Alubad. 54 - Fanawbuid tagsibaliwas Fakayabian

Alubad 54 Dius Tam Taggubuk

Laman sas tagfangguna alubad: Dabid at alubad. Nariruk gina ngay taw Sif nasas Saul laman namasaful te, “Dabid gsuksuan si emi.”

¹ Dius, siginan am fagmabalyananun, falangfei angku, ay fatuyani te, dakdi nafakamulun kata ngay taw at nalong fag asalanan.

² Dungugi ku darangin,

³ aroro ku fagyudun toglag fag ngay taw gfawayan angku laman namabul. Kanya fagayu madot, ay we tungkul sa emu.

⁴ Ku Fun Dius, o wan ku taggubuk ay ku fagelelegun.

⁵ Nangus ku ngay fawayan at algan mauri sa angku, umfasludan sa anya. Fasurei am fagmatuyanun, ay famini wan anya fagayu.

⁶ Yawi, gfon au sa emu sik maylat fag fanggalangun. Ay gfauseganan au emu, aroro matuyan tuo gugat.

⁷ Nafalangfe o angku sas fagayu fagidapun, ay nagubuk tuo angku gbabo ku ngay fawayan.