Alubad. 55 - Fanawbuid tagsibaliwas Fakayabian

Alubad 55 Sik Taw at Naiyanan at Fagadgalangan at Darangin

Laman sa tagfangguna alubad: Dabid at alubad. Gasfuan nu gfawang fagfawangun ke bakyang.

¹ Dius, dungugi ku darangin. Nu get au sa emu gubuk, lag gsuksuan angku.

² Dungugi angku, ay balusi ku fagetun, aroro ku ngay fagidapun nasuklub angku.

³ Maksvn nu kalimu au ku ngay fawayan at famalimuanan ay at famalingun, aroro kanya fagayu maksvn nu kadotama, ay nu gfaidapan angku.

⁴ Ku baga gsubsubuan aroro kalimu au te, kabul kwa ro.

⁵ Ay kalimu au maksvn gtadtaruyan.

⁶ Ay glong au te, “Nu e fakfak kdi kata sik labikung, glayug kwa ro laman nanrvbvy ku fagfiangalayan.

⁷ Nanlayug au sa tangayayu fag talun at yud e taw, laman namanwan sanya.

⁸ Ay nanrvbvy au masakit sik mabayan fag fagsuksuanan, laman umlangfe au siginan ku ngay fawayan nu kadotama takata sik maksvn fag fulug.”

⁹ Ku Fun, fasayuani anya fagayu gina gkamatoanan. Ay nalag au sanya fag furuan daul nu mauri ay nu yud mabayan.

¹⁰ Galay menit ay yabi kanya fagayu gligungan alad, dewa katanya, fagmauriun si way sad furuan.

¹¹ Nusnga setaw sanya fag furuan, wa maugali ya. Fakamalingunun ay fagfandayaun anfagdaul wan sa sangay taw at fagnangafulan.

¹² Nu ku ngay fawayan di tagfalingun ay takamatungudun sa angku, magwanta kway ay masaruy.

¹³ Ay at maidap, tagfalingun angku o wan ku fagsud, ku fagadgalangan ay ku fagtoglagun fia.

¹⁴ Ebi gina ta gadgaloan glao sis fagngayuan taw sis Dius at bale, mabayan tua nu gkamatoan ta.

¹⁵ Fakabulun nangus gguyan gugat ku ngay fawayan laman namabul. Ay e namoli nangus anya fagayu gina yay gleleg, aroro tagsit amatanganan ay tagsit bale fagmauriun way lang.

¹⁶ Dewa katanya, get ktua gubuk sas Yawi ku Dius, ay kanya gfalangfe tua angku.

¹⁷ Galay balabag ay swabilug menit anggan sfafun, gfoyung au gugat ku ngay fagidapun, ay gfandeng au laman get gubuk sas Yawi. Ay kanya gbalus tua angku.

¹⁸ Kabavn kanya gfalangfe ay gdiri tua angku kaduge au gfawayan, dewa ngayu ku ngay fawayan.

¹⁹ Dius kabavn gfagtainan, kanya gdungug tua angku ay gfaurianan gfapla ku ngay fawayan, aroro kanya fagayu wa kaylat gfabali at ngay ugali, ay wa kalimu Dius.

²⁰ Ay ebi ku fagadgalangan nafauri angku ay anggan at ngay fagtoglagun, ay wa nafaning em nasadian.

²¹ Kanya nu garingang maylat ay mafalukmeanan kata sik deut, dewa katanya, at nananadan wan takamawayan, kata sik fiso at maglat.

²² Fadasugi sas Yawi am ngay fagabyatanun, ay kanya gfalyam, ay gtabanan gbakvd emu. Ay kabavn Dius di gfabayan ay di gfababawan ngay taw at matuyan.

²³ Dius, dewa katanya, gfatong o sa tangabasad fag alian ngay taw takamabul ay tagfandaya, gina yay mabaguama. Dewa katanya au, gafanud ktua sa emu.