun, laman em tagfangguna.

¹⁹ Ebi nalong o sam ngay fagsuguan at matuyan siginan sik taginfan te, “Nafili au ay nagubuk sik tagfawayan, ay nafasik fun au sik taw at yud kadungug.

²⁰ Ay kanya Dabid, nafili au anya siginan nu gugwag sik mafilian fag langis sat alfuyu.

²¹ Ku fagmabalyananun si gugat anya, laman at tagfabitsug.

²² At ngay fawayan ay anggan at mauri fag ngay taw wa mababo anya.

²³ Gbabo au ay gfabul at ngay fawayan, ay anggan ngay taw takauri anya.

²⁴ Siginan nu mafangesug au, gfafasludan au ku ngay longan sa anya. Ay siginan ku fagmabalyananun, gfamut au at fagmakatuun.

²⁵ Ay namagbilug au sa anya dagat ay anggan ngay liskung.

²⁶ Kanya gtuyan te, ‘O wan ku Mama ay ku Dius, ay o yangay ku fagsarigan fag gang ay ku tagfalangfe.’

²⁷ Gtuyan au sa anya te, sia wan ku baguama taguna, ay tagtungud ngay fun nu mabalyanan.

²⁸ Ay kabavn ban ku fakesugun gbanwan tua gugat si anya, ay di ban gbadbalian ku nasadian sa anya.

²⁹ Gfasiginan ktua ban gugat at kasugfunanan talun Israel at ngay fun; gfaksvn ktua ban gugat at fagfagtainanan, kata banwa nu yud gbadbalian.

³⁰ Dewa katanya, at ngay kasugfunanan ban way gfaning ku ngay suguan, ay way gfakamulun kata ku faugali,

³¹ ay nu kamabo way ban ku ngay longan,

³² gfaurianan kban anya fagayu, aroro sat fakamaboun ay sat asalanan.

³³ Dewa katanya au, kesug ktua ban gugat Dabid, ay gfafasludan ktua ban gugat ku ngay fatuyanan sa anya.

³⁴ Ay kdi ban gfayud e masuad ku nasadian, ay kdi ban gfainbalian ku ngay longan sa anya.

³⁵ Aroro kdi e malong, kabavn ban sayginan kway gfatuyanan sas Dabid te, ‘Gfafasludan kban ku ngay fatuyanan sa emu.’

³⁶ Kabavn ban siginan tua gugat at kasugfunanan at nanfunan sas Israel, ay nu gfunan ban di gbadbalian kata menit.

³⁷ Ay mogat tua ban gugat kabavn, kata magdanun fag tagfatuyan.”

³⁸ Dewa katanya, Yawi, katsi kadotama o ay naiyan am nafili fag fun.

³⁹ Ay nafae yud o e masuad am nasadian sam fagsuguan, ay naiyan o anya siginan at fagmafunanun, kata nu gukas o sik fun at sangbo.

⁴⁰ Naiklas o at ngay alad furuan, ay anggan at ngay fagsuksuanan.

⁴¹ Ay fagayu at nadalan sanya fag furuan gbul at ngay ramraman, ay at fakbangan fag ngay talun at taw gfalingun kase.

⁴² Nafababo o ay nafae fagusegananun at ngay fawayan.

⁴³ Nafae yud o e tungkul at fiso, ay wo nagubuk anya gina gfawayan.

⁴⁴ Nafasik yud wo kadungug anya, ay nafaragang wo nu gfunan.

⁴⁵ Gina kanya mabaguama, nafakata o sik fufuama. Ay nafae fakaplaun o.

⁴⁶ Yawi, O nunda ban kabavn wan nu gsuksuan o emi? Seduge tua ban nu kadotama o gugat emi takata sik afuy nu girug?

⁴⁷ Saful way o te, taw at leleg wa ngaduge, ay kabul way masakit. O nunda am nawat fag ngay taw kata way nu yud e tungkul?

⁴⁸ Sinu fag taw at yud kabul? O nunda e taw at masaruy fakabulun?

⁴⁹ Fun Dius, wain katsi way o kesug ya emi, kata am nafatuyanan sas Dabid siginan am fagmatuyanun?

⁵⁰ Fun Dius, amatangani nu setain tibak talun at taw nu gfapla gugat angku, am nafili fag fun, ay gagwantan kyay gugat takatanya dasug katsi.

⁵¹ Yawi, nusnga nday au, am ngay fawayan gfalingun angku, am nafili fag fun.

⁵² Anud! Kabavn segi Yawi!