Alubad. 76 - Fanawbuid tagsibaliwas Fakayabian

Alubad 76 Dius Tagbabo

Laman sa tagfangguna alubad: Gasfuan nu gfawang fagfawangun ke bakyang. Asaf at alubad.

¹ Ngay taw Uda ay ngay taw Israel natoglag tua Dius, ay natuyan tua te, mabalyanan.

² Dius gbanwan sis Buksul Siun sis furuan Erusalem.

³ Ay kanya naiklas ay nalifung sanya at ngay fawayan at ngay banyas tagigang; ay anggan at ngay famalabag, ay at ngay fiso, ay tiba yak fagagbilugun sa nu gfawayan.

⁴ Dius masulo o, ay nu mabalyanan o gtungud tua ngay buksul nu yud guigan.

⁵ At maseganama fag ngay tagfawayan anmomuy ay anbul. Ay nabul tuo siginan anya at ngay nafangkamul.

⁶ Akub at Dius, gina o nasalag, ngay tagfawayan anbul wan, gasfuan at ngay kabayu, ay nu mataygilid kata way nu gtiug.

⁷ Nu katanya, fagayu taw nangus kalimu tua emu. Sinu at magwanta gina o kadotama?

⁸ Sanya sbanwa nainsaful o, ay fagayu taw sas fagdaul daga anlimu ay naragangan.

⁹ Dius, gina o anlindug laman nanginsaful, nafalangfe tuo tagafalingunan fag ngay taw.

¹⁰ Dius, nu kadotama o ngay taw dewa maksvn, takatanya, gfaksvn way laman ngay taw gfauseganan emu! Ay nagbilug o kafag ngay taw at dotama laman am famawayan.

¹¹ Fafasludani tua ay fatuyanan sa ay Dius Yawi. Ay anggan am tagsis ligung fag ngay talun, foni ngay fanggalangun sas Dius, aroro kanya sik fagsuyuun.

¹² Dius gfaragang ngay tagfangguna nu kamatungudun. Nu katanya, ngay fun sas fagdaul daga kalimu anya.