Alubad. 52 - Fanawbuid tagsibaliwas Fakayabian

Alubad 52 Dius nu Gfauri ay nu Kafanyu

Laman sas tagfangguna alubad: Dabid at alubad. Nariruk gina Dueg fag taw Edum glao sas fun Saul laman nanlong te, “Dabid nasas Akimelek fag tagfon fanggalangun.”

¹ Sik takadungug o fag taw, ay wain am fakamatungudunun sam fagmauriun? O nunda ebi ginan Dius at fagfangesugun wa gugat si emu?

² Kabavn am fagamatanganun kaylat o namauri am ngay iba. Ay sik takamuag o, ay am leplep kamabul kata sik maglat fag fangufo.

³ Nu kesug o fagmauriun, gtungud yay nu kesug o fagmatuyanun. Ay abat ngate o glong at matuyan, kamuag way o.

⁴ O fag takamuag, am fakaylatun gfauri o am ngay iba siginan am ngay longan at mauri.

⁵ Dewa katanya, Dius ban gfaurianan emu kabavn. Ay gaiyan emu siginan am bale ay gfabul.

⁶ Ay at matuyan ban fag ngay taw lumag takatatuy ay umdulo. Ay kadkasean glong te,

⁷ “Damai, kafag taw at yud gafanud sas Dius laman at tagbalabag. Abat ngate, kanya gseg way sat ngay ramraman laman kalangfe, ay aroro mangaro gfamut way at fagmabitsugun siginan nu gfamin at iba.”

⁸ Dewa katanya, au si ktua gugats Dius at bale kata sik fun kayu ulibu marabung. Ay kabavn gafanud ktua te, kanya mafangesug.

⁹ Kabavn guseganan au sa emu aroro sam ngay nafakamulun, ay gfoyung au sa sangay taw tagfaning emu te, masine o.