Alubad. 68 - Fanawbuid tagsibaliwas Fakayabian

Alubad 68 Dius Gbabo at ngay Fawayan

Laman sa tagfangguna alubad: Dabid at alubad.

¹ Dius nangus gfakamulun wan, laman namasaruayan at ngay fawayan, ay laman fagayu takadotama anya umlimu ay lumagyu.

² Dius nangus gaiyan wan kanya fag ngay taw, kata tagmara nu gfalayug anus. Ay at mauri nangus fag ngay taw kabul wan sis Dius at daga salubangan, kata way sik lune fag salung takalanang sas afuy.

³ Dewa katanya, at matuyan fag ngay taw guro tua guseganan sis Dius at daga salubangan.

⁴ Alubadi sas Dius ngay alubad tagfauseganan anya. Fabati ay segi Dius tagsis tungud linyabu; at ngayan, Yawi. Useganani sit daga salubangan!

⁵ Dius gbanwan sit fagbanwanan at yud e malong, ay kanya galaga ngay sisian at yud e fagtainan ya, ay ggubuk ngay fagbubayun.

⁶ Kanya gfae ngay kalongan tagsadilian fag ngay taw, ay gluang ngay sakbawan ubung laman gfalfas at maubungan fag ngay taw, ay kanya fagayu guseganan. Dewa katanya, takamabo fag ngay taw, nu gbanwan sa way at yud e gtugbung fag daga.

⁷ Ku Dius, nafalfas o am ngay taw siginans Igiptu, ay nataban tuo sat yud e taw fag talun.

⁸ Daga nauigan ay narak sis Buksul Sinay sim daga salubangan: Ay Israel at Dius ansure sanya.

⁹ Nafarak tuo kasakan, ay nafae fagmanabayanun sam ngay taw at daga at kin-gong wan.

¹⁰ Am nafili fag ngay taw nabanwan sanya, ay siginan am fagmasineun nafon o sat yud e kwa fag ngay taw nusnga setaw at ngay fagayudanun.

¹¹ Fun Dius nafadasug at suguan, ay ngayu at nafadungug kafag barita:

¹² “Ngay talun at ngay fun anggan at ngay mesa tagfawayan nalagyu.” Ay ngay taw Israel at ngay mangena gafudan wan at ngay nafawayan at ramraman at kinfamato.

¹³ Dewa ngay tagalaga ngay fagbaugun, e kwa yangay ban ramraman, takata sik ngay awatan fag ngay labikung at fakfak masifigan salapi, ay at ngay sigyu masulo kata gintu.

¹⁴ At mabalyanan fag Dius gina nababo kafag ngay fun, nafarapyag anya fagayu kata at marios fag arak sis buksul Salmun, ay kanya fagayu nafanaruayan way lang.

¹⁵ Fungsu Basan ngabat ay masine, ay ngayu at ngay tungud fungsu.

¹⁶ Fungsu Basan, wain am fagnantungudun Buksul Siun? Ay Siun way Dius at nafili laman at fagbanwanan ban kabavn.

¹⁷ Ay siginans Buksul Sinay, Fun Dius nasakbo sat bale. Ay ngayuk kabayu at yud katap ya at ke ngay faguyudan galo anya.

¹⁸ Ay gina o naundaud sa tiba tungud fag tungud buksul, nataban o ngayuk taw at nababawan ay at nagamatan. Ay nabul o ngay fanggalangun siginan sangay taw, anggan siginan at ngay nafamatungudun emu. Yawi em Dius, katsi gbanwan o sanya.

¹⁹ Ngay taw, segi tam Fun Dius, aroro fagayu menit kanya gurugan ay gfalangfe antam.

²⁰ Yawi tam Fun gfalangfe antam siginans fakabulun!

²¹ Dewa katanya, kanya grufa at fawayan at ngay alfuyu, ngay taw tagfataglayun gfakamulun at mauri.

²² Fun Dius nalong te, “Namauli au ku ngay fawayan siginans Fungsu Basan. Ay namul au anya fagayu siginans fagngabasadan dagat,

²³ laman namabul au anya fagayu ay gsiad am at ngay taguk. Ay ay ngay idu umfanud gsupsup at ngay taguk.”

²⁴ Ku Fun Dius, ngay taw nalag nu gtabanan o ngayuk taw sam bale.

²⁵ Tagsis fagunan ngay tagalubad, ay ngay tagfawang ngay fagfawangun sis faguyanan, ay ngay baguina tagfawang ngay fagfadkalinganun sis wabilug.

²⁶ Kanya fagayu guro te, “Ngay taw Israel, segi Yawi tam Dius, si tangayu fag taw at fagmafulan!”

²⁷ Tagsis fagunan, Benamin way at gaban, at yud ngayu, ay at fadogan, ngayuk tagfangguna siginans Uda, Sebulun ay Naftali at gaban.

²⁸ Dius, falagi sa emi am fagmabalyananun, kata am nafakamulun ebi.

²⁹ Ngay fun ban namon sa emu at ngay fanggalangun sam bale sis Erusalem.

³⁰ Falimui am ngay fawayan takata tagfangagat fag ngay mela tagsis wa sigbo. Ay aiyani yangay ngay taw takata at madot fag ngay baka tama magamut at momuy fag ngay tumad baka, yakmay kanya fagayu nafababaun at ngay sadili, laman namon sa emu fagayu at ngay salapi. Fasaruayani wan ngay talun at taw takaylat gugat kamawayan.

³¹ E ngay fagsuguan ban kadasug siginans talun Igiptu gbuba at mafanud fag ngay fanggalangun. Ay anggan ban ngay taw Kus gfabat at ngay daluap laman sas Dius.

³² Fagayu fagfunanun sas fagdaul daga, alubadi sas Dius. Alubadi fauseganani tam Fun.

³³ Alubadi sas Dius, aroro siginan ngay ebi kanya gsakay sis tungud kiwang. Dungugani at mabalyanan fag Dius at aringang takata sik lingsi.

³⁴ Foyungi te, Dius wan at fagmabalyananun tagfunan sis Israel.

³⁵ Dius madulo gina gduksun siginan at bale. Taw Israel at Dius gfon sat ngay taw fagmabalyananun ay fagmabitsugun. Segi Dius kabavn!