Alubad. 65 - Fanawbuid tagsibaliwas Fakayabian

Alubad 65 Nu Gfauseganan

Laman sa tagfangguna alubad: Dabid at alubad.

¹ Dius, masine nu namauseganan ami emu sas Buksul Siun! Ay namafasludan ami em ngay fatuyanan sa emu.

² Fagayu taw nangakbang sa emu aroro nabalus tuo at ngay darangin.

³ Malubguban ami si em ngay asalanan, ay dewa katanya nafalyam tuo fagayu em ngay asalanan.

⁴ Mauseganan am nafili fag ngay taw, ay am nataban sam bale laman namanwan. Nafon o emi at masine ay at kasakan nusnga setaw sim bale.

⁵ Dius em tagfalangfe, nabalus tuo em darangin, ay nafalangfe tuo ay nafalag sa emi am ngay nafakamulun at madulo. Ay fagayu taw tagsas dife dagat anggan ngay taw sas fagdaul daga gseg tua emu.

⁶ Siginan am fagmabitsugun, nawat o ngay buksul, ay siginan takatanya, nafalag o te, mabalyanan o.

⁷ Gfaragang o tagbia fag ngay lugwak sis dagat, ay anggan ngay taw nu gawayan.

⁸ Anggan ngay taw tagbanwan sa tangayayu fag ngay furuan kalimu emu, aroro sam ngay nafakamulun at madulo. Siginans fakamenitan anggan sas fakayabian, ngay taw guro guseganan aroro sa am nafakamulun.

⁹ Galaga o ay gfarugme daga laman umke ngay fananumun. Em Dius, gfae familugan o gugat ngay liskung. Nu katanya, ngay taw kae gutluan tua. Kanya fag ngay buknga am nafalganan wan.

¹⁰ Gfarugme tuo at malian fag fagtanuman. Ay gfarak o, laman daga kalumak ay kae mamam, ay gfatugbung o ngay tanum.

¹¹ Kayu banwa, gfayu o gutluan. Nusnga nday o, ngayu at faggutluun.

¹² Ngay talun at yud e taw anke makmak ay ansik fagnamafangonan fagbaugun, ay ngay buksul ansine kata ngay taw taguseganan aroro anke lanbung.

¹³ Si sangay tubas ngayuk fagbaugun, ay sisad datag faggutluun way lang takalag. Sanya fag ngay talun kata ngay taw taguro galubadan ay guseganan.