Alubad. 57 - Fanawbuid tagsibaliwas Fakayabian

Alubad 57 Darangin laman Get Gubuk sas Dius

Laman sa tagfangguna alubad: Dabid at alubad. Nu karuri kata sik alubad at ngayan te, “Lag Giklas.” Tuy sabaliwa Dabid gina nasas luib laman glagyu Saul.

¹ Dius, afanyui angku, aroro o wan ku fagsarirungan. Gsarirung au si emu kata sik riangan manuk sit mina at daga fakfak yakmay fagmauriun anlangfe.

² Tiba Tungud fag Dius, guro au sa emu, aroro saful au te, namafasludan o am fakaylatun sa angku.

³ Gfadasug o am gubuk siginans banwa laman umlangfe au, ay gfapla o ngay taw tagfalingun angku. Ay gfalag ban o sa angku te, mafangesug o ay matuyan.

⁴ Ku ngay fawayan gligung angku. At ngay bagang kata sik bangko, ay at ngay leplep kata sik fiso at maglat. Kanya fagayu kata sik ngay liun tagagatun sik taw.

⁵ Dius, fabati am ngayan laman gtungud yap tua sbanwa, ay falagi am fagmasineun sas fagdaul daga.

⁶ Nafanawa au aroro ku ngay fawayan nafasangdawan si ku dalan, ay kanya yay mangaro fagayu at kinkiktan.

⁷ Dius, aroro sa emu ankaksvn ku amatanganan, ay galubad au sa emu.

⁸ Masurip nu kafulo au, ay namawang au ngay fagfawangun at ke ngay bakyang, ay yakmay menit nsure, gfawang kway gugat.

⁹ Ku Fun, gfauseganan au ay galubad sa emu si sangay talun at ngay taw.

¹⁰ Aroro we gfasud nu mafangesug o ay nu matuyan o, ay gtungud yay banwa at kadaulan.

¹¹ Dius, fabati am ngayan laman gtungud yap tua sbanwa, ay falagi am fagmasineun sas fagdaul daga.