Alubad. 77 - Fanawbuid tagsibaliwas Fakayabian

Alubad 77 Guseganan Gina e Fagidapun

Laman sas Edutun, tagfangguna alubad: Asaf at alubad.

¹ Guro au sas Dius laman kanya gbalus ku darangin.

² Galay au gafanawa, kakbang au sas Fun Dius. Gfabat au ku ngay daluap fagngabak yabi, dewa katanya, kwa nsun.

³ Ay galay au namatang Dius, kabalu au ay kamomuy.

⁴ Dius gsalag way nu gtiug au. Maksvn nu gafanawa au ay kwa maringang ya.

⁵ Gamatang kway gugat at kinlangfe fag ngay menit ay fag ngay banwa.

⁶ Ay gamatangan au gugat ay ginto sa ku sadili te,

⁷ “O tam Fun Dius ban manga nu gaiyan angku, kaduge tua nu gleleg au? Ay o waban manga kaylat ya angku?

⁸ O kabavn waban manga nu yud mafangesug? Ay o waban manga gfafasludan ya at fatuyanan?

⁹ O kanya manga nalyam wan nu gfangafanyu? O siginan wa manga fia at dotama at fagyudun ya mafangafanyu?”

¹⁰ Nu katanya, nalong au te, “Kabalu au, aroro Tiba Tungud fag Dius wa ggubuk ya angku.”

¹¹ Yawi, gamatangan au am ngay nafakamulun, anggan am ngay nafakamulun ebi at madulo.

¹² Ay kwa ban kalyam fagayu am ngay nafakamulun at mabalyanan.

¹³ Dius, am ngay balyawvtan matuyan tua. O nunda e tiba yayk dius tagfasud am fagmabalyananun?

¹⁴ Sas fagayu dius, o tua at mafakamulun at ngay madulo. Ay nafalag o sa sangay talun at taw am fagmabalyananun.

¹⁵ Siginan takatanya, nafalangfe o am ngay taw, Akub ay Use at ngay kasugfunanan.

¹⁶ Dius, Dagat Maraska nu nalag emu, gtadtaruyan kata sik taw nu kalimu.

¹⁷ Narak ay nalingsi siginans wa linyabu. Ay nafalimbad o nusnga nday, kata nu gfatos o am ngay banyas.

¹⁸ Siginan tagridribudan fag tagmara, lingsi andungug, ay ngay limbad nayamag, ay fagdaul daga nauigan.

¹⁹ Nadife o dagat dewa ngabasad, ay nusdi am fagdarafan wa kalag.

²⁰ Nataban o am ngay taw kata sik tagalaga tupa, ay nafili o Muisis ay Arun laman tagfangguna.