Alubad. 84 - Fanawbuid tagsibaliwas Fakayabian

Alubad 84 Guseganan Gsakbo sas Dius at Bale

Laman sa tagfangguna alubad: gasfuan ngay fagfawangun ke bakyang. Kura at ngay kasugfunanan at alubad.

¹ Yawi at Mabalyanan, am bale maksvn nu masine.

² Yawi, maksvn nu kaylat au nansakbo sam bale. Ay sas fagdaul ku amatanganan, guro au guseganan sa emu, o wan tagleleg fag Dius.

³ Yawi at Mabalyanan, ku Fun ay ku Dius, dewa ngay maya ay alfasang gfugad tua ay griangan munakbang sim fagirugan.

⁴ Mauseganan ngay taw tagbanwan sim bale; kabavn kanya fagayu gseg emu.

⁵ Mauseganan ngay taw at kinke fagmabitsugun siginan emu ay takaylat tua gugat glao sam bale.

⁶ Gina ban kanya fagayu glao sis datag at nafangayan te, Baka, Dius ban gfae ngay bulbug sanya, ay karak tua ban, nu katanya, umke ngay bunaw ban.

⁷ Ay kanya fagayu kaduge glao, kafamut at fagmabitsugun yakmay andasug sas Dius at daga salubangan sas Siun.

⁸ Yawi, Dius at mabalyanan, Akub at Dius, dungugi ku darangin!

⁹ Dius, damai tua em fun, ay foni sa anya nusnge wain, aroro siginan nu gugwag o sa anya langis, nafili o anya laman em tagfangguna.

¹⁰ Dewa sik menit way nu gbanwan au sim bale, amanabayan yap tua nu sik libuk menit nu gbanwan au si sik masine fag bale. Dius, kaylat kway dewa au sik tagluang wayam bale at sakbawan, abat ngate, manabayan nu gbanwan au sit mauri fag ngay taw at bale.

¹¹ Yawi em Dius, o wan em tagbalabag, ay em taggubuk, ay nafasik takadungug o emi, kata menit nu gyamag sa emi. Ay di o gsuksuk nusnge wain at masine sas fagayu tagugali at matuyan.

¹² Yawi at Mabalyanan, mauseganan sik taw tagafanud sa emu.