Alubad. 79 - Fanawbuid tagsibaliwas Fakayabian

Alubad 79 Darangin laman Gfalangfe Talun Israel

Asaf at alubad.

¹ Dius, tibak talun at ngay taw nababo am nafili fag talun, ay nafasuya am bale, ay naiklas furuan Erusalem.

² Ay kanya fagayu nafaon am ngay fagsuguan at kinbul sa tagfangagat fag ngay manuk tungud, ay sa tiba yak mela at madot.

³ Ay kafag ngay taw naugwag am ngay taw at taguk sas fagdaul Erusalem kata sik mamam. Ngayu at kinbul, ay we namoli ya.

⁴ Ay at munakbang si emi fag ngay talun at taw kabavn kase gfalingun ay gfae fakaplaun emi.

⁵ Yawi, seduge ban nu kadotama o gugat emi? O nunda ban we fakatabuan ya? At kaksvnan nu kasulup o emi kata sik afuy nu masugba!

⁶ Am fakadotamaun tiba yakman ktalun at ngay taw. Fadasugi wan am dotama sa kafag ngay talun at taw at yud gafanud ay at yud gdarangin sa emu.

⁷ Aroro kanya fagayu nafabul am ngay taw Israel ay naiklas at fagbanwanan.

⁸ Falyami wan em ngay mangaguyang at asalanan, Lag gtap emi te, e asalanan ami aroro siginan em ngay mangaguyang at asalanan. Ay afanyui wan emi, aroro maksvn wan em fagidapun.

⁹ Em tagfalangfe fag Dius, gubuki emi laman mananseg tuami emu. Falangfei emi ay falyami em ngay asalanan, laman ban ngayu tua tagfauseganan emu.

¹⁰ Wain am fagnaylatun tibak talun nu glong sa emi te, “Dada wan ay Dius?” Kaduge ami gdama, fasudi sa kafag ngay talun at ngay taw, aroro kanya fagayu nafabul am ngay fagsuguan.

¹¹ Dungugi at natabanan fag ngay taw at fagetun, ay siginan am fagmabalyananun, falfasi anya fagayu aroro e ganamabulun wan anya fagayu.

¹² Dius, faurianani fitu ginan ngay talun at munakbang si emi, aroro kanya fagayu nafalingun emu.

¹³ Gina ban o nabalus emi, am nafili fag ngay taw, kata ngay tupa sim fagnamafangonan, gfauseganan ban mi gugat emu, ay anggan ban sat fadogan em ngay kasugfunanan dumungug yangay sabaliwa emu.