Alubad. 75 - Fanawbuid tagsibaliwas Fakayabian

Alubad 75 Dius Tagfawabilugan

Laman sas tagfangguna alubad: Asaf at rirukan. Nu karuri kata sik alubad taglong te, “Lag Giklas.”

¹ Dius, gfauseganan ami emu, aroro si tuo gugat emi. Ngay taw gkamatoan sabaliwa nu gfakamulun o at ngay madulo.

² Dius nalong te, “Nanginsaful kban matuyan nu ndasug si ku nafalganan fag buknga.

³ Gina ban fagdaul daga nauigan ay gina ngay taw kalimu, gfaogat kban fagdaul daga at fagtungkudan.

⁴ Nalong au sa sangay taw takamatungudun te, ‘Lag am kamatungudun ya.’ Ay nalong kyangay sat mauri fag ngay taw te, ‘Lag am kamanagsag te, mabitsug am.’

⁵ Faragangi wan nu glong am te, ‘Nababo ami.’ Lag am gfaneganama ya.”

⁶ Aroro ngay taw nu gbabo, bundi snga ndaginan fag afud daga,

⁷ nu bunway siginan tuas Dius. Aroro sia tua tagsaful, nusnga sinu tagababawan ay tagbabo.

⁸ Yawi gbitbitan sik taya mapnu fanlangu at maksvn nu malangu at famasaful te, kadotama. Ay kanya gfainum sa sangay taw mauri, ay glong te, “Famini yakmay am anfaurianan.”

⁹ Ay dewa katanya, galubad au ngay alubad tagfauseganan Akub at Dius, ay kdi gfaragang nu gfoyung au sabaliwa anya.

¹⁰ Dius glong te, “Namaragang kban at mauri fag ngay taw at fagmakatuun, ay namamut au sat matuyan fag ngay taw at fagmakatuun.”