Alubad. 62 - Fanawbuid tagsibaliwas Fakayabian

Alubad 62 Dius wan Tagdiri

Laman sas Edutun, tagfangguna alubad: Dabid at alubad.

¹ Dius way lang ku tagfalangfe, nu katanya maragangan au gfanya anya.

² Kanya way lang ku fagsarigan, ku tagfalangfe ay ku fagsarirungan. Nu katanya, kdi kamomuy.

³ Ku ngay fawayan, seduge tua ban nunda nu gfawayan am angku? Ay nu kaylat am namatangda angku kata sik alad tagakafuanun.

⁴ Ay ngay algan namalin am angku siginan ku fanambagun. Ay kamuag am gugat gfanagsag, kata nu gfauseganan, ay aroro mangaro, sa ay amatanganan, kauri wayam angku.

⁵ Dius way lang tagfon angku fagsegun, nu katanya maragangan au gfanya anya.

⁶ Kanya way lang ku fagsarigan, ku tagfalangfe ay ku tagdiri. Nu katanya, kdi gatayukan.

⁷ Dius wan ku tagfalangfe ay tagfasik takadungug angku. Kanya wan at mogat ku fagsarigan ay ku tagdiri.

⁸ Dius at ngay taw, afanudi sa anya kabavn! Ay fasurei sa anya fagayu ay namatangan, aroro kanya wan tagdiri ayu.

⁹ At yud e kwa fag ngay taw kalyam kata sik tagmara, ay ngay taw takadungug wa yangay e fanambagun. Nu nafabudbungguan kanya fag ngay taw, at kabyatan kagan way tagmara.

¹⁰ Lag am gfanagsag gseg ay ngay ramraman, tagsiginan ay nafamalimu ay ay nafangkamul. Dewa am anke ramraman, dangay lang sanya ay amatanganan.

¹¹ Bundi sayginan nu gdungug au Dius nu glong te, “Au way lang ke fagmabalyananun.”

¹² Ku Fun, mafangesug tuo. Matuyan wan, gfon o sa sangay taw famangsi sat ngay nafakamulun.