Alubad. 86 - Fanawbuid tagsibaliwas Fakayabian

Alubad 86 Darangin laman Dius Ggubuk

Dabid at darangin.

¹ Yawi, dungugi ay balusi ku darangin, aroro sik tagidapan au.

² Dirii tua angku, aroro matuyan ktua gugat sa emu. O wan ku Dius, falangfei angku am fagsuguan, aroro gafanud ktua sa emu.

³ Fun Dius, afanyui angku, aroro nu gdarangin au sa emu fagngaba wak menit.

⁴ Fun Dius, foni sa angku am fagsuguan sik fagusegananun, aroro gdarangin ktua gugat sa emu.

⁵ Fun Dius, kabavn matuyan tuo. Ay mafalganan yangay o gfalyam ngay taw at asalanan, ay mafangesug tuo sas fagayu taget sa emu gubuk.

⁶ Yawi, dungugi nu guro au gdarangin sa emu te, afanyui angku!

⁷ Gina au e fagidapun, guro au emu, aroro saful au te, gbalus tuo angku.

⁸ Fun Dius, we dius tagfasud emu. Ay we mafakamulun takata am nafakamulun.

⁹ Fagayu am nawat fag ngay gaban taw tagsiginan sangay talun kadasug sam daga salubangan, laman nanrungan nanseg emu, ay namauseganan am ngayan,

¹⁰ aroro o way lang Dius; am fagmabalyananun ay am ngay nafakamulun maksvn nu madulo.

¹¹ Yawi, foyungi sa angku am balyawvtan laman mafafaning au am fagmatuyanun. Fasadii ku namatangan, laman gsuyu ktua emu.

¹² Ku Fun Dius, gseg au emu sas fagdaul ku amatanganan. Kabavn, gfauseganan au am ngayan,

¹³ aroro matuyan tua nu kesug o angku. Nafalangfe tuo angku siginans fakabulun.

¹⁴ Dius, ngay taw takamatungudun ay at madot kakbang angku laman namabul. Kanya fagayu we namatangan sabaliwa emu.

¹⁵ Fun Dius, dewa katanya, mafangafanyu tuo, ay mafanggubuk, ay matuyan ay mafangesug, ay di o masakit gfangadotama.

¹⁶ Damai ay afanyui angku. Fabitsugi, ay falangfei angku, aroro au wan am fagsuguan.

¹⁷ Yawi, fae fakatoglagani te, si tuo angku, laman ku ngay fawayan lumag ay umkapla. Aroro o wan ku taggubuk ay ku tagfasun.