Alubad. 78 - Fanawbuid tagsibaliwas Fakayabian

Alubad 78 Dius Gufud at ngay Taw

Asaf at alubad.

¹ Ku ngay kaiban, dungugani ku ngay foyungan.

² Namoyung au sa ayu sik ngay fansulitan, sabaliwa at kinlangfe at maidap katogdungug.

³ Takatanya fagayu nadungug watam ay nasaful siginan tam ngay mangaguyang.

⁴ Ay wa ban tam gsuksuk sa tam ngay sisian, anggan sat fadogan fag ngay sugfun. Ay nanlong ban tam sa anya fagayu te, “Yawi mabalyanan, ay madulo at ngay nafakamulun.”

⁵ Kanya nafon at suguan sa sangay taw Israel, Akub at ngay kasugfunanan, ay nasugu yangay sa tam ngay mangaguyang te, foyungi sat ngay sisian,

⁶ laman ban at fadogan fag ngay kasugfunanan sumaful yangay takatanya fag ngay suguan, ay gfoyung yangay ban sat ngay sisian.

⁷ Nu katanya, galay ban sik kasugfunanan gafanud tua gugat sas Dius, ay di ban kalyam at ngay nafakamulun, ay gfaning tua ban gugat at ngay suguan,

⁸ nu katanya, kanya ban fagayu di kata at ngay mangaguyang at nafamabo, ay at nafamaogatun, ay at yud e fagafanudun ay at yud matuyan sas Dius.

⁹ Di ban kata ngay taw Efraim; dewa e ngay godun, gina gfawayan, nalagyu way.

¹⁰ Kanya fagayu wa nafaning Dius at nasadian sa anya fagayu, ay wa naylat gugali kata at suguan.

¹¹ Ay kanya fagayu wa namatang Dius at nafakamulun fag ngay madulo.

¹² Tam ngay mangaguyang nalag Dius at nafakamulun fag ngay madulo sis datag Suan, sis talun Igiptu.

¹³ Dius nafud dagat ay nafalanggang, ay sanya nu gtaban ngay taw Israel; ay lino anduak tigyangan nasumbalian kata duak alad.

¹⁴ Dius gtabanan ngay taw Israel: Ay kayu menit, kanya nafangguna anya fagayu siginan sik linyabu, ay kayu yabi, siginan sik afuy at yamag.

¹⁵ Ay gina ngay taw sis talun at yud e taw, Dius nasulbung ngay gang, ay mamam naduksun sanya ginan kata sik ngay bulbug, laman kanya fagayu e fanginum.

¹⁶ Ay nafafamilugan kafag mamam siginans gang kata sik liskung.

¹⁷ Dewa katanya, tam ngay mangaguyang nafataglayun way gfakamulun at mauri, ay nafamabo Tiba Tungud fag Dius gina sit yud e taw fag talun.

¹⁸ Ay kanya fagayu nafaskud Dius siginan nu get at fakaylatun fag ngay fakonun.

¹⁹ Ay kanya fagayu nafamayud sas Dius ay nalong te, “O nunda ro Dius mafae fakonun sis talun at yud e taw?

²⁰ Anud, kanya nafae mamam gfamilugan siginans gang, o ay nunda ro mafon yangay antam tinapay ay yamas?”

²¹ Yawi nu nadungug ngay taw Israel nu kamayud, kanya maksvn nu kadotama, kasugba sik afuy.

²² Aroro kanya fag ngay taw wa gafanud te, Yawi mafalangfe anya fagayu.

²³ Dewa katanya, Yawi nasugu ngay linyabu te, luangi sakbawan banwa,

²⁴ ay nafadasug sa anya fagayu ngay fakonun tagsiginans banwa at nafangayan te, mana.

²⁵ Kafag fakonun kanya wan ngay tagbarita at fakonun, ay Dius nafon sanya fagayu yakmay anfanud kon.

²⁶ Siginan at fagmabalyananun, kanya nafatagmara siginans fakamenitan, ay nafadasug yangay tagmara siginans fasiunan fag alvngvdan.

²⁷ Kanya nafafaragfag sa anya fagayu ngayuk manuk tungud, kayu lagnas sis tigyangan dagat laman at fakonun.

²⁸ Ay kafag ngay manuk tungud narapyagan sat ngay ligung bale ramit.

²⁹ Dius nafon sa anya fagayu at fakaylatun fag fakonun, ay kanya fagayu naon ay napsug.

³⁰ Ay gina ngay taw Israel kon kafag yamas,

³¹ Dius andotama kafag ngay taw Israel, ay nafabul at ngay baguama at maseganama.

³² Dius dewa nafakamulun takaksvn nya, kanya fagayu gfataglayun yay gugat nu gasalanan. Ay dewa nafasure at ngay madulo, kanya fagayu wa gafanud.

³³ Ay ginanya yay, Yawi nafabul ngayuk taw Israel, ay ginanya yangay maksvn nu kalimu ay at leleg we masuad ya.

³⁴ Ay Dius gina nafabul tibak taw Israel, at sawad ankakbang tua sa anya, ay kanya fagayu nafamababaun nadarangin, ay naubun at ngay fagmauriun.

³⁵ Ay kanya fagayu namatang te, Tiba Tungud tua fag Dius at fagsarigan fag gang ay at Tagfalangfe.

³⁶ Dewa katanya, kanya fagayu nu guseganan, si way lang at ngay nalong. Nu katanya, kamuagan way.

³⁷ Kanya fagayu wa matuyan sas Yawi ay sat Nasadian.

³⁸ Dewa katanya, Dius anfanyu yay kafag ngay taw, ay nafalyam tua at ngay asalanan ay di nafamin nu gfabul. Dius dewa ngayu ginan nu kadotama maksvn, kanya gfaragang tua gugat.

³⁹ Dius namatangan te, kanya fagayu taw way, ay masakit way nu kalyam kata tagmara nu nadalan.

⁴⁰ Kanya fagayu gina sis talun at yud e taw, malayun nu gfae fakabaluun Dius siginan nu kamabo anya.

⁴¹ Kanya fagayu gfataglayun nu gfaskud ay nu gfadotama Israel at Dius yud e Malong.

⁴² Ay kanya fagayu wa gamatang ya Dius at fagmabalyananun, gina gfalangfe anya fagayu siginan at ngay fawayan.

⁴³ Ay wa yangay gamatang ya Dius at nafakamulun at madulo sis datag Suan sis talun Igiptu.

⁴⁴ Kanya nafasik taguk ngay liskung at mamam, ay nusnga sinu fag taw we mananginum ya.

⁴⁵ Kanya nafadasug ngayuk lango ay ngayuk fio laman gfaurianan ngay taw Igiptu.

⁴⁶ Ay nafadasug yangay ngay liung laman nangon at nainlufuyan natanum.

⁴⁷ Ay kanya nafadasug at marios fag arak, ay yelu fag arak takadaul ngay gang ayu sirut, nalukyuk at ngay tanum wat ubas ay at ngay tanum kayu sikumuru.

⁴⁸ Limbad ay arak at kintugas nafabul wan at ngay fagbaugun.

⁴⁹ Dius maksvn nu kauri kafag ngay taw, ay nafadasug sa anya fagayu ngay fagidapun, ay nasugu yangay at ngay tagbarita laman namaurianan.

⁵⁰ Dius nafafasludan at dotama, ay wa nafalangfe ya ngay taw Igiptu, abat ngate, nafabul way siginan at maksvn fag fakasaitun.

⁵¹ Galay sik talanan sis talun Igiptu, si sangay taw Kam at mesa bale ramit, kanya nafabul fagayu at ngay baguama taguna.

⁵² Sanya ginan, kanya nafaduksun at ngay taw siginans Igiptu, ay nalaga kata sik ngay tupa sit yud e taw fag talun.

⁵³ Dius naufud tua at ngay taw, ay nafalubgub at ngay fawayan sas dagat, nu katanya, at ngay taw we fakalimuun ya.

⁵⁴ Dius nataban at ngay taw sat nafalganan ay at yud e malong ay at ke ngay buksul fag talun. Ay kanya nagbilug kafag talun siginan at fagmabalyananun.

⁵⁵ Kanya naiyan ngay taw tagbanwan sanya, ay nafud kafag daga sa sangay taw Israel at ngay gaban, laman at fagagbilugun ay at fagbanwanan.

⁵⁶ Dewa katanya, kanya fagayu nafaskud ay nafamabo Tiba Tungud fag Dius.

⁵⁷ Kanya fagayu natalyuyan ay nafamabo Dius, ay kanya fagayu kata at ngay mangaguyang at yud e tungkul ya, ay at kinkata sik godun at yud katon ya.

⁵⁸ Kanya fagayu nawat ngay fagsegan sa sangay fagnansegan; siginan takatanya, nafauri Dius.

⁵⁹ Dius nu nasaful ngay taw Israel at nafakamulun, kanya maksvn nu kadotama, ay naiyan anya fagayu.

⁶⁰ Dius naubun at fagbanwanan fag bale ramit tagsis furuan Silu, nu inda nu gbanwan ste sfagdaul daga.

⁶¹ Ay kanya nafabayan at ngay fawayan nu gbuba Fagsuadan at Nasadian, tagfasaful Dius at fagmabalyananun ay at fagmasineun.

⁶² Dius dewa nagbilug at ngay taw, kanya nafababawan ay nafafabul sat ngay fawayan, aroro kanya maksvn nu kadotama.

⁶³ Ay kafag ngay fawayan nairug wan ngay taw Israel at ngay baguama, nu katanya, we famaindugan ya sat ngay baguina.

⁶⁴ Ay at ngay tagfon fanggalangun anbul sis awayan, ay at ngay mangena we buknga ya kabalu at mesa mangama.

⁶⁵ Dewa katanya, Fun Dius kata sik taw at bagu kafulo, ay kata sik mabitsug fag taw at kinseganama aroro nainum fanlangu.

⁶⁶ Kanya nafafalo ay nafae fakaplaun fagayu at ngay fawayan.

⁶⁷ Sanya ginan, kanya naiyan way Use ay Efraim at ngay kasugfunanan,

⁶⁸ ay at nafili, Uda way at ngay kasugfunanan, ay nafili yangay Buksul Siun, aroro kesug.

⁶⁹ Ay sanya fag buksul, kanya nafalindug at bale: takabat sbanwa ay takaogat sdaga at yud ginbalian kabavn.

^70-71 Dius nafili Dabid laman at fagsuguan. Gina galaga ngay tupa, nafili anya laman sik tagalaga ay tagfunan Dius at fagagbilugun fag ngay taw Israel.

⁷² Dabid nafunan ngay taw Israel, kata at matuyan ay at ke fagsafulun fag tagalaga tupa.