Alubad. 83 - Fanawbuid tagsibaliwas Fakayabian

Alubad 83 At Mauri fag ngay Talun

Asaf at alubad.

¹ Dius, lag gfabayan emi! Wain am fagmaraganganun yay gugat? Fakamuluni wan kata am algan!

² Damai am ngay fawayan; kanya fagayu kamanagsag guro gina namawayan, ay kamatungudun te, gbabo.

³ Kanya fagayu anke ngay masuksuk fag algan at mauri, sam nafili ay sam fakesugun fag ngay taw.

⁴ Kanya fagayu glong te, “Bastam, namabul watam ngay taw Israel laman ban kanya fagayu wa kamatang ya.”

⁵ Kanya fagayu ansadi ay anke algan mauri laman namawayan emu.

⁶ Kanya fag ngay taw at kinsadi: ngay taw Edum, ngay taw Ismael, ngay taw Muab, ngay taw Agri,

⁷ ngay taw Gebal, ngay taw Amun, ngay taw Amalek, ngay taw Filistia ay ngay taw Tiru;

⁸ ay galo yangay sanya ngay taw Asirya laman nanggubuk Lut at ngay kasugfunanan.

⁹ Yawi, baboi wan anya fagayu, kata am nafakamulun sa sangay taw Midyan, ay kata yangay am nafakamulun sas Sisera fag fun tagfawayan, ay sas fun Abin, gina kanya fagayu sis Liskung Kisun.

¹⁰ Kanya fagayu anbul sis furuan Endur, ay at ngay bilug andan ay ansik ngay famataglu fananumun.

¹¹ Ay fabuli wan at ngay tagfangguna kata am nafakamulun sas Ureb, ay sas Seeb, ay sas Seba, ay sas Salmuna.

¹² Kanya fagayu nalong te, “Nangagbilug watam Dius at nafili fag talun laman at fagnamafangonan.”

¹³ Ku Dius, fasaruayani anya fagayu kata ngay lukbu ay kata tagmara nu gfalayug upa.

^14-15 Irugi wan kanya fag ngay taw kata ngay fun kayu sasad araw, ay ngay tanum sa sangay fungsu nu kairug. Ay fafaloi anya fagayu siginan am nawat fag fulug, ay falimui siginan am nawat fag tagmara at maksvn.

¹⁶ Yawi, faplai anya fagayu yakmay natoglag emu.

¹⁷ Kaduge gleleg, faplai ay falimui anya fagayu, ay umbul nangus sat fakaplaun,

¹⁸ laman ngay taw sumaful te, o wan, Yawi, Tiba Tungud fag Dius sas fagdaul daga.