Alubad. 6 - Fanawbuid tagsibaliwas Fakayabian

Alubad 6 Darangin laman Ggubuk

Laman sa tagfangguna alubad: Dabid at alubad. Gasfuan nu gfawang fagfawangun ke bakyang.

¹ Yawi, dewa o andotama angku, lag yap gfaksvn nu gfaurianan o angku.

² Afanyui ay fafiai angku, aroro fagdaul ku bilug mamomuy wan.

³ Yawi, maksvn nu gafanawa au. Ginain ya ban nu gfafia o angku?

⁴ Yawi, afolii ay gubuki angku! Ay falangfei angku siginans fakabulun. Aroro gtuyan au te, kesug o angku.

⁵ Aroro nu nbul kwa ban, kwa gamatang ya emu. O nunda e mafauseganan yay emu tagsi sangay kinbul at talun?

⁶ Siginan ku nafandengan sak au anmomuy. Galay yabi gwayway au, ay ku liasun gfabasa gugat ku tangil.

⁷ Ay siginan ku ngay fawayan at ngay nafakamulun sa angku, ay at kadugean nu gwayway au ku mata sak anbaga.

⁸ Fagayu ku fawayan, ayayui wan siginan angku, aroro Yawi nadungug nu gwayway au.

⁹ Yawi nadungug nu get au gubuk sa anya, ay kanya gbalus ku darangin.

¹⁰ Ku ngay fawayan masakit nu glagyu aroro maksvn nu nkapla ay nu kalimu.