Alubad. 60 - Fanawbuid tagsibaliwas Fakayabian

Alubad 60 Darangin laman Dius Ggubuk

Laman sa tagfangguna alubad: Dabid at alubad. Nu karuri, kata sik alubad at ngayan te, “Famaksvn Nasadian fag Barugwak.” Dabid at nariruk nu ntabu gfawayan ngay taw Aram ay ngay taw Aram-Naaraim ay ngay taw Aram-Suba. Ginanya Uab noli yangay siginans fagawayanan fag datag Barara, nu inda nu gfabul labi duak libuk taw Edum.

¹ Dius, naiyan wo emi, dewa ami wan am nafili fag ngay taw, ay naiklas o em furuan at alad. Andotama o emi, dewa katanya, katsi fafolii wan sa emi fagmanabayanun.

² Nauig o daga, ay nke ngay karang ay an-gubang. Ay katsi, fatabai wan ngay karang.

³ Maksvn wan nu gfaidapan o emi, granranugan ami kata nu nalanguan ami.

⁴ Dewa katanya, nafoli o sa emi sik famasaful, laman fagsafulan te, sanya nu maful ami gina ami gfawayan.

⁵ Siginan am fagmabalyananun, dungugi ay falangfei emi, am fakesugun fag ngay taw.

⁶ Dius, gina ami sim bale nalong o te, “Namabo kwan, ay nangafud furuan Sekem ay datag Sukut, laman sa ku ngay taw.

⁷ Gilyad ay Manase ku fagagbilugun, ay Efraim ku famalabag ay Uda ku tagfangguna.

⁸ Muab ku fagsuguan, ay Edum ku fagagbilugun. Guro au laman famasaful te, nababo kwan ngay taw Filistia.”

⁹ Dius, sinu at mafababo angku sas talun Edum at ngay furuan ayu daul at ke ngay alad gang?

¹⁰ Em Dius, o naiyan wo emi? O ay wa ban o galo ya em ngay tagfawayan?

¹¹ Em Dius, gubuki emi nu gfawayan ami em ngay fawayan, aroro em taggubuk nu taw way, we fanambagun.

¹² Dius, aroro ggubuk tuo gugat emi, kabavn ban gbabo tuami em ngay fawayan, ay gsiad o anya fagayu.