Alubad. 80 - Fanawbuid tagsibaliwas Fakayabian

Alubad 80 Darangin laman Dius Ggubuk ngay Taw Israel

Asaf at rirukan laman sa tagfangguna alubad. Nu karuri kata “Tagsis Nasadian fag ngay Barugwak.”

¹ Israel at Tagalaga, malunggung o sim faglunggungan sis wabilug duak awatan ke ngay fakfak. Dungugi emi, aroro o tua tagfangguna ay tagtabanan Use at ngay kasugfunanan kata ngay tupa.

² Ay yamagi sas Efraim ay Benamin ay Manase at ngay kasugfunanan. Falagi am fagmabalyananun! Akbangi ay falangfei emi.

³ Dius, fafolii wan em fagmanabayanun, ay falagi sa emi am fagmasineun, laman umlangfe ami.

⁴ Yawi, at Mabalyanan fag Dius, Seduge ya ban nu kadotama o gugat emi? Ay ginain ya ban nu gbalus o em darangin?

⁵ Nafaksvn o em fakabaluun, ay arvs ginum wami em liasun.

⁶ Nafabayan o em fakbangan fag ngay talun nu gfawayan ay nu gfalingun emi.

⁷ Dius at Mabalyanan, fafolii wan em fagmanabayanun, ay falagi sa emi am fakafanyun, laman umlangfe ami.

⁸ Kata ami sik wat ubas am nabuba siginans talun Igiptu. Ay am natanum sim naiyan fag ngay taw at daga.

⁹ Ay nafasine o tuy fag daga, ay wat ubas nalalid ay anfagdaul sas fagdaul talun.

¹⁰ Ay kafag wat ubas anke ngay sanga, ay anrabung ay narungrung ngay buksul ay anggan tangabat fag ngay fun kayu sidru.

¹¹ Ay kafag ngay sanga andasug ay anfagdaul sas Dagat Mediteranyu tagsis fakayabian ay sas Liskung Eufrates tagsis fakamenitan.

¹² Dius, wain am fagnaiklasun am tanuman at alad? Fagayu taw tagdalan sa emi gfangkamul em ngay rawvg.

¹³ Ngay buswak ay tiba yak mela nangon yangay em tanuman.

¹⁴ Dius at Mabalyanan, afolii sa emi, Ay siginan am fagbanwanan sbanwa, damai emi, ay amatangi tua emi,

¹⁵ ami takata sik wat ubas am natanum siginan am fagmabalyananun. Amatangi gugat emi am ngay sisian am nafagurang laman sam fagusegananun.

¹⁶ Dius, e nagatvng wan ay e nairug am natanum fag wat ubas. Nu katanya, siginan am dotama, faurianani wan fagayu at nafakamulun takatanya.

¹⁷ Nafili o ay nafabitsug sik taw laman sam fagusegananun. Nu katanya, gubuki tua anya!

¹⁸ Ay fafolii yap sa emi em fagmabitsugun, laman ban guro tuami gugat emu. Ay di ban mi gtalyuyan ya emu.

¹⁹ Yawi, em Dius at Mabalyanan, fafolii wan em fagmanabayanun, ay falagi sa emi am fakafanyun, laman umlangfe ami.