Alubad. 74 - Fanawbuid tagsibaliwas Fakayabian

Alubad 74 Darangin Gina e Fagidapun sas Fagdaul Talun

Asaf at alubad.

¹ Em Dius, wain am fagtalyuyanun gugat emi? Ay wain am fakadotamaun am ngay taw, dewa kanya wan am ngay fagagbilugun?

² Dius, amatangi emi. Aroro ami wan ebi am nafili fag ngay taw. Ay o wan tagagbilug ay tagfalangfe emi. Amatangi yangay am fagbanwanan fag Buksul Siun.

³ Ay agvd nanlo o sam bale at kinkirug wan. Damai: am ngay fawayan naiklas wan am bale ay fagayu tagsanya.

⁴ Kanya fagayu guro sim bale ay gfabat at fagtoglagan famasaful te, nababo.

⁵ Ay kanya fagayu naiklas am bale kata ngay taw nu gfuan ngay kayu.

⁶ Ay kanya fagayu nanamul wase ay fiso, ay nanamasing at masine fag afud dingding.

⁷ Kanya fagayu nafasuya ay nairug am bale, ay nafauri yangay am ngayan.

⁸ Ay namatangan te, “Namamomuy watam anya fagayu.” Ay nairug wan ngay fagnansegan emu sis Israel.

⁹ Wami e fagtoglagan ya tagfasaful te, gufud yay o emi. Ay we ngay taglong ya. Ay wami saful ya te, seduge ya ban nu katatuy ami gugat.

¹⁰ Dius, seduge tua ban em ngay fawayan nu gfalingun emu? Ay seduge tua ban nu gfauri am ngayan? O nunda ban kabavn wan?

¹¹ Wain am fagyudun gfaurianan wan? Famini wan anya fagayu.

¹² Em Dius, siginan ebi sfagsigadan, o wan ku Fun. Ay ngayu ginan wo gfalangfe ngay taw sas fagdaul daga.

¹³ Siginan am fagmabalyananun, dagat ankafud. Nafawayan o tagbia ayu daul fag ngay tagleleg sis dagat, ay narufa o at ngay alfuyu.

¹⁴ Narufa o Libyatan at alfuyu, ay nafaon at bilug sa sangay mela sis yud e taw fag talun.

¹⁵ Gfae ngay bulbug o ay gfae ngay liskung, ay gfalanggang o at yud kalanggang fag ngay liskung.

¹⁶ O wan at nawat menit ay yabi, ay at nafoli sit mesa fagmafolianan.

¹⁷ Ay o yangay at nafae fatuan daga, ay at nafae mangune ay at nafae abagat.

¹⁸ Yawi, amatangi at yud e fagsafulun fag ngay fawayan nu gfalingun emu ay nu gfauri am ngayan.

¹⁹ Lag gfabayan am ngay taw nu gababawan sat ngay fawayan at madot takata sik ngay idu ayu daul, aroro ami kata waymi sik ngay labikung. Amatangi am ngay taw aroro gidapan.

²⁰ Ay amatangi tua gugat am nasadian sa emi, aroro em talun kata nu madulum aroro ngayu takamabul.

²¹ Lag o nangus gfabayan at yud e kwa nu gafaplan. Abat ngate, gfauseganan tua nangus emu.

²² Dius, fakamuluni wan kata am algan. Ay amatangi gugat te, at yud e fagsafulun fag ngay taw gfalingun gugat emu.

²³ Faragangi wan am ngay fawayan nu guro gugat kadotama.