Alubad. 50 - Fanawbuid tagsibaliwas Fakayabian

Alubad 50 At Matuyan nu Gseg

Asaf at alubad.

¹ At mabalyanan fag Dius, Yawi garingang. Kanya guro gfaful sas fagdaul daga at ngay taw, siginans fakamenitan anggan sas fakayabian.

² Kanya gyamag siginan at filian fag furuan Siun, at yud e kalong at kasinean.

³ Dius kadasug aroro e fagnanlongun. Gina kadasug, sit fagunan sik afuy at mairug nusnge wain, ay sit ligung maksvn nu gfulug.

⁴ Dius nauro banwa ay fagdaul daga laman tagfatuyan gina gfawabilugan at nafili fag ngay taw.

⁵ Ay kanya glong te, “Fafuli stie sa ku daga salubangan ku ngay taw at kinsadi sa angku siginan nu gfon fanggalangun.”

⁶ Banwa gfalag te, Dius matuyan, aroro Dius wan tagtuyan.

⁷ Dius gdog yay glong te, “Ku ngay taw, dungugani ku fagnanlongun! Ngay taw Israel, au wan ay Dius. Au wan tagfatuyan te, e asalanan am!

⁸ Kwa gsalag nu gfon am gugat sa angku ay fagirugun fag ngay fanggalangun.

⁹ Dewa katanya, kwa kaylat ay ngay fanggalangun fag ngay baka ay fag ngay kambing,

¹⁰ aroro ku fagagbilugun way fagayu mela tagsisad araw, anggan ngayuk baka si sangay buksul.

¹¹ Toglag kway fagayu manuk tungud, ay ku fagagbilugun fagayu mela.

¹² Dewa kman ro anlunus, kwa get fakonun sa ayu, aroro ku fagagbilugun way fagdaul daga, ay fagayu tagsanya.

¹³ O nunda kon au baka at yamas, ay ginum kambing at taguk?

¹⁴ Ku fakaylatun ay fanggalangun sa angku ay fagusegananun tua, ay nu gfafasludan am ay ngay fatuyanan sa angku, Tiba Tungud fag Dius.

¹⁵ Gina am sis buknga fagidapun, darangini sa angku, ay gfalangfe au ayu, ay gfauseganan am angku.”

¹⁶ Dewa katanya, Dius nalong sat mauri fag ngay taw te, “Nataw ro at fanambagun sa ayu nu glong am ku ngay suguan ay ku nasadian?

¹⁷ Nafae yud am e masuad ku ngay foyungan, ay wam nafaning ku ngay longan.

¹⁸ Nu nalag am tagfangkamul, gfagadgalangan am, ay gfadgaloan yangay am ngay tagfanugtug.

¹⁹ Kabavn ay ngay longan mauri, ay kamuag am gugat.

²⁰ Kaylat am gkamatoan at mauri sabaliwa ay ngay faduksay.

²¹ Gina am gfakamulun takatanya fagayu, kwa nasalag ayu, nu katanya, gamatangan am te, kata kway sik taw. Dewa katanya katsi, gsalag au ayu, laman gfalag au sa ayu nu se aksvn ay fagmauriun.

²² Fagayu am at yud gamatang Dius, dungugani, aroro nu dway am gdungugan, namamin kban ayu, ay wa ban e gfalangfe ya ayu.

²³ Ngay taw tagfauseganan angku, gsuyu tua angku. Nu glao tuam sa ku dalan, gfalangfe au ayu.”