Alubad. 56 - Fanawbuid tagsibaliwas Fakayabian

Alubad 56 At ke Fagafanudun sas Dius fag Darangin

Laman sa tagfangguna alubad: Dabid at alubad. Tuy sabaliwa gina ngay taw Filistia nagamat Dabid sis furuan Gat. Nu karuri kata sik alubad at ngayan te, “Kinyayu fag Labikung.”

¹ Dius, afanyui angku, aroro e gfafalo gugat angku. Ay nusnga nday, ku ngay fawayan gfawayan gugat angku.

² Kanya fagayu gfafalo gugat angku. Tiba Tungud fag Dius, nasaful wo te, ngayu ku ngay fawayan.

³ Gina au nke fakalimuun, gafanud ktua sa emu.

⁴ Dius, guseganan au aroro sam nafatuyanan. Kwe fakalimuun, aroro gafanud au sa emu. O nunda ngay taw e fagmafakamulunun sa angku?

⁵ Fagngabak menit ku ngay fawayan gfabali ku ngay longan at masuad. Ay kanya fagayu at algan gfauri gugat angku.

⁶ Kanya fagayu gadgaloan ay namanaya, ay gulit gugat ku ngay fakamulun, ay gfanya sik buknga laman namabul angku.

⁷ Faurianani fia kanya fagayu kata at fagmauriun. Dius, siginan am dotama, faurianani wan anya fagayu.

⁸ Gfasadsadian way o fia ngay tagfabaluanan angku, ay saful way o ku fagwaywayun. O nunda wo nariruk sim fafil?

⁹ Dius, nu naet au sa emu gubuk, ku ngay fawayan lumagyu. Nasaful kwa te, o wan ku taggubuk.

¹⁰ Yawi, ku Dius, gfauseganan au emu aroro sam ngay longan.

¹¹ Kwe fakalimuun aroro gafanud au sa emu. O nunda ngay taw we fagmafakamulunun sa angku?

¹² Dius, namafasludan au ku ngay fatuyanan sa emu. Ay namon au sa emu sik fagusegananun fag ngay famonun,

¹³ aroro nafalangfe tuo angku siginans fakabulun ay sas fakataidun. Nu katanya, manamanwan au sam day tigyangan, ay sam fagmayamagun tagfon leleg.