Alubad. 88 - Fanawbuid tagsibaliwas Fakayabian

Alubad 88 Tagidapan fag Taw at Darangin

Laman sa tagfangguna alubad: Kura at ngay kasugfunanan at alubad. Tuy fag alubad, Eman sik taw Esra at nariruk. Nu karuri kata “Fagidapun” fag alubad.

¹ Yawi, kayu menit ay yabi guro au sa emu, aroro o wan ku tagfalangfe.

² Dungugi nu guro au gdarangin sa emu.

³ Aroro ngayuk fagidapun at kindasug sa angku, ay gakabulun kwan.

⁴ Kata au sik taw tagakabulun, at yud e mafalangfe ya.

⁵ Katsi kata nu magamut au si sangay taw at mabulan sis fagfolian. Wo gamatang ya ay ggubuk angku.

⁶ Ay kata yangay nu nafatong o angku sa tangabasad ay at madulum fag lusung.

⁷ Maksvn nu kadotama o angku, kata sik mabyat fag famubaun, ay kata nu nlimus au sat maksvn fag lugwak.

⁸ Nafasik masuya o angku, ay ku ngay fagadgalangan anyayu wan siginan angku. Ankubung au ay kwa makatu ya kalfas.

⁹ Yawi, ku mata gakadulumun wan, aroro sa ku fagidapun. Kayu menit guro au sa emu gfabat ku ngay take.

¹⁰ O nunda at ngay kinbul gamatangan yay am ngay nafakamulun at madulo? O ay nunda kabangkad yay laman namauseganan emu?

¹¹ O nunda sis fagfolian gkamatoan yay sabaliwa am fagmatuyanun ay nu mafangesug o?

¹² O nunda ro am ngay nafakamulun at madulo ay at matuyan umlag yay sis fagfolian at maksvn nu madulum? Sanya fag buknga we kamatang ya.

¹³ Yawi! Nu katanya, guro au get gubuk sa emu. Ay galay balabag, gdarangin au sa emu.

¹⁴ Yawi, wain am fagnaiyanun ay am fagnasuksuanun angku?

¹⁵ Siginan nu masisian au, e ngay fagagwantanun kwan, ay arvs anbul kwan. Nagwantan kwan am ngay nafakamulun sa angku at malimu; nu katanya, anmomuy kwan.

¹⁶ Ay am dotama natabun angku. Ay arvs anbul kwan aroro nafalimu o angku.

¹⁷ Fagngabak menit, kadasug sa angku takatanya fagayu, kata sik lugwak tagligung angku.

¹⁸ Nafayayu o siginan angku ku ngay kalongan ay ku ngay fagadgalangan, ay ku ufud fagmadulumun way lang.