Alubad. 72 - Fanawbuid tagsibaliwas Fakayabian

Alubad 72 Darangin laman sas Fun

Sulumun at Rirukan

¹ Dius, foyungi sas fun nu setain at kasakan nu ginsaful, kata am fagmatuyanun,

² laman matuyan tua nu ginsaful am ngay taw, kaugat wan sa sangay yud e kwa.

³ Ay umkayu nangus at ngay fananumun at rawvg tagsi sangay buksul, ay anggan nangus at ngay taw umke fagmanabayanun aroro at fun matuyan tua.

⁴ Kafag fun ban nangus taggubuk ay tagfalangfe at ngay yud e kwa, ay tagfaurianan fagayu takamalingun.

⁵ Kabavn tua ban nangus am ngay taw nu gsuyu emu, kaduge ban e menit ay e magdanun, ay sat fadogan fag ngay kasugfunanan.

⁶ Kanya nangus fag fun kata arak tagfarugme ngay tanum ay daga.

⁷ Kaduge ban nangus kanya gfunan, at matuyan fag ngay taw umke fagmanabayanun. Ay umke ramraman ban nangus kaduge e magdanun.

⁸ Kanya tua ban nangus tagfunan siginan sik dagat anggan ndasug tsiuy baliwa fag dagat, ay siginans Liskung Eufrates anggan sa sik fungfung daga.

⁹ Ngay tagbanwan sit yud e taw fag talun nangus gsuyu anya. Ay at ngay fawayan nangus gfababaun wan sa anya.

¹⁰ Tarsis ay anggan ngay furu tagsis wabilug dagat at ngay fun ay Syeba ay Seba at ngay fun, namon nangus at ngay famonun sa anya.

¹¹ Ay kanya ban nangus fag ngay fun gfababaun tua sa anya. Ay fagayu ban nangus talun at taw gfaning tua anya.

¹² Aroro kanya gfalangfe tua ngay yud e kwa taget gubuk sa anya, gina yud e fagnangakbangan ya.

¹³ Kanya kafanyu yangay ngay taw at yud e kwa, ay gfalangfe at mamomuy fag ngay taw siginans fakabulun.

¹⁴ Ay kanya gfalangfe kafag ngay taw siginan at madot ay takamalingun fag ngay taw, aroro ngay tagidapan fag ngay taw at leleg mafanud sanya fag fun.

¹⁵ Ngaduge tua ban nangus kafag fun nu gleleg. Ay e gfon ban nangus sa anya gintu tagsiginans Syeba. Ngay taw nangus gdarangin tua gugat anya laman Dius gfon sa anya nusnge wain.

¹⁶ Takagutlu nangus sas fagdaul talun umkayu, anggan sas tungud buksul. Ngay fun kayu at ke rawvg ngayu tua nangus gugat kata sis talun Lebanun fag araw. Ay ngay taw nangus sa sangay furuan umkayu kata ngay makmak nu ngayu.

¹⁷ Amatangi tua ban nangus gugat kafag fun at ngayan, kaduge ban e menit. Dius nangus gfae ramraman sas fagayu talun, aroro siginan kafag fun, ay tibak talun at ngay taw lumong te, Dius nafae ramraman kafag fun.

¹⁸ Segi Yawi, Israel at Dius, aroro kanya way lang at mafakamulun takatanya fag ngay madulo.

¹⁹ Nu katanya, kabavn segi anya. Ay at fagmasineun nangus umfagdaul sas fagdaul daga. Anud! Katanya wa fia!

²⁰ Ste way tsigon Dabid, Ese at baguama, at ngay darangin.