Alubad. 66 - Fanawbuid tagsibaliwas Fakayabian

Alubad 66 Famauseganan fag Alubad

Laman sa tagfangguna alubad: sik alubad.

¹ Am fag ngay taw sas fagdaul daga, uroi fauseganani Dius!

² Alubadi te, Dius sik takadungug, ay suyui tua nu gfauseganan am anya.

³ Fagayu am, longi sas Dius te, “Am ngay fakamulun maksvn nu madulo! Siginan am fagmabalyananun, am ngay fawayan grungan kalimu emu.

⁴ Fagayu taw sas fagdaul daga gseg ban emu, ay galubad ban sik ngay alubad laman gfauseganan emu.”

⁵ Wainyayam, damai Dius at ngay nafakamulun at madulo laman sa sangay taw.

⁶ Sis Dagat Maraska, kanya nafalanggang kadaul sik dalan laman tam ngay mangaguyang e faglaoan. Nu katanya, masine nu gfauseganan tam anya.

⁷ Siginan at fagmabalyananun, kanya gfunan kabavn ban. Ay kanya gdama gugat ngay talun. Nu katanya, lag e kamabo anya.

⁸ Am fag ngay taw, segi tam Dius! Segi anya, ay fadungugi sa ay ngay iba.

⁹ Kanya gdiri antam siginans fakabulun, ay wa kaylat nu kasaruayan tam siginan anya.

¹⁰ Dius, nainsaful o emi, kata nu gfasine salapi sas afuy.

¹¹ Nataban o emi laman namatong sas alian, ay nafadasug o sa emi at maksvn fag fagidapun.

¹² Nafabayan o em ngay fawayan nu gsiad em ngay alfuyu, nu katanya kata nu nadalan ami sasad afuy ay sasad lino. Dewa katanya, nataban tuo emi sa sik buknga at yud e mayudan.

¹³ Nangirug au ngay fanggalangun sam bale, laman namafasludan au ku ngay fatuyanan sa emu,

¹⁴ gina au e fagidapun.

¹⁵ Ay namon au sa emu at mataglu fag ngay fagbaugun, laman sik fagirugun fag ngay fanggalangun; kata ngay tupa, ngay baka tama, ay ngay kambing.

¹⁶ Fagayu am tagfaning Dius, gewan dungugani, glong au sa ayu Dius at ngay nafakamulun sa angku.

¹⁷ Nauro au ay naseg anya.

¹⁸ Nu nesug kway ro ku ngay asalanan, tam fun ro wa nabalus angku.

¹⁹ Dewa katanya, Dius nadungug tua, ay nabalus ku darangin.

²⁰ Segi tam Dius, aroro di nafae yud e masuad ku darangin, ay di nasuksuk sa angku te, mafangesug.