Alubad. 7 - Fanawbuid tagsibaliwas Fakayabian

Alubad 7 Kabavn Dius at Fakamulun Matuyan

Dabid at nariruk tuy fag alubad, sabaliwa Kus tagsiginans Benamin at gaban.

¹ Yawi, ku Dius, gsarig au sa emu. Falangfei angku siginan ku ngay fawayan!

² Bunway o, we makatu gfalangfe angku, aroro ku ngay fawayan kata sik ngay liun kaylat namasadsamanan at nagamat at ngay afud bilug.

³ Yawi, ku Dius, kanya fagayu kamuag glong te, nafakamulun au at mauri,

⁴ ay nafasud au unu at mauri sa ku fagadgalangan fia, ay naago au unu ku ngay fawayan at ramraman, deyud e nafakamulun sa angku at mauri. Duan, kwa nafakamulun fagayu takatanya. Nu nafakamulun kway ro takatanya,

⁵ lag ro kasalag ya ku ngay fawayan nu gfafalo ay nu ggamat angku. Ay lag yangay ro kasalag ya angku dewa kanya fagayu gsiad angku yakmay au anbul, ay fabayani wan ku bilug sanya sdaga.

⁶ Yawi, falagi wan am dotama sa ku ngay fawayan takauri angku. Ay fasurei am fagmatuyanun.

⁷ Fafuli fagayu talun sam day ligung, ay fagtainani.

⁸ Yawi, insafuli ngay talun at taw, nu sinu at ke asalanan. Fatoglagi sa sangay taw te, kdi e asalanan aroro nasaful o te, matuyan ktua ay kdi e nafakamulun at mauri.

⁹ Faragangi wan fagayu taw nu gfakamulun at mauri, ay fae fagmanabayuni sas fagayu at matuyan. O wan at matuyan fag Dius, taginsaful em ngay amatanganan ay em fakaylatun.

¹⁰ Dius wan ku tagbalabag, ay gfalangfe tua ngay taw tagugali at matuyan.

¹¹ Dius wan at matuyan fag tagwabilug, ay kayu menit gfalag at dotama sas fagayu taw tagfakamulun mauri.

^12-13 Kanya fagayu nu dway kaylat gubun at ngay asalanan, Dius mafalganan gugat gfaurianan. Kata sik tagfawayan tagfalganan at ngay fagagbilugun sa nu namawayan, kata nu gfaglat at fiso, gton at godun, ay gfatiuan banyas at ke afuy.

¹⁴ Damai, kanya fagayu gfafion at fagmauriun, ay gfasalug at fakamuaganun.

¹⁵ Ay kanya fagayu kata sik takali lusung laman sat ngay iba, dewa katanya, kanya yay ban fagayu at nangatong sanya.

¹⁶ Ay sumaful tam te, kanya yay ban fagayu at kumfaurianan sat nafakamulun fag fagmauriun.

¹⁷ Gfauseganan au Yawi aroro matuyan. Ay galubad au sik fagusegananun sas Yawi, Tiba Tungud fag Dius.