Alubad. 51 - Fanawbuid tagsibaliwas Fakayabian

Alubad 51 Nu Get sas Dius laman Gfalyam Asalanan

Laman sa tagfangguna alubad: Dabid at nariruk, gina Natan fag taglong nanangakbang anya aroro nafataladan Batseba.

¹ Dius, afanyui angku aroro mafangesug o. Ay siginan am fakafanyun, falyami fagayu ku asalanan.

² Falyami wan fagayu ku asalanan, ay fasinei ku amatanganan siginan ku ngay nafakamulun at mauri.

³ Gtuyan au te, nafamabo au emu, ay gamatang kway gugat ku ngay asalanan.

⁴ Anke asalanan au, kaugat wan sa emu. Nafakamulun au at mauri sam daga salubangan. Matuyan am longan te, e asalanan au, ay matuyan wan gfaurianan o angku.

⁵ Siginan yay ku mina nu gfafion angku, mauri kwan, ay gina au kasalug e asalanan kwan.

⁶ Am fakaylatun sa angku sik matuyan fag amatanganan, nu katanya, fae fagsafuluni angku.

⁷ Lisgisi sa angku sik balugu laman umfegus au. Fegusi angku laman ku amatanganan umsine kata sik dingin at barugwak nu malaksi.

⁸ Nafaidapan o angku, kata nu glubuk. Ay katsi, fafolii sa angku fagusegananun.

⁹ Ay falyami wan fagayu ku asalanan, ay lag gamatang ya.

¹⁰ Dius, foni angku at matuyan fag amatanganan, ay fafolii ku fagmatuyanun.

¹¹ Lag gaiyan angku siginan am day tigyangan, ay lag gfayayu am Masine fag Falad siginan angku.

¹² Ay fafolii sa angku fagusegananun, kata ebi gina o gfalangfe angku, ay foni angku sik amatanganan at mafamaning.

¹³ Nu katanya, mafafoyung ktua am ngay faugali sa takamabo fag ngay taw, ay kanya ban fagayu umfoli sa emu.

¹⁴ Ku tagfalangfe fag Dius, falyami ku asalanan, aroro nafamabul au. Nu katanya, guro au guseganan, aroro nafalangfe tuo angku.

¹⁵ Ku Fun, foyungi angku ngay longan, laman gfauseganan ktua emu.

¹⁶ Wa ngap o kaylat ngay fagirugun fag ngay fanggalangun. Nu kaylat di o, nafon kwa ro emu.

¹⁷ At matuyan fag fanggalangun laman sa emu, sik amatanganan takamababaun. Ay di o gaiyan am nafauri fag taw at naubun tua at ngay asalanan.

¹⁸ Dius, aroro kesug o Erusalem, fakamuluni at masine, ay dogi yap fae aladi.

¹⁹ Nu katanya tua, guseganan tuo at matuyan fag ngay fanggalangun, kata fagirugun fag ngay fanggalangun at yud e buin, ay fanggalangun fag ngay baka, em fagnangirugun sam fagirugan.