Alubad. 71 - Fanawbuid tagsibaliwas Fakayabian

Alubad 71 Sik Mafagtainan at Darangin

¹ Yawi, o wan ku fagnangakbangan ay ku fagnansarigan. Lag gfabayan ay gfapla angku. Namalangfe o angku aroro matuyan tuo.

² Dungugi ay falangfei vtv angku.

³ Aroro o wan ku tagfalangfe ay ku fagsarigan takata sik gang at mogat. O wan ku fagnanuksuanan.

⁴ Ku Dius, falangfei angku siginan at mauri ay at takamaidapan fag ngay taw.

⁵ Yawi, ku Dius, o wan ku fagsegan. Siginan yay nu masisian au, gafanud kwan sa emu.

⁶ Ay siginan nu kasalug au, o wan ku tagufud, ay nadiri tuo angku. Nu katanya, kabavn gfauseganan au emu.

⁷ Ay ansik fagfaningan au sas fagayu, aroro o tua tagdiri angku.

⁸ Fagngabak menit gfauseganan au emu, ay gfoyung au am fagmasineun.

⁹ Ay dewa kban mafufuama wan, lag gubun angku. Ay nu momuy kwa ban, lag gfabayan angku.

¹⁰ Aroro ku ngay fawayan gkamatoan laman namabul angku.

¹¹ Kanya fagayu glong te, “Dius nafabayan wan anya, nu katanya, namafalo watam ay nanggamat anya, aroro wa ro e manamalangfe ya anya.”

¹² Ku Dius, lag o ngayayu! Sakiti gubuki angku!

¹³ Takamuagan sa angku nangus umkapla ay umkamin. Ay fagayu nangus takaylat namauri angku, kanyai way at nangafaplan.

¹⁴ Ay nu sa angku, nu gseg au, sa way lang emu. Ay kaugat yay nu gfauseganan au emu.

¹⁵ Ay kabavn gfoyung au am fagmatuyanun, ay sabaliwa nu gfalangfe o, dewa yud au mafafalong fagayu.

¹⁶ Yawi, ku Fun, namauseganan au emu sam bale, aroro sam ngay nafakamulun at madulo. Ay namoyung au sa sangay taw te, o wan at matuyan.

¹⁷ Dius, siginan nu masisian au nafoyung o sa angku sabaliwa am ngay nafakamulun at madulo. Ay dasug katsi gfoyung kyay gugat sa sangay taw sabaliwa am ngay nafakamulun at madulo.

¹⁸ Dius, dewa au mafufuama wan ay gubanun, lag gfabayan angku. Agbilugi angku laman ban mafafoyung kyay am fagmabitsugun ay am fagmabalyananun sat fadogan fag ngay sugfun.

¹⁹ Dius, we mafasud am fagmatuyanun ay am ngay fakamulun at maksvn nu madulo. Ay nusnga sinu, we mafasud emu.

²⁰ Dewa o nafadasug sa angku ngayuk fagidapun, nafon tuo angku sik fagmabitsugun. Ay kata au sik taw at kinbul, am fagnamalelegun.

²¹ Gfafoli ban o sa angku famauseganan gtungud yay ebi ginan, ay gdog yay ban o gfasun angku.

²² Ku Dius, aroro siginan am fagmatuyanun, gfawang au fagfawangun ke ngay bakyang laman gfauseganan emu. Israel at Dius at yud e Malong, galubad au gfauseganan emu gfasfuan nu gfawang au sik fagfawangun.

²³ Aroro nafalangfe tuo angku, guro au guseganan kaduge au galubad sa emu.

²⁴ Fagngabak menit, gfoyung au te, matuyan o, aroro ngay taw takaylat nu gafaurianan au ankapla way.